By ខេត្តកំពង់ស្ពឺ – ក្រោមការដឹកនាំផ្ទាល់ពីលោកឧត្តមសេនីយ៍ទោ ឃឹម សុខខៃ ស្នងការនគរបាលខេត្តកំពង់ស្ពឺ និងលោកវរសេនីយ៍ទោ យ័ន្ត សង្ហា អធិការនគរបាលក្រុងច្បារមន កម្លាំងនគរបាលបានធ្វើប្រតិបត្តិការឃាត់ខ្លួនក្មេងទំនើងម្នាក់ដែលពាក់ព័ន្ធនឹងករណីបង្ហោះម៉ូតូ។
ព្រឹត្តិការណ៍នេះកើតឡើងនៅថ្ងៃទី១២ មេសា ២០២៦ វេលាម៉ោង ០៩:៣០នាទី នៅពេលដែលកម្លាំងផ្នែកយុត្តិធម៌សហការជាមួយប៉ុស្តិ៍នគរបាលសង្កាត់រកាធំ បានធ្វើការឃាត់ខ្លួនយុវជនឈ្មោះ ភិន ស៊ីងថុង អាយុ២១ឆ្នាំ ដែលរស់នៅភូមិទួលសំណាង ឃុំវល្លិ៍.ស ស្រុកសំរោងទង។
យុវជនខាងលើធ្វើការជាកម្មកររោងចក្រ តែត្រូវបានចោទប្រកាន់ពីបទបង្ហោះម៉ូតូ បន្ទាប់ពីមានវីដេអូថតបានរួចបង្ហោះតាមហ្វេសប៊ុក។ ក្រោយពីធ្វើការសាកសួរ គាត់បានទទួលស្គាល់ថា ពិតជាបានធ្វើសកម្មភាពបង្ហោះម៉ូតូម៉ាកហុងដា ឌ្រីម សេ១២៥ ពណ៌ខ្មៅ សេរីឆ្នាំ២០២៥ ពាក់ស្លាកលេខ កំពង់ស្ពឺ ១z-៨២១៤។
ព្រឹត្តិការណ៍នេះបានកើតឡើងនៅតាមដងផ្លូវជាតិលេខ០៤ ក្នុងភូមិស្នោទី១ សង្កាត់រកាធំ ក្រុងច្បារមន កាលពីថ្ងៃទី១០ មេសា ២០២៦ វេលាម៉ោង១១:៣០នាទី។
បន្ទាប់ពីធ្វើការសាកសួរ នគរបាលក្រុងច្បារមនបានហៅអាណាព្យាបាលមកទទួលដឹងឮ និងផ្តល់ការអប់រំ រួចធានាយកកូនត្រឡប់ទៅលំនៅឋានវិញ។ ចំណែកម៉ូតូត្រូវបាននគរបាលរក្សាទុកនៅអធិការដ្ឋានរយៈពេល៣ខែសម្រាប់ការស៊ើបអង្កេតបន្ថែម។
ការឃាត់ខ្លួននេះបង្ហាញពីការតាមដានយ៉ាងតឹងរឹងរបស់អាជ្ញាធរចំពោះអំពើល្មើសចរាចរណ៍ ជាពិសេសសកម្មភាពបង្ហោះម៉ូតូដែលអាចបង្កគ្រោះថ្នាក់ដល់សុវត្ថិភាពសាធារណៈ។
ដោយ៖ សូរិយា
