ម៉ាឡេស៊ីចាប់កប៉ាល់ដឹកប្រេងខុសច្បាប់ ៧០០,០០០ លីត្រ និងជនជាតិចម្រុះ ២២ នាក់

ទីភ្នាក់ងារអនុវត្តច្បាប់សមុទ្រម៉ាឡេស៊ី (MMEA) បានបង្ហាញពីជោគជ័យក្នុងការចាប់កប៉ាល់ដឹកប្រេងចំនួន ២ គ្រឿង ដែលសង្ស័យថាកំពុងផ្ទេរប្រេងម៉ាស៊ូតចំនួន ៧០០,០០០ លីត្រដោយខុសច្បាប់។ ឧប្បត្តិហេតុនេះកើតឡើងនៅដែនទឹករដ្ឋប៉េណាង កាលពីចុងសប្តាហ៍កន្លងទៅ។

លោក Muhammad Suffi Mohd Ramli នាយក MMEA ប្រចាំរដ្ឋប៉េណាង បានបញ្ជាក់ថា ការចាប់ខ្លួននេះបានធ្វើឡើងបន្ទាប់ពីទទួលបានព័ត៌មានស៊ើបការណ៍សម្ងាត់អំពីសកម្មភាពសង្ស័យនៅក្បែរកោះ Bagan Ajam។ ការត្រួតពិនិត្យបានរកឃើញកប៉ាល់ទាំងពីរស្ថិតនៅជិតគ្នា និងកំពុងផ្ទេរប្រេងម៉ាស៊ូត Euro 5 ដោយគ្មានការអនុញ្ញាត។

តម្លៃប្រេងឥន្ធនៈសរុបដែលត្រូវបានរឹបអូសមានចំនួនប្រហែល ៨០០,០០០ លីត្រ ក្នុងតម្លៃប្រហែល ១,៣៧ លានដុល្លារ។ អាជ្ញាធរក៏បានចាប់ខ្លួនសមាជិកនាវិកចំនួន ២២ នាក់ដែលមានជាតិសាសន៍ចម្រុះ រួមមានជនជាតិម៉ាឡេស៊ី មីយ៉ាន់ម៉ា រុស្ស៊ី ហ្វីលីពីន និងឥណ្ឌូណេស៊ី។

ការចាប់ខ្លួននេះកើតឡើងក្នុងពេលដែលម៉ាឡេស៊ីកំពុងបង្កើនការត្រួតពិនិត្យលើសកម្មភាពគេចពន្ធប្រេងឥន្ធនៈ ដោយសារកង្វះខាត និងការរំខាននៃការផ្គត់ផ្គង់ប្រេងក្នុងតំបន់អាស៊ីអាគ្នេយ៍។

ដែនទឹកម៉ាឡេស៊ីត្រូវបានគេស្គាល់ថាជាតំបន់ដែលមានសកម្មភាពផ្ទេរប្រេងខុសច្បាប់ញឹកញាប់។ អាជ្ញាធរម៉ាឡេស៊ីបានសន្យាកាលពីឆ្នាំមុនថា នឹងអនុវត្តច្បាប់ដោយមានភាពតឹងរ៉ឹងជាងមុនទៅលើសកម្មភាពប្រឆាំងច្បាប់ទាំងនេះ។