អ៊ីរ៉ង់ដាក់លក្ខខណ្ឌថ្នាំងថ្នាក់ ទាមទារបទឈប់បាញ់លីបង់ និងលែងទ្រព្យសម្បត្តិមុនចរចាជាមួយអាមេរិក

ប្រធានសភាអ៊ីរ៉ង់ លោក Mohammad Bagher Qalibaf បានប្រកាសយ៉ាងច្បាស់ថា នឹងមិនមានការចរចាជាមួយសហរដ្ឋអាមេរិកឡើយ លុះត្រាតែមានការអនុវត្តបទឈប់បាញ់នៅលីបង់ និងការលែងទណ្ឌកម្មលើទ្រព្យសម្បត្តិអ៊ីរ៉ង់ដែលត្រូវបានបង្កកនៅបរទេស។

លោក Qalibaf បានសរសេរលើបណ្តាញសង្គម X ថា៖ «វិធានការពីរដែលបានព្រមព្រៀងគ្នារវាងភាគីទាំងពីរ នៅមិនទាន់ត្រូវបានអនុវត្តនៅឡើយទេ។ បញ្ហាទាំងពីរនេះត្រូវតែបំពេញមុនពេលការចរចាចាប់ផ្តើម»។

បទឈប់បាញ់ដ៏ផុយស្រួយរវាងសហរដ្ឋអាមេរិកនិងអ៊ីរ៉ង់ ត្រូវបានធ្វើឡើងនៅថ្ងៃអង្គារ ដោយផ្អាកសកម្មភាពយោធាទាំងអស់ចាប់តាំងពីថ្ងៃចាប់ផ្តើមសង្រ្គាមរបស់សហរដ្ឋអាមេរិកនិងអ៊ីស្រាអែលរួមគ្នា។ បន្ទាប់មកអ៊ីរ៉ង់បានបិទច្រកសមុទ្រហ័រមូស និងសងសឹកសម្ព័ន្ធមិត្តអាមេរិកនៅទូទាំងឈូងសមុទ្រពែរ្ស។

ទាំងសហរដ្ឋអាមេរិកនិងអ៊ីរ៉ង់ចោទប្រកាន់គ្នាទៅវិញទៅមកថាមិនគោរពតាមកិច្ចព្រមព្រៀងឈប់បាញ់។ រដ្ឋបាលលោកដូណាល់ត្រាំបានបដិសេធពីការអះអាងរបស់អ៊ីរ៉ង់ថាកិច្ចព្រមព្រៀងនេះអនុវត្តចំពោះប្រទេសលីបង់។

លោក Qalibaf ធ្លាប់បានចោទប្រកាន់សហរដ្ឋអាមេរិកថារំលោភលើប្រការបីចំណុចនៃសំណើទាំង១០របស់អ៊ីរ៉ង់។ មួយក្នុងចំណោមនោះរួមមានការវាយប្រហារលើប្រទេសលីបង់។ ពីរផ្សេងទៀតរួមមានដ្រូនរបស់អាមេរិកហោះរំលោភលើដែនអាកាសអ៊ីរ៉ង់និងការប៉ុនប៉ងរារាំងអ៊ីរ៉ង់ពីការបង្កើនសារធាតុអ៊ុយរ៉ាញ៉ូម។

លោក Qalibaf សរសេរលើបណ្តាញសង្គម X កាលពីថ្ងៃពុធថា៖ «ឥឡូវនេះ មូលដ្ឋានដែលអាចអនុវត្តសម្រាប់ការចរចាត្រូវបានរំលោភបំពានដោយបើកចំហនិងច្បាស់ៗ សូម្បីតែមុនពេលការចរចាចាប់ផ្តើមក៏ដោយ។ ក្នុងស្ថានភាពបែបនេះ បទឈប់បាញ់ទ្វេភាគីឬការចរចាគឺមិនសមហេតុផលទេ»។

ការលើកឡើងរបស់លោកជាការឆ្លើយតបទៅអ្នកនាំពាក្យសេតវិមាន លោកស្រី Karoline Leavitt និយាយពីផែនការ១០ចំណុច។