By ស្វាយរៀង – កម្លាំងសមត្ថកិច្ចកម្ពុជាបានធ្វើប្រតិបត្តិការបង្ក្រាបករណីឆបោកតាមប្រព័ន្ធអនឡាញមួយនៅក្រុងបាវិត កាលពីព្រឹកថ្ងៃទី៧ ខែមេសា ឆ្នាំ២០២៦។
ប្រតិបត្តិការនេះធ្វើឡើងដោយកម្លាំងអគ្គស្នងការដ្ឋាននគរបាលជាតិ សហការជាមួយគណៈបញ្ជាការឯកភាពក្រុងបាវិត និងមន្ត្រីគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) ក្រោមការសម្របសម្រួលពីព្រះរាជអាជ្ញាអមសាលាដំបូងខេត្តស្វាយរៀង។
ទីតាំងដែលត្រូវបានចុះបង្ក្រាបគឺកាស៊ីណូ ហ្គោដិន ហ្កាឡាក់ស៊ី ដែលស្ថិតនៅផ្លូវជាតិលេខ១ ភូមិបាវិតកណ្តាល សង្កាត់បាវិត ក្រុងបាវិត។
ក្នុងប្រតិបត្តិការនេះ អាជ្ញាធរបានចាប់ខ្លួនជនសង្ស័យសរុប ២៤៤ នាក់ ដែលក្នុងនោះមានជនជាតិវៀតណាម ១៨២ នាក់ ជនជាតិចិន ៤៩ នាក់ ជនជាតិកូរ៉េ ៩ នាក់ និងជនជាតិខ្មែរ ៤ នាក់។
អាជ្ញាធរក៏បានដកហូតវត្ថុតាងជាច្រើន រួមមានទូរស័ព្ទដៃ ៥០៥ គ្រឿង កុំព្យូទ័រលើតុ ១៥០ គ្រឿង កុំព្យូទ័រយួរដៃ ១ គ្រឿង ម៉ូនីទ័រ ១ គ្រឿង និងរថយន្ត ៤ គ្រឿង។
ជនសង្ស័យទាំងអស់ និងវត្ថុតាងកំពុងត្រូវបានបន្តនីតិវិធីតាមច្បាប់ ស្របតាមច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។
គ.ល.ក. បានសម្រេចដកហូតអាជ្ញាបណ្ណកាស៊ីណូលេខ ០៨៦ គ.ល.ក. ដែលបានផ្តល់ជូនក្រុមហ៊ុន ខេ ប៊ី អាយ (ខេមបូឌា) ភីអិលស៊ី បន្ទាប់ពីរកឃើញការពាក់ព័ន្ធនឹងសកម្មភាពឆបោកអនឡាញ។
អាជ្ញាធរបានអះអាងថា នឹងបន្តអនុវត្តវិធានការយ៉ាងតឹងរឹងក្នុងយុទ្ធនាការបង្ក្រាប និងលុបបំបាត់បទល្មើសឆបោកតាមប្រព័ន្ធបច្ចេកវិទ្យានៅទូទាំងប្រទេស ដោយមិនមានការលើកលែងចំពោះទីតាំងណាមួយ។
