By ភ្នំពេញ៖ ព្រលានយន្តហោះពោធិ៍ចិនតុង ដែលជាអាកាសយានដ្ឋានអន្តរជាតិភ្នំពេញ (ចាស់) បានបើកដំណើរការសាកល្បងជាសួនសាធារណៈរយៈពេល ៩ ថ្ងៃ (១១-១៩ មេសា ២០២៦) ដើម្បីទាក់ទាញប្រជាពលរដ្ឋចូលលេងកម្សាន្តនាឱកាសបុណ្យចូលឆ្នាំថ្មីប្រពៃណីជាតិខ្មែរ។
ថ្ងៃទី១ នៃការបើកដំណើរការសាកល្បង មានប្រជាពលរដ្ឋយ៉ាងច្រើនកុះករប្រមាណ ១៥,០០០ នាក់ បានចូលទស្សនា កម្សាន្ត ថតរូប ហាត់ប្រាណ និងលេងកីឡាជុំវិញតំបន់ និងអគារជាច្រើន។
ក្នុងនោះរួមមាន អគារផ្លិត និងប៉មបញ្ជាហោះហើរ (Tower) ដែលត្រូវបានកសាងឡើងនៅអំឡុងទសវត្សរ៍ឆ្នាំ១៩៥០, តំបន់ជុំវិញបរិវេណអគារចេញ-ចូលអ្នកដំណើរវីអាយភី (VIP), ចំណតយន្តហោះស៊ីវិល និងតំបន់ផ្លូវរត់របស់យន្តហោះ (Runway) ជាដើម។
ទីតាំងទាំងនេះសុទ្ធសឹងតែជាតំបន់ និងទីតាំងប្រវត្តិសាស្ត្រនៃវិស័យអាកាសចរស៊ីវិលកម្ពុជា ដែលជាកន្លែងដ៏សំខាន់សម្រាប់ស្វែងយល់ពីអត្តសញ្ញាណវប្បធម៌ និងប្រវត្តិសាស្ត្រជាតិ។
បន្ថែមលើនេះ ប្រជាពលរដ្ឋក៏បានទស្សនាការសម្ដែងរបាំត្រុដិ របាំឆៃយ៉ាំ ការលេងភ្លេងពិណពាទ្យ និងរបាំផ្សេងៗ ដើម្បីស្វែងយល់ពីគុណតម្លៃនៃរបាំប្រពៃណីវប្បធម៌ជាតិខ្មែរ។
ការបើកដំណើរការសាកល្បងនេះ បង្ហាញពីការរីកចម្រើននៃការអភិវឌ្ឍន៍ទេសចរណ៍ក្នុងប្រទេសកម្ពុជា និងជាឱកាសល្អសម្រាប់ពលរដ្ឋកម្ពុជាទាំងអស់ក្នុងការស្គាល់ពីបេតិកភណ្ឌប្រវត្តិសាស្ត្រជាតិ។
ព្រលានយន្តហោះពោធិ៍ចិនតុង ដែលធ្លាប់ជាអាកាសយានដ្ឋានអន្តរជាតិភ្នំពេញចាស់ ឥឡូវត្រូវបានរៀបចំជាសួនសាធារណៈសម្រាប់ការកម្សាន្ត និងសិក្សាស្វែងយល់ពីប្រវត្តិសាស្ត្រអាកាសចរកម្ពុជា។
ការចូលទស្សនាគឺឥតគិតថ្លៃសម្រាប់ប្រជាពលរដ្ឋទាំងអស់ ហើយនឹងបន្តរហូតដល់ថ្ងៃទី១៩ មេសា ២០២៦។
ដោយ៖ ជ្រោយពេជ្រ
ប្រភព៖ AKP
