By ខេត្តកំពង់ស្ពឺ៖ ករណីដុតសំរាមដែលបណ្តាលឱ្យឆេះផ្ទះស្តុកអីវ៉ាន់របស់ប្រជាពលរដ្ឋម្នាក់ បានកើតឡើងនៅថ្ងៃទី១២ ខែមេសា ឆ្នាំ២០២៦ នៅភូមិពាណិជ្ជកម្ម សង្កាត់រការធំ ក្រុងច្បារមន។
នគរបាលក្រុងច្បារមនបានឱ្យដឹងថា ផ្ទះស្តុកអីវ៉ាន់ធ្វើអំពីថ្មទំហំ១៥ម៉ែត្រ គុណនឹង២២ម៉ែត្រ របស់អ្នកស្រីស៊ីវ សុផល (អាយុ៥២ឆ្នាំ) និងប្រពន្ធឈ្មោះស៊ុន សាលី (អាយុ៤៧ឆ្នាំ) ត្រូវបានអគ្គិភ័យឆេះស្ទើរតែទាំងស្រុង។
មូលហេតុនៃអគ្គិភ័យនេះមកពីម្ចាស់ផ្ទះបានដុតសំរាមក្បែរគុម្ភឬស្សីក្រោយផ្ទះ ហើយរងើកភ្លើងបានឆេះរាលដាលចូលទៅក្នុងផ្ទះ បណ្តាលឱ្យក្លាយជាអណ្តាតភ្លើងធំ។
សមត្ថកិច្ចបានអន្តរាគមន៍យ៉ាងរហ័សដោយប្រើរថយន្តពន្លត់អគ្គិភ័យចំនួន៦គ្រឿង ពីស្នងការដ្ឋាននគរបាលខេត្តកំពង់ស្ពឺ អធិការដ្ឋាននគរបាលក្រុងច្បារមន អធិការដ្ឋាននគរបាលស្រុកសំរោងទង កងរាជអាវុធហត្ថខេត្តកំពង់ស្ពឺ និងរថយន្តពន្លត់អគ្គិភ័យឯកជន។
កម្លាំងសរុបចំនួន៦៧នាក់ រួមមានកម្លាំងតបន់ប្រតិបត្តិការសឹករងកំពង់ស្ពឺ៣៤នាក់ នគរបាល២០នាក់ និងកងរាជអាវុធហត្ថ១៣នាក់ បានចូលរួមប្រតិបត្តិការពន្លត់អគ្គិភ័យ។
ជាសំណាងល្អ ករណីអគ្គិភ័យនេះមិនបណ្តាលឱ្យមានគ្រោះថ្នាក់ដល់មនុស្ស ឬសត្វឡើយ ប៉ុន្តែបានបណ្តាលឱ្យខូចខាតទ្រព្យសម្បត្តិយ៉ាងធ្ងន់ធ្ងរ រួមមានគ្រឿងអគ្គិសនី និងអីវ៉ាន់ផ្សេងៗដែលស្តុកទុកនៅក្នុងផ្ទះ។
នគរបាលបានផ្តល់ការព្រមានដល់ប្រជាពលរដ្ឋឱ្យប្រុងប្រយ័ត្នក្នុងការដុតសំរាម ជាពិសេសនៅក្នុងរដូវក្តៅ ដើម្បីជៀសវាងគ្រោះថ្នាក់អគ្គិភ័យដែលអាចកើតឡើងដោយមិនបានរំពឹងទុក។
