អីរ៉ង់ចោទសហរដ្ឋអាមេរិករំលោភគោលការណ៍ឈប់បាញ់ ខណៈណេតាន់យ៉ាហ៊ូបន្តគំរាមប្រយុទ្ធ

ក្តីសង្ឃឹមក្នុងការបញ្ចប់សង្គ្រាមនៅមជ្ឈិមបូព៌ាកំពុងរលាយសាបសូន្យ បន្ទាប់ពីប្រធានសភាអីរ៉ង់លោក Mohammad Bagher Ghalibaf បានចេញមកប្រកាសយ៉ាងខ្លាំងថា ការឈប់បាញ់ និងការចរចាជាមួយសហរដ្ឋអាមេរិកនៅពេលនេះ គឺជាទង្វើដែល «មិនសមហេតុផល» ទាល់តែសោះ។

លោក Ghalibaf បានចោទប្រកាន់ទីក្រុងវ៉ាស៊ីនតោនថា បានរំលោភលើលក្ខខណ្ឌសំខាន់ៗចំនួន៣ចំណុច ក្នុងចំណោមគោលការណ៍ទាំង១០ ដែលអីរ៉ង់បានដាក់ចេញដើម្បីបញ្ចប់សង្គ្រាម។ ការបំពានទាំង៣ចំណុចនោះមានដូចជា ការបន្តវាយប្រហាររបស់អ៊ីស្រាអែលលើលីបង់ ការលួចបញ្ជូនដ្រូនចូលដែនអាកាសអីរ៉ង់ក្រោយពេលឈប់បាញ់ និងការដែលអាមេរិកមិនព្រមទទួលស្គាល់សិទ្ធិចម្រាញ់អ៊ុយរ៉ាញ៉ូមរបស់អីរ៉ង់។

ភាពតានតឹងនេះបានកើតឡើងចំពេលដែលកិច្ចព្រមព្រៀងឈប់បាញ់ដ៏ផុយស្រួយទើបតែមានអាយុបានមួយថ្ងៃប៉ុណ្ណោះ ហើយភាគីទាំងសងខាងកំពុងមានជម្លោះពាក្យសម្តីគ្នាយ៉ាងខ្លាំងលើខ្លឹមសារនៃកិច្ចព្រមព្រៀង។

សេតវិមានបានប្រកាសថា អនុប្រធានាធិបតី លោក JD Vance នឹងដឹកនាំគណៈប្រតិភូទៅចរចានៅទីក្រុងអ៊ីស្លាម៉ាបាត ប្រទេសប៉ាគីស្ថាន នៅថ្ងៃសៅរ៍ខាងមុខនេះ។ រដ្ឋមន្ត្រីការបរទេសអីរ៉ង់ លោក Abbas Araghchi បន្តទទូចថា ពិភពលោកកំពុងសម្លឹងមើលការកាប់សម្លាប់នៅលីបង់ ហើយអាមេរិកគឺជាអ្នកត្រូវសម្រេចចិត្តថា តើត្រូវបញ្ឈប់វា ឬយ៉ាងណា។

ប្រធានាធិបតីអាមេរិក លោក ដូណាល់ ត្រាំ បានច្រានចោលការលើកឡើងរបស់អីរ៉ង់ ដោយលោកចាត់ទុកថា ការដែលអ៊ីស្រាអែលវាយប្រហារក្រុមហេសបូឡានៅលីបង់ គឺជា «ជម្លោះដាច់ដោយឡែកមួយ» ដែលមិនពាក់ព័ន្ធនឹងកិច្ចព្រមព្រៀងឈប់បាញ់ជាមួយអីរ៉ង់នោះទេ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានបង្ហាញមោទកភាពចំពោះសមិទ្ធផលយោធារបស់ខ្លួន ដោយលោកអះអាងថា អ៊ីស្រាអែលបានធ្វើឲ្យសមត្ថភាពផលិតមីស៊ីល និងមហិច្ឆតានុយក្លេអ៊ែររបស់អីរ៉ង់ធ្លាក់ចុះយ៉ាងខ្លាំង។ លោកបាននិយាយថា «ពេលនេះអីរ៉ង់ចុះខ្សោយជាងពេលណាៗទាំងអស់ ចំណែកអ៊ីស្រាអែលវិញខ្លាំងជាងពេលណាៗទាំងអស់»។

លោកណេតាន់យ៉ាហ៊ូបានព្រមានជាថ្មីថា ការឈប់បាញ់នេះមិនមែនជាការបញ្ចប់សង្គ្រាមនោះទេ ប៉ុន្តែគ្រាន់តែជាការសម្រាកមួយរយៈប៉ុណ្ណោះ ហើយប្រសិនបើចាំបាច់ អ៊ីស្រាអែលនឹងបន្តបាញ់ប្រហារភ្លាមៗ។ ភាពខុសគ្នាដាច់ស្រឡះនៃគោលជំហរនេះ បានធ្វើឲ្យការចរចានៅប៉ាគីស្ថានខាងមុខនេះ ក្លាយជាវិញ្ញាសាដ៏លំបាកបំផុតក្នុងការស្វែងរកសន្តិភាពយូរអង្វែង។