បារាំងចាប់ដៃជំរុញសន្តិភាព ទាមទារឲ្យលីបង់ត្រូវបញ្ចូលក្នុងកិច្ចព្រមព្រៀងឈប់បាញ់

ប្រធានាធិបតីបារាំង លោក អេម៉ានូអែល ម៉ាក្រុង បានចេញមុខអន្តរាគមន៍យ៉ាងសកម្ម ដោយផ្ញើសារសំខាន់ទៅកាន់មេដឹកនាំអីរ៉ង់ និងសហរដ្ឋអាមេរិក ដើម្បីទាមទារឲ្យកិច្ចព្រមព្រៀងឈប់បាញ់ត្រូវបានអនុវត្តទូលំទូលាយ រួមទាំងក្នុងប្រទេសលីបង់។

យោងតាមសារព័ត៌មាន Armen Press ដែលចុះផ្សាយនៅថ្ងៃព្រហស្បតិ៍ទី៩ ខែមេសា ឆ្នាំ២០២៦ អាមេរិក និងអីរ៉ង់បានព្រមព្រៀងឈប់បាញ់គ្នារយៈពេលពីរសប្តាហ៍ ប៉ុន្តែស្ថានភាពជាក់ស្តែងហាក់ផ្ទុយស្រឡះទាំងស្រុង។ អ៊ីស្រាអែលបន្តវាយប្រហារលីបង់យ៉ាងខ្លាំង បណ្តាលឲ្យមនុស្សជាង២៥០នាក់ស្លាប់កាលពីថ្ងៃពុធ។

ក្នុងកិច្ចសន្ទនាតាមទូរសព្ទជាមួយប្រធានាធិបតីអីរ៉ង់ លោក ម៉ាស៊ូដ ប៉េសេសស្គីន និងប្រធានាធិបតីអាមេរិក លោក ដូណាល់ ត្រាំ លោក ម៉ាក្រុងបានបញ្ជាក់ថា ការបញ្ចូលលីបង់ក្នុងកិច្ចព្រមព្រៀងគឺជា«លក្ខខណ្ឌចាំបាច់បំផុត» ដើម្បីធានាសន្តិភាពយូរអង្វែង។ លោកក៏លើកឡើងពីបញ្ហានុយក្លេអ៊ែរ និងសកម្មភាពបង្កការរំខាននាវាចរណ៍នៅច្រកសមុទ្រ Hormuz។

លោក ម៉ាក្រុង បានថ្កោលទោសយ៉ាងខ្លាំងចំពោះការវាយប្រហាររបស់អ៊ីស្រាអែលលើលីបង់ ដែលលោកចាត់ទុកថាជាការបាញ់ប្រហារដោយមិនរើសមុខ។ តាមរយៈបណ្តាញសង្គម X លោកបានប្រកាសថា បារាំងនឹងបន្តគាំទ្រអធិបតេយ្យភាពលីបង់ និងជួយជំរុញផែនការដកហូតអាវុធពីក្រុមហេសបូឡា។