By ព្រះសីហនុ៖ កម្លាំងអាវុធហត្ថខេត្តព្រះសីហនុបានបញ្ជូនជនបរទេសចំនួន ៤៩នាក់ ដែលត្រូវបង្ក្រាបពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ទៅកាន់ទីស្នាក់ការត្រៀមបណ្តេញចេញ បន្ទាប់ពីប្រតិបត្តិការបង្ក្រាបដ៏ម៉ឺងម៉ាត់។
ប្រតិបត្តិការនេះត្រូវបានអនុវត្តនៅថ្ងៃទី៩ ខែមេសា ឆ្នាំ២០២៦ ក្រោមការដឹកនាំផ្ទាល់របស់លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ និងលោកវរសេនីយ៍ឯក សុង កុសល មេបញ្ជាការរងមន្ទីរស្រាវជ្រាវព័ត៌មានសន្តិសុខ។
ក្រុមជនសង្ស័យទាំង ៤៩នាក់នេះត្រូវបានឃាត់ខ្លួននៅអគារស្នាក់នៅមួយកន្លែង ក្នុងសង្កាត់លេខ៤ ក្រុងព្រះសីហនុ។ ក្នុងចំណោមជនសង្ស័យមានស្រីម្នាក់ និងប្រុស ៤៨នាក់។
ជនសង្ស័យទាំងនេះមានសញ្ជាតិផ្សេងៗគ្នា៖ ឥណ្ឌា ៣នាក់ (ស្រី១នាក់) នេប៉ាល់ ៥នាក់ ប៉ាគីស្ដាន ២៣នាក់ និងបង់ក្លាដេស ១៨នាក់។
ក្នុងប្រតិបត្តិការនេះ កម្លាំងអាវុធហត្ថបានដកហូតវត្ថុតាងជាច្រើន រួមមានកំព្យូទ័រលើតុ ៧៥គ្រឿង កំព្យូទ័រយួរដៃ ៥គ្រឿង និងទូរសព្ទដៃ ៤៣៥គ្រឿង។
រហូតដល់ថ្ងៃទី១១ ខែមេសា ឆ្នាំ២០២៦ ជនសង្ស័យទាំងអស់ត្រូវបានបញ្ជូនទៅកាន់ទីស្នាក់ការត្រៀមបណ្តេញចេញខេត្តព្រះសីហនុ ដើម្បីអនុវត្តនីតិវិធីបណ្តេញចេញពីប្រទេសកម្ពុជា។
ប្រតិបត្តិការនេះបានទទួលការដឹកនាំពីលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងលោក ម៉ាង ស៊ីណេត អភិបាលខេត្តព្រះសីហនុ។
ដោយ៖ សូរិយា
