By ទីក្រុងវ៉ាស៊ីនតោន៖ បន្ទាប់ពីលោកពូទីនមិនបានចូលរួមចរចាគ្នាដោយផ្ទាល់រវាងរុស្ស៊ី និងអ៊ុយក្រែន លោកត្រាំប្រកាសថាលោកកំពុងរៀបចំខ្លួនដើម្បីនិយាយគ្នាដោយផ្ទាល់ជាមួយលោកពូទីននៅពេលឆាប់ៗនេះ។ លោកថានេះជាពេលដែលយើងត្រូវតែធ្វើកិច្ចការនេះ (ជជែកគ្នាដោយផ្ទាល់)។ លោកថ្លែងដូច្នេះបន្ទាប់ពីបិទបញ្ចប់ទស្សនកិច្ចបួនថ្ងៃនៅមជ្ឈិមបូព៌ា។
ក្រោយមក លោកត្រាំថ្លែងប្រាប់អ្នកសារព័ត៌មាននៅពេលឡើងយន្តហោះថាលោកនឹងហៅទូរស័ព្ទទៅលោកពូទីនឆាប់ៗនេះ។ ត្រាំថាគាត់ និងលោកពូទីននឹងជួបគ្នា ហើយលោកគិតថាជម្រើសមាន២ ទី១-បញ្ហាអ៊ុយក្រែនអាចដោះស្រាយចេញ និងទី២-បញ្ហានេះអាចដោះស្រាយមិនចេញ។ ហេតុនេះ ផ្ទុយពីអ្វីដែលលោកធ្លាប់អះអាងថាអាចដោះស្រាយចេញត្រឹមតែម្ភៃបួនម៉ោងតែប៉ុណ្ណោះ។ លោកត្រាំថាយ៉ាងហោចណាស់ដោះស្រាយចេញ ឬមិនចេញ យើងគង់តែដឹងនាពេលខាងមុខ។
លោកថ្លែងបន្តទៀតថាបើសិនយើងមិនអាចដោះស្រាយបញ្ហានេះបានទេ វានឹងក្លាយជារឿងដែលគួរឱ្យចាប់អារម្មណ៍បំផុត។ លោកត្រាំសង្កត់ធ្ងន់ថាករណីដែលលោកពូទីនមិនធ្វើដំណើរទៅចូលរួមការចរចាគ្នានៅប្រទេសតួកគីនោះមិនមែនជារឿងគួរឱ្យភ្ញាក់ផ្អើលទេ។ លោកចង់បើកកិច្ចប្រជុំជាមួយលោកពូទីន។ លោកនឹងចាកចេញពីទីនេះដើម្បីទៅជួបលោកពូទីន។
ក្រុមបស្ចិមប្រទេសដែលមានអាមេរិក អឺរ៉ុប និងអ៊ុយក្រែនអំពាវនាវឱ្យលោកពូទីនទទួលយកបទឈប់បាញ់ដ៏ពេញលេញ ដោយឥតលក្ខខណ្ឌ និងជាបន្ទាន់រយៈពេល៣០ថ្ងៃ។ ជាកិច្ចឆ្លើយតបចំពោះការអំពាវនាវនេះ លោកពូទីនបានត្រឹមចាត់គណៈប្រតិភូថ្នាក់ក្រោមដែលមានទីប្រឹក្សា និងមន្ត្រីទទួលបន្ទុកខាងសន្តិសុខជាតិទៅចូលរួម។ ប្រភពខ្លះថាថ្ងៃនេះ លោកពូទីនសម្រេចដកតំណែងមេបញ្ជាការទ័ពជើងគោក និងឱ្យគាត់កាន់តំណែងថ្មីជាអនុរដ្ឋលេខាធិការក្រុមប្រឹក្សាសន្តិសុខជាតិ។
ទោះបីមិនបានជួបគ្នាកម្រិតកំពូល ប៉ុន្តែក្រុមការងាររបស់រុស្ស៊ី និងអ៊ុយក្រែនពិតជាបានជួបគ្នាដូចការគ្រោងទុក។ ទោះជាយ៉ាងណាក្ដី សហគមន៍អន្តរជាតិគិតតាំងពីដំបូងដៃថាកិច្ចជំនួបលើកនេះប្រហែលជាមិនអាចសម្រេចបានលទ្ធផលជាដុំកំភួននោះទេ។ ដូចលោកហ្សេឡិនស្គីនិយាយអីចឹងគឺថារាល់អំណាច និងការសម្រេចចិត្តទាំងអស់ស្ថិតក្នុងដៃលោកពូទីន។
លោកត្រាំថ្លែងបន្ថែមទៀតថាការដែលលោកពូទីនមិនបានទៅចូលរួមការចរចា លោកក៏យល់ត្រង់ចំណុចនេះផងដែរ។ ប៉ុន្តែលោកថាយើងត្រូវតែខិតខំដោះស្រាយបញ្ហានេះ។ លោកមិនអាចបណ្ដោយឱ្យជីវិតយុទ្ធជនពលីជារៀងរាល់សប្ដាហ៍ប្រាំពាន់នាក់បានឡើយ។ លោកត្រាំទទួលស្គាល់ថាលុះត្រាតែលោក និងលោកពូទីនជួបគ្នាទើបអាចបំបែកភាពទាល់ច្រកនេះបាន។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី និងប្រភពដទៃទៀត៕
