By រោងឆ្អើរត្រីមួយកន្លែងនៅខេត្តកំពង់ឆ្នាំង ត្រូវបានអគ្គិភ័យឆាបឆេះយ៉ាងធ្ងន់ធ្ងរ ដោយសារការធ្វេសប្រហែសរបស់ម្ចាស់រោងក្នុងការបង្កាត់ភ្លើងឆ្អើរត្រី។
ហេតុការណ៍នេះកើតឡើងនៅវេលាម៉ោង ៩:៣០នាទីព្រឹក ថ្ងៃទី១២ ខែមេសា ឆ្នាំ២០២៦ នៅក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង។ ម្ចាស់រោងឈ្មោះ ឯក សុធា អាយុ៤៣ឆ្នាំ បានបង្កាត់ភ្លើងឆ្អើរត្រីដូចសព្វដង ប៉ុន្តែមានការធ្វេសប្រហែសខ្លះៗ បណ្ដាលឱ្យអណ្ដាតភ្លើងឆាបឆេះរោងត្រីទាំងមូល។
ក្នុងហេតុការណ៍នេះ បណ្ដាលឱ្យខូចរោងឆ្អើរត្រីចំនួន១ខ្នង ទំហំទទឹង៤ម៉ែត្រ បណ្ដោយ១៥ម៉ែត្រ។ ត្រីឆ្អើរចំនួន៣០០ចង្កាក់ រទេះចំនួន២គ្រឿង និងសម្ភារៈឆ្អើរត្រីជាច្រើនត្រូវឆេះខ្ទេចទាំងស្រុង។
កងកម្លាំងនគរបាលបានប្រើប្រាស់ឡានទឹកចំនួន៣គ្រឿង និងទឹកចំនួន៣ឡាន ទើបអាចគ្រប់គ្រងស្ថានការណ៍បាន។ សំណាងល្អ ហេតុការណ៍នេះមិនបានរាលដាលទៅលំនៅឋានអ្នកភូមិជិតខាង និងមិនមានអ្នករងរបួសឡើយ។
សមត្ថកិច្ចបានផ្ដល់ការព្រមានដល់ប្រជាពលរដ្ឋឱ្យប្រុងប្រយ័ត្នក្នុងការប្រើប្រាស់ភ្លើង ជាពិសេសនៅកន្លែងដែលមានសម្ភារៈងាយឆេះ ដើម្បីជៀសវាងគ្រោះថ្នាក់ស្រដៀងគ្នា។
អត្ថបទសរសេរដោយ ពៅ សុខហ៊ាន កែសម្រួលដោយ ស្រីណា
