By អាជ្ញាធរខេត្តកោះកុងបានបូមស្តារប្រព័ន្ធលូប្រវែងជាង២គីឡូម៉ែត្រនៅក្រុងខេមរភូមិន្ទ ដើម្បីរំដោះការជន់លិចពេលរដូវវស្សាខិតជិតមកដល់។
ក្រុមអ្នកស្តារកំពុងធ្វើការជួសជុលប្រព័ន្ធលូទាំងសងខាងផ្លូវចាប់ពីរង្វង់យាយរែកផ្លែឈើដល់មុខអធិការនគរបាលក្រុងខេមរភូមិន្ទ។ ប្រព័ន្ធលូទាំងនេះកកស្ទះដោយដីល្បប់ភក់ និងសំរាមនានា ធ្វើឱ្យទឹកហូរមិនស្រួលក្នុងរដូវវស្សា។
លោក អ៊ូច ពន្លច នាយកទីចាត់ការផែនការ និងវិនិយោគខេត្តកោះកុង បានឱ្យដឹងថា៖ “ការស្តារប្រឡាយលូធម្មជាតិផ្សេងទៀតកំពុងដំណើរការ ដើម្បីចៀសវាងការកកស្ទះដូចបណ្តាឆ្នាំមុនៗ។”
សម្រាប់ឆ្នាំ២០២៦នេះ រដ្ឋបាលខេត្តក៏ត្រៀមជួសជុលអ៊ុតផ្លូវកៅស៊ូថ្មីជាច្រើនខ្សែបន្ថែមនៅក្នុងក្រុងខេមរភូមិន្ទ ដើម្បីលើកកម្ពស់សុវត្ថិភាពធ្វើដំណើរ។
លោក ចាន់ដារ៉ា និងលោក លន សុភីម ជាប្រជាពលរដ្ឋបានយល់ឃើញថា ការស្តារប្រឡាយលូចាស់ៗជារឿងល្អប្រសើរ ដើម្បីបញ្ចៀសការជន់លិចផ្លូវផ្ទះសម្បែង។
ប្រជាពលរដ្ឋក៏សូមថ្លែងអរគុណដល់អាជ្ញាធរខេត្ត និងស្នើឱ្យបន្តពិនិត្យដោះស្រាយប្រឡាយលូផ្សេងៗទៀត ពិសេសតំបន់ដែលមានពលរដ្ឋលួចចាក់ដីរំលោកបំពាន។
