By ភ្នំពេញ៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលរាជធានីភ្នំពេញបានរៀបចំរថយន្តក្រុងចំនួន៦០០គ្រឿង ដើម្បីផ្តល់សេវាដឹកជញ្ជូនសាធារណៈដោយមិនគិតថ្លៃដល់បងប្អូនកម្មករនិយោជិត និងប្រជាពលរដ្ឋធ្វើដំណើរទៅលេងស្រុកកំណើត។
សេវានេះដំណើរការចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦ ដោយអនុវត្តតាមអនុសាសន៍ខ្ពង់ខ្ពស់របស់សម្តេចហ៊ុន ម៉ាណែត នាយករដ្ឋមន្ត្រី។ កាលពីព្រឹកថ្ងៃអាទិត្យ ទី១២ ខែមេសា ឯកឧត្តមហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងឯកឧត្តមឃួង ស្រេង អភិបាលរាជធានីភ្នំពេញ បានអញ្ជើញជូនដំណើរបងប្អូននៅទីលានប្រជាធិបតេយ្យ ខណ្ឌឫស្សីកែវ។
បងប្អូនកម្មករនិយោជិត និងប្រជាពលរដ្ឋបានសម្តែងក្តីសប្បាយរីករាយ និងថ្លែងអំណរគុណជ្រាលជ្រៅចំពោះរដ្ឋបាលរាជធានី ដែលបានជួយដោះស្រាយការលំបាកក្នុងការធ្វើដំណើរក្នុងពេលថ្លៃធ្វើដំណើរឡើងខ្ពស់ដោយសារវិបត្តិប្រេងឥន្ធន។
ឯកឧត្តមរដ្ឋមន្ត្រី និងឯកឧត្តមអភិបាលរាជធានីភ្នំពេញ បានជូនពរដល់បងប្អូនទាំងអស់ឱ្យធ្វើដំណើរប្រកបដោយសុខសុវត្ថិភាព ទាំងពេលទៅលេងស្រុកកំណើត ជួបជុំគ្រួសារ និងពេលត្រឡប់មកភ្នំពេញវិញ។
សេវាដឹកជញ្ជូនឥតគិតថ្លៃនេះជួយសម្រួលដល់ការចំណាយរបស់ប្រជាពលរដ្ឋ ដែលចង់ទៅលេងស្រុកកំណើត ជួបជុំគ្រួសារ និងទៅកម្សាន្តសប្បាយសង្ក្រាន្តឆ្នាំថ្មីនៅតាមខេត្តនានា។
