សម្ដេចធិបតី ហ៊ុន ម៉ាណែត បញ្ជាក់ពីយុទ្ធសាស្ត្រប្រែក្លាយដីស្រូវទៅជាឧស្សាហកម្ម បង្កើនចំណូលជាតិរាប់ពាន់លានដុល្លារ

ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានឆ្លើយតបចំពោះការបកស្រាយខុសគំនិតរបស់អ្នកខ្លះដែលយកប្រសាសន៍របស់សម្ដេចទៅលេងសើច ក្នុងការលើកឡើងពីការប្រែក្លាយដីដាំស្រូវទៅជាឧស្សាហកម្ម។

ក្នុងឱកាសអញ្ជើញជាអធិបតីភាពពិធីបើកការដ្ឋានសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ នៅខេត្តតាកែវ នៅថ្ងៃទី១១ មេសា ២០២៦ សម្ដេចធិបតីបានបញ្ជាក់យ៉ាងច្បាស់ពីយុទ្ធសាស្ត្រអភិវឌ្ឍន៍សេដ្ឋកិច្ច។

“កម្ពុជាយើងមានសន្តិសុខស្បៀងខ្ពស់ រហូតដល់អាចនាំចេញស្រូវ-អង្ករទៅក្រៅប្រទេសរាប់លានតោនក្នុងមួយឆ្នាំៗ” សម្ដេចធិបតីបានថ្លែង។ “ក្នុងប្រទេសយើងប្រើអស់តែ៥-៦លានតោន ខណៈផលិតបាន១៤លានតោនសម្រាប់នាំចេញ។”

សម្ដេចធិបតីបានពន្យល់បន្ថែមថា៖ “ដូច្នេះយើងមិនចាំបាច់ប្រើផ្ទៃដីដូចរាល់ឆ្នាំដើម្បីផលិតស្រូវសម្រាប់នាំចេញទេ។ យើងអាចកាត់បន្ថយផ្ទៃដីស្រូវ និងប្រែក្លាយទៅជាការដាំដំណាំផ្សេងៗដែលមានចំណូលខ្ពស់ ឬធ្វើឧស្សាហកម្ម។”

សម្ដេចធិបតីបានសង្កត់ធ្ងន់ពីអត្ថប្រយោជន៍នៃការប្រែក្លាយដីពីធ្វើចម្ការទៅជាឧស្សាហកម្ម៖ “ការបង្កើតរោងចក្រ និងឧស្សាហកម្មនឹងបង្កើតការងាររាប់ម៉ឺនកន្លែង និងបង្កើនចំណូលជូនជាតិរាប់ពាន់លានដុល្លារ។ ការបង្កើតការងារ និងឧស្សាហកម្មនេះហើយ ដែលជំរុញឱ្យជាតិយើងអភិវឌ្ឍរីកចម្រើនកាន់តែខ្លាំង។”

ដោយ៖ សិលា