សង្គ្រាមអ៊ីរ៉ង់ជាចំណុចរបត់សំខាន់ អង់គ្លេសពង្រឹងសេដ្ឋកិច្ច-យោធា

នាយករដ្ឋមន្ត្រីអង់គ្លេស លោក Keir Starmer បានប្រកាសថា សង្គ្រាមនៅអ៊ីរ៉ង់បានក្លាយជាចំណុចរបត់សំខាន់សម្រាប់ប្រទេសអង់គ្លេស បន្ទាប់ពីជំរុញដោយវិបត្តិជាប់គ្នាអស់រយៈពេលជិតពីរទសវត្សរ៍។ លោកបានសន្យាយ៉ាងម៉ឺងម៉ាត់ថានឹងពង្រឹងសេដ្ឋកិច្ច និងកម្លាំងយោធាឲ្យកាន់តែខ្លាំងក្លា ដើម្បីទប់ទល់នឹងពិភពលោកដែលងាយនឹងប្រែប្រួល និងគ្រោះថ្នាក់។

កាលពីថ្ងៃអង្គារ ប្រធានាធិបតីអាមេរិកលោក ដូណាល់ ត្រាំ បានប្រកាសបទឈប់បាញ់រយៈពេល២សប្តាហ៍ក្នុងជម្លោះអ៊ីរ៉ង់ ដែលបានអូសបន្លាយពេលប្រាំមួយសប្តាហ៍។ ទោះជាយ៉ាងណា មិនទាន់មានសញ្ញាណាមួយបង្ហាញថា ទីក្រុងតេហេរ៉ង់នឹងលុបចោលការបិទច្រកសមុទ្រ Hormuz ស្ទើរតែទាំងស្រុងនោះទេ ដែលបានបណ្តាលឲ្យមានការរំខានដល់ការផ្គត់ផ្គង់ថាមពលដ៏អាក្រក់បំផុតក្នុងប្រវត្តិសាស្ត្រ។

លោក Starmer បានពន្យល់ថា វិបត្តិនេះបានជំរុញឲ្យតម្លៃប្រេងឥន្ធនៈនៅអង់គ្លេសកើនឡើងរួចហើយ ហើយត្រូវបានគេរំពឹងថានឹងជំរុញឲ្យមានអតិផរណា និងការរំខានសេដ្ឋកិច្ចបន្ថែមទៀត។ លោកបានគូសបញ្ចាក់ថា៖ «សង្គ្រាមនៅអ៊ីរ៉ង់ឥឡូវនេះបានក្លាយជាខ្សែបន្ទាត់ក្រហមមួយ ពីព្រោះរបៀបដែលយើងចេញពីវិបត្តិនេះនឹងកំណត់យើងទាំងអស់គ្នាសម្រាប់មួយជំនាន់។»

នាយករដ្ឋមន្ត្រីអង់គ្លេសបានសរសេរនៅក្នុងកាសែត The Guardian ថា៖ «ចក្រភពអង់គ្លេសត្រូវបានវាយប្រហារដោយវិបត្តិអស់រយៈពេលជិតពីរទសវត្សរ៍មកហើយ» ដោយលើកឡើងពីវិបត្តិហិរញ្ញវត្ថុពិភពលោកឆ្នាំ២០០៨ វា Brexit ជំងឺរាតត្បាតកូវីដ-១៩ និងការឈ្លានពានរបស់រុស្ស៊ីលើអ៊ុយក្រែន។

លោកបានបន្តថា៖ «ជំនួសឲ្យក្តីសង្ឃឹមក្នុងការវិលត្រឡប់ទៅកាន់ពិភពលោកឆ្នាំ២០០៨ យើងនឹងបង្កើតផ្លូវថ្មីមួយសម្រាប់អង់គ្លេស ពោលគឺផ្លូវមួយដែលពង្រឹងថាមពល ការពារជាតិ និងសន្តិសុខសេដ្ឋកិច្ចរបស់យើងនៅក្នុងយុគសម័យថ្មីមួយ។»