By រាជធានីភ្នំពេញ ៖ លោក ហ៊ុន ហេង ដែលបានបើករថយន្តបុករះពីក្រោយ បណ្តាលឲ្យមនុស្សស្លាប់និងរបួសជាច្រើននាក់ ត្រូវបានរៀបចំនីតិវិធីបញ្ជូនទៅតុលាការ នាព្រឹកថ្ងៃទី១៧ ឧសភា នេះហើយព្រមទាំអនុវត្តនៅបទពិន័យនគរបាលជាតិកម្ពុជាបណ្ដេញចេញពីក្របខណ្ឌផងដែរ ។ នេះបើឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។
ឯកឧត្តម ជួន ណារិន បានសរសេរលើបណ្តាញសង្គមមុននេះយ៉ាងដូច្នេះថា «ខ្ញុំបាទ សូមគោរពជូនមហាជនមេត្តាជូនជ្រាបថា ប៉ុន្មានថ្ងៃនេះ មានការជជែកវែកញែកច្រើន លើករណីគ្រោះថ្នាក់ចរាចរណ៌ កាលពីរសៀលថ្ងៃ ទី១៥ ០៥ ២៥ មុខក្រសួងមហាផ្ទៃ ធ្វើឲមានអ្នករបស់ធ្ងន់ស្រាលនិងបាត់បង់ជីវិត បង្ករឡើងដោយ នគរបាល រាជធានី ឈ្មោះ ហ៊ុន ហេង»។
ឯកឧត្តមថា សូមជំរាបជូនថា ភ្លាមៗខ្ញុំបាទបញ្ជាឲជំនាញ និងមូលដ្ឋាន ចុះដល់កន្កែងកើតហេតុគឺ ចាត់ចែង ឃាត់ខ្លួនអ្នកបង្កសង្គ្រោះ អ្នករបួស និងរៀចចំសណ្ដាប់ធ្នាប់ ។
សូមមហាជន ជ្រាបថា ច្បាប់គឺមិនបានបែកចែកវណ្ណៈនោះទេ គឺអនុវត្តន៌ដូចគ្នា ស្មើភាពគ្នា (ខ្ញុំមិនដែលលើកលែងទេ)។ ឯកឧត្តមបានគូសបញ្ជាក់ថា៖ «ពេលនេះ ឈ្មោះ ហ៊ុន ហេង បានរៀបចំនីតិវិធីបញ្ជូនទៅតុលាការនាព្រឹកនេះ ព្រមទាំអនុវត្តនៅបទពិន័យនគរបាលជាតិកម្ពុជាបណ្ដេញចេញពីក្របខ័ណផដែរង» ។
សូមជម្រាបថា ប្រធាការិយាល័យភស្តុភានៃស្នងការដ្ឋាននគរបាលរាជធានីភ្នំពេញ លោកវរៈសេនីយ៍ឯក ហ៊ុន ហេង បានបើកឡានបុករះពីក្រោយវេលាម៉ោង២រសៀល ថ្ងៃទី១៥ ខែឧសភា ឆ្នាំ២០២៥ ចំណុចស្តុបមុខក្រសួងមហាផ្ទៃ តាមបណ្តោយផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយជនបង្កបើករថយន្តយ៉ាងលឿនបុករះទៅលើម៉ូតូ កង់បី និងរថយន្ត បណ្ដាលឱ្យមានអ្នកស្លាប់ម្នាក់ភ្លាមៗ ។
តាមប្រភពព័ត៌មានដែលទទួលបាន ជនបង្កបានចេញពីផឹកស៊ីនៅសង្កាត់វាលស្បូវ ខណ្ឌច្បារអំពៅ ។ លោកវរសេនីយ៍ឯក ហ៊ុន ហេង ជាប្រធាការិយាល័យភស្តុភានៃស្នងការដ្ឋាននគរបាលរាជធានីភ្នំពេញបានបើកបុក បណ្ដាលឲ្យជនរងគ្រោះម្នាក់ស្លាប់ក្នុងថ្លុកឈាម ក្នុងចំណោមជនរងគ្រោះច្រើននាក់ដែលរងរបួស។
ចំណែកជនរងគ្រោះដែលស្លាប់មានឈ្មោះ រៀន សុនឿន ភេទប្រុស មានអាយុ៤៩ឆ្នាំ ស្នាក់នៅសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ ក្នុងករណីបុករះនេះ ក៏បណ្ដាលឲ្យខូចខាតម៉ូតូ១គ្រឿង កង់បីឥណ្ឌា ២គ្រឿង និង រថយន្តព្រុស១គ្រឿងផងដែរ ខណៈអ្នកបើករថយន្ដបង្កត្រូវបានកម្លាំងនគរបាលឃាត់ខ្លួនបានភ្លាមៗក្រោយបង្កហេតុ។
តាមប្រភពព័ត៌មានពីប្រជាពលរដ្ឋបានឱ្យដឹងថា ៖ មុនកើតហេតុគេឃើញ នាយនគរបាលរូបនោះ បើករថយន្តម៉ាក ឡិចស៊ីស 400h ពណ៌ទឹកមាស ពាក់ស្លាកលេខ ភ្នំពេញ 2AQ-2188 បើកបរចុះពីលើស្ពានអាកាសក្បាលថ្នល់ ទិសដៅសំដៅទៅវិមានឯករាជ្យ។ ខណៈបើករថយន្តចុះពីលើស្ពានបានបន្តិច រថយន្តបានរេចង្កូតទៅបុករះម៉ូតូ១គ្រឿង រថយន្តព្រុស និងកង់បីឥណ្ឌា២គ្រឿងទៀត ធ្វើអោយបុរសជាអ្នកបើកម៉ូតូកង់បីឥណ្ឌាម្នាក់ស្លាប់ភ្លាមៗ ហើយរថយន្ដបង្កក៏បន្តទៅបុកបង្គោលដែក និងដើមឈើ១ដើមទៀត ទើបធ្វើឲ្យរថយន្តទៅមុខលែងរួច។
ក្រោយពីបង្កហេតុភ្លាមៗ អ្នកបើករថយន្ដបង្កមិនបានគេចខ្លួនទៅណានោះទេ និងត្រូវបានកម្លាំងសមត្ថកិច្ចមូលដ្ឋានចុះដល់កន្លែងកើតហេតុ ឃាត់ខ្លួនយកទៅកាន់អធិការដ្ឋាននគរបាលខណ្ឌចំការមន ដើម្បីសាកសួរបន្ថែម និងចាត់តាមនីតិវិធី។ ចំណែកឯសពជនរងគ្រោះ ត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕
