By ខេត្តកំពង់ស្ពឺ – បុរសម្នាក់ដែលមានអាកប្បកិរិយាចិត្តឆ្កួត បានកាន់កាំបិតផ្គាក់គំរាមសម្លាប់អ្នកភូមិ និងយកដុំថ្មគប់ទៅលើរថយន្តរបស់អ្នកដទៃ ត្រូវបានកម្លាំងនគរបាលស្រុកសំរោងទងឃាត់ខ្លួនបង្កើតសំណុំរឿងយ៉ាងរហ័ស។
នគរបាលស្រុកសំរោងទងបានឱ្យដឹងថា នៅថ្ងៃទី១០ ខែមេសា ឆ្នាំ២០២៦ មានឈ្មោះ ទ្រី គឹមហួ អាយុ៤៧ឆ្នាំ រស់នៅភូមិស្វាយតាវង ឃុំសែនដី បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលឃុំសែនដីទៅលើឈ្មោះ ដន សិលា អាយុ៣៧ឆ្នាំ ដោយអះអាងថា នៅម៉ោង៥:៣០ល្ងាច ជនសង្ស័យបានដើរមកកាន់កាំបិតផ្គាក់ ជេរប្រមាថ និងគំរាមកាប់សម្លាប់ខ្លួនដោយគ្មានមូលហេតុ។
ក្រោយពីគំរាមសម្លាប់ ជនសង្ស័យបានយកដុំថ្មគប់ទៅលើរថយន្តម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ កណ្តាល2A. 3732 ជាកម្មសិទ្ធិរបស់ឈ្មោះ រស់ តារាវឹង អាយុ៤០ឆ្នាំ ដែលរស់នៅក្នុងភូមិជាមួយគ្នា ប៉ុន្តែមិនបណ្ដាលឱ្យខូចខាតធ្ងន់ធ្ងរនោះទេ។
នៅម៉ោង៨យប់ដដែល កម្លាំងព្រហ្មទណ្ឌស្រុកសំរោងទងបានសហការជាមួយកម្លាំងប៉ុស្តិ៍នគរបាលរដ្ឋបាលសែនដី ឃាត់ខ្លួនជនសង្ស័យ ដន សិលា មកសាកសួរ។ ជនសង្ស័យបានសារភាពទទួលស្គាល់ទាំងស្រុងថា ខ្លួនពិតជាបានកាន់កាំបិតផ្គាក់គំរាមសម្លាប់ និងគប់រថយន្តពិតប្រាកដមែន។ នគរបាលបានដកហូតបានវត្ថុតាងកាំបិតផ្គាក់០១ដើម។
បច្ចុប្បន្ន ជនសង្ស័យរួមជាមួយនឹងវត្ថុតាងត្រូវបានឃាត់ខ្លួននៅអធិការដ្ឋាននគរបាលស្រុកសំរោងទង ដើម្បីកសាងសំណុំរឿងចាត់ការបន្តតាមផ្លូវច្បាប់។ នគរបាលបានអំពាវនាវឱ្យប្រជាពលរដ្ឋរួមគ្នាថែរក្សាសន្តិសុខសង្គម និងរាយការណ៍ភ្លាមទៅកាន់អាជ្ញាធរមានសមត្ថកិច្ចនៅពេលមានហានិភ័យ។
