By ខេត្តស្ទឹងត្រែង ៖ មានចម្ងាយពីទីរួមខេត្តប្រមាណជា២៨គីឡូម៉ែត្រ ស្ថិតលើកំណាត់ផ្លូវជាតិលេខ៧ត្រង់ចំណុចខ្លោងទ្វារវត្តអូរច្រឡង់ អបដោយរូបសំណាកដំរីធំៗមួយគូក៏ជាផ្លូវចូលទៅកាន់តំបន់អេកូទេសចរធម្មជាតិមានឈ្មោះថា សហគមន៍អេកូទេសចរណ៍ឃុំអូរឫស្សីកណ្ដាល ។
កាលដើមឡើយ តំបន់នោះគ្រាន់តែជាអូរមួយខ្សែដ៏វែងអន្លាយ មានព្រៃឈើដុះស្រោងអមតាមមាត់អូរជាមួយទឹកត្រជាក់ថ្លាពោរពេញដោយថាមពល ។ ដោយមើលឃើញពីសក្តានុពលវែងឆ្ងាយ តំបន់មួយនោះត្រូវបានគេបង្កើតឡើងជាសហគមន៍ ដើម្បីថែរក្សាជាប្រយោជន៍រួម ។
បន្ទាប់មក នៅក្នុងឆ្នាំ២០០៧ តំបន់នោះត្រូវបានបង្កើតឡើងទៅជាសហគមន៍អេកូទេសចរណ៍ធម្មជាតិ គ្រាហ៍នោះដោយមានការគាំទ្រលើកទឹកចិត្តពីអាជ្ញាធរមូលដ្ឋាន និងមន្ទីរទេសចរណ៍ខេត្ត ក៏បន្តរួមគំនិតក្នុងការកែលំអ ទីកន្លែងនោះឱ្យមានជាទីធ្លាសម្រាកកំសាន្តតាមបែបធម្មជាតិ ។
ក្រោយការខិតខំកែលំអតំបន់នោះម្ដងបន្តិចម្ដងៗ ក៏មានការចាប់អារម្មណ៍តៗគ្នារហូតតំបន់នោះបានក្លាយជាតំបន់អេកូទេសចរណ៍ដ៏ទាក់ទាញមួយនៅក្នុងខេត្តស្ទឹងត្រែង។ បើងាកទៅមើលតំបន់ទេសចរណ៍នានាក្នុងខេត្តស្ទឹងត្រែងឯទៀត តំបន់សហគមន៍អេកូទេសចរណ៍ឃុំអូប្ញស្សីកណ្ដាល អាចទទួលអ្នកទេសចរណ៍បានគ្រប់រដូវកាល ទាំងរដូវប្រាំងនិងរដូវវស្សា ។
បច្ចុប្បន្ន សហគមន៍អេកូទេសចរណ៍មួយនេះបានកែប្រែមុខមាត់គួរឲ្យទាក់ទាញមានទាំងផ្លូវបេតុងហ៊ុមព័ទ្ធបរិវេណទីធ្លា ម្ហូបអាហារប្រកបដោយគុណភាព និងតម្លៃសមរម្យ ទីកន្លែងពោរពេញដោយផាសុកភាពជាមួយខ្យល់បរិសុទ្ធ និងមានសន្តិសុខសណ្ដាប់ធ្នាប់គួរឱ្យទុកចិត្តបានបន្ទប់ទឹកអនាម័យក៏ស្អាតបាតផងដែរ ។
រដ្ឋមន្ត្រីក្រសួងទេសចរណ៍ លោកហួត ហាក់ ចូលទៅដល់សហគមន៍អេកូទេសចរណ៍អូរឫស្សីកណ្ដាលនេះបានមានប្រសាសន៍ថា សហគមន៍ទេសចរណ៍ជាច្រើន លោកបានទៅអស់ហើយ តែអ្វីដែលចាប់អារម្មណ៍ គឺសហគមន៍អេកូទេសចរណ៍ឃុំអូរឫស្សីកណ្ដាល ជាកន្លែងដែលស្រស់ស្អាតដាច់គេ សូម្បីតែសំរាមមួយស្ទើរនឹងគ្មានផង។
ពាក់ព័ន្ធទៅនឹងសក្តានុពលរបស់សហគមន៍អេកូទេសចរណ៍ឃុំអូរឫស្សីកណ្ដាល ដែលមានស្រាប់នោះក្តី ក៏មិនទាន់ធ្វើឲ្យតំបន់ទេសចរណ៍មួយនេះ ផ្គាប់តម្រូវការដល់អ្នកទេសចរគ្រប់គ្រាន់ឡើយ នោះគឺពាក់ព័ន្ធទៅនឹងភ្លើងអគ្គិសនី ។
លោក អ៊ួង កុសល អនុប្រធានសហគមន៍ព្រៃឈើអូរឬស្សីកណ្ដាលបានលើកឡើងថា ក្នុងរមណីយដ្ឋានរបស់យើងនេះ មានការទាក់ទាញអារម្មណ៍ពីភ្ញៀវទេសចរហើយ តែភាគច្រើនអ្នកទេសចរណ៍ដែលមកកម្សាន្តនៅទីនេះ ពួកគាត់បានសាកសួររកប្រព័ន្ធភ្លើងអគ្គិសនី ដូចជាតម្រូវការប្រើប្រាស់កង្ហារ ប្រើប្រាស់ភ្លើង ដើម្បីសាកថ្មទូរសព្ទ និងរបស់របរសម្ភារដែលត្រូវការភ្លើងអគ្គិសនីជាចាំបាច់។ លោកបន្តថា ភ្ញៀវពួកគាត់តែងតែនិយាយថា ចង់នៅលេងរហូតដល់យប់ទើបត្រឡប់ទៅវិញ តែដោយសារទីកន្លែងរបស់យើងម៉ោង៦យប់ឡើងគឺចាប់ផ្ដើមងងឹត ពួកគាត់មិនអាចនៅយូរបាន ។
លោក អ៊ួង កុសល ព្រមទាំងប្រធានសហគមន៍ និងសមាជិកបានសំណូមពរយ៉ាងទទូចដល់ថ្នាក់ដឹកនាំខេត្ត មេត្តាផ្ដល់លទ្ធភាពនិងជំរុញដល់សេវាករអគ្គិសនី មេត្តាពិនិត្យនិងពិចារណាបន្ថែមដើម្បីទម្លាក់ភ្លើងដល់សហគមន៍បានប្រើប្រាស់ បើគិតពីចម្ងាយពីផ្លូវជាតិលេខ៧ ចូលដល់សហគមន៍អេកូទេសចរណ៍នេះត្រឹមតែជាង១ពាន់ម៉ែត្រប៉ុណ្ណោះ ក៏មានគ្រួសារប្រជាពលរដ្ឋសហគមន៍ជាង៣០គ្រួសាររស់នៅផងដែរ ៕
