By រាជធានីភ្នំពេញ ៖ កម្លាំងសមត្ថកិច្ចបង្ក្រាបក្រុមក្មេងទំនើ.ងបាន៣នាក់បន្ទាប់ពីពួកគេធ្វើសកម្មភាពកា.ប់គ្នា នៅតាមដងផ្លូវ បណ្ដាលឲ្យមានអ្នករងរបួសធ្ងន់ស្រាល បង្កឲ្យមានការភ្ញាក់ផ្អើលនៅវេលាម៉ោង២និង១៥នាទីរំលងអធ្រាត្រ ឈានចូលថ្ងៃទី២៤ ខែឧសភា ឆ្នាំ២០២៥ នៅមុខ KTV មួយកន្លែងយីហោ តន្ត្រីឫស្សីមាស តាមបណ្ដោយផ្លូវ២០០៤សង្កាត់កាកាបទី១ ខណ្ឌពោធិសែនជ័យ រាជធានីភ្នំពេញ ។
ម៉ូតូដែលរងការខូចខាតមាន២គ្រឿង ទី១ ម៉ាកហុងឌ្រីម សេរី២០២២ ពណ៌ខ្មៅ ពាក់ស្លាកលេខកំពង់ស្ពឺ1I-5777 ។ ទី២ ម៉ាកហុងដាវ៉េវ ពណ៌ខ្មៅ ពាក់ស្លាកលេខភ្នំពេញ 1kH-5255 បន្ទាប់ពីធ្វើសកម្មភាពរួចជិះបុ.កគ្នាដួលត្រូវបានឃាត់ខ្លួនបាន ។
ប្រភពព័ត៌មានបញ្ជាក់ពីនារីៗបម្រើការងារនៅក្នុងខេធីវីខាងលើឲ្យដឹងថា នៅមុនពេលកើតហេតុ មានក្មេងទំនើ.ងមួយក្រុមជិះម៉ូតូ៧ទៅ៨គ្រឿង ប្រដាប់ដោយកាំបិតបុ័ងតោ និងដំបង ព្រមទាំងថ្មក្រឡឹង ឆ្វែលទៅមកជាច្រើនដង ស្រាប់តែនាំគ្នាធ្វើសកម្មភាពឈប់ម៉ូតូចុះទៅកា.ប់ភាគីក្មេង១ក្រុមទៀត ដែលបម្រើការងារនៅក្នុងខារ៉ាអូខេខាងលើ មានការតដៃទៅវិញទៅមក បណ្ដាលឲ្យមានអ្នករងរបួសធ្ងន់ម្នាក់ រយះក្បាល និងស្រាលជាច្រើននាក់ បន្ទាប់មកក្មេងទំនើ.ងទាំងនោះបានកា.ប់ចញ្ច្រាំម៉ូតូចំនួនពីរគ្រឿង រងការខូចខាតយ៉ាងដំណំ ទើបបង្កការភ្ញាក់ផ្អើលពលរដ្ឋបានរាយការណ៍ទៅសមត្ថកិច្ចមូលដ្ឋាន ចុះមកអន្តរាគមន៍ធ្វើការឃាត់ខ្លួនបានចំនួន៣នាក់ ចំណែកបក្សពួកផ្សេងទៀតនាំគ្នាជិះម៉ូតូរត់គេចខ្លួនទៅបាត់ស្រមោលពីកន្លែងកើតហេតុ ចំណែកជនរងគ្រោះត្រូវបានដឹកយកទៅព្យាបាលរបួសនៅមន្ទីរពេទ្យភ្លាមៗ ។
ក្រោយពេលកើតហេតុ សមត្ថកិច្ចបាននាំខ្លួនក្មេងទំនើ.ងទាំង៣នាក់ខាងលើ យកទៅប៉ុស្តិ៍សាកសួរ ដើម្បីចាត់ការតាមផ្លូវច្បាប់ ៕
