ជំនាញចុះបង្ក្រាបទីតាំងឆបោកអនឡាញ ឃាត់ជនបរទេស ៣១១ នាក់ នៅសណ្ឋាគារប្រណីតភ្នំពេញ

ភ្នំពេញ៖ កម្លាំងជំនាញរបស់គណៈបញ្ជាការឯកភាពរាជធានីភ្នំពេញ បានចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scams) នៅសណ្ឋាគារ Wyndham Grand Phnompenh Capital កាលពីថ្ងៃទី១២ មេសា ឆ្នាំ២០២៦។

ក្នុងប្រតិបត្តិការនេះ កម្លាំងសមត្ថកិច្ចបានឃាត់ខ្លួនជនបរទេសសរុបចំនួន ៣១១ នាក់ ដែលមាន៥សញ្ជាតិ៖ ចិន ២៥៤ នាក់ (ក្នុងនោះតៃវ៉ាន់ ១៨២ នាក់) ម៉ាឡេស៊ី ៣០ នាក់ វៀតណាម ២៣ នាក់ និងឥណ្ឌា ២ នាក់។ ក្នុងចំណោមនេះមាន១៤៤នាក់គ្មានលិខិតឆ្លងដែន។

សម្ភារៈវត្ថុតាងដែលដកហូតបានរួមមាន៖ ទូរស័ព្ទដៃ ៦១៥ គ្រឿង កុំព្យូទ័រយួរដៃ ១៤០ គ្រឿង កុំព្យូទ័រ All in One ៣១ គ្រឿង ម៉ូនីទ័រ ៦ គ្រឿង និង CPU ៣ គ្រឿង។

យោងតាមការស៊ើបអង្កេតបឋម ទីតាំងនេះប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាជាច្រើនប្រភេទ រួមមាន៖ ឆបោកអូសទាញវិនិយោគ ឆបោកក្រោមរូបភាពក្រុមហ៊ុន Nanhua Singapore ឆបោកលើរូបិយប័ណ្ណឌីជីថល និងក្លែងបន្លំជាមន្រ្តីរដ្ឋាភិបាល។

បច្ចុប្បន្ន ជនបរទេសទាំង៣១១នាក់ រួមនឹងសម្ភារៈវត្ថុតាង ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីតាមច្បាប់។