By អនុក្រឹត្យដែលបើកសោរអោយអ្នកជំនាញអាចនឹងចូលបម្រើការងាររដ្ឋបានចេញជាផ្លូវការហើយ ។ ដូច្នេះអ្នកជំនាញអាចនឹងពិនិត្យបេក្ខភាព ហើយត្រៀមខ្លួន ដើម្បីចូលរួមបម្រើជាតិ ប្រសិនបើចង់ គ្រាន់តែថា ជំហានដំបូងប្រហែលជាពាក់ព័ន្ធនឹងអ្នកជំនាញខាងអប់រំនិងសុខភាពជាមុនសិន ។
ការដែលអះអាងបែបនេះ គឺដោយសម្អាងទៅលើអនុក្រឹត្យមួយ ដែលចុះហត្ថលេខាដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី២១ ខែឧសភា ឆ្នាំ២០២៥ ។ អនុក្រឹត្យនោះ គឺឯកសារគតិយុត្តមួយដែលនឹងបើកសិទ្ធិឲ្យស្ថាប័នរដ្ឋនានាអាចធ្វើការជ្រើសរើសមន្ត្រីតាមកិច្ចព្រមព្រៀងការងារ ។
តាមអនុក្រឹត្យស្តីពីការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារបានសង្កត់ធ្ងន់ថា គឺសម្រាប់គ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន ។
តាមខ្លឹមសារដែលបញ្ជាក់នៅក្នុងអនុក្រឹត្យនោះ គឺលើកឡើងថា គ្រឹះស្ថានសិក្សាសាធារណៈដែលត្រូវការមន្ត្រីផ្អែកលើកិច្ចព្រមព្រៀងការងារនេះ គឺរួមមានសម្រាប់បម្រើការនៅតាមសាលាមត្តេយ្យសិក្សា សាលាបឋមសិក្សា អនុវិទ្យាល័យ និងវិទ្យាល័យ ។
ដោយឡែក សម្រាប់អង្គភាពសុខាភិបាលមូលដ្ឋាន គឺរួមមានអ្នកជំនាញដែលនឹងត្រូវបម្រើការនៅតាមប៉ុស្តិ៍សុខភាព មណ្ឌលសុខភាព មន្ទីរពេទ្យបង្អែកនានានៅក្នុង ប្រទេសដែលនៅពេលនេះនៅខ្វះអ្នកជំនាញវេជ្ជសាស្ត្រ ។
រីឯការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារនៅតាមក្រសួង ស្ថាប័នផ្សេងទៀតត្រូវអនុវត្តផ្អែកលើការសម្រេចរបស់រាជរដ្ឋាភិបាលតាមការស្នើរបស់ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ ។
អនុក្រឹត្យដែលមានទាំងអស់១២ ទំព័រ ៧ជំពូក ៤៧មាត្រា គឺបាននិយាយបញ្ជាក់អំពីយន្តការគាំទ្រការអនុវត្ត និងការតាមដានត្រួតពិនិត្យ និងការវា.យតម្លៃ,ការគ្រប់គ្រងមន្ត្រី, លក្ខខណ្ឌនៃការជ្រើសរើសមន្ត្រី, មុខតំណែងរបស់មន្ត្រី និងបទបញ្ញត្តិទូទៅ ។
អនុក្រឹត្យនោះ ក៏បាននិយាយលំអិតអំពីការរៀបចំផែនការក្នុងការជ្រើសរើសមន្ត្រី, បែបបទនីតិវិធី និងប្រតិទិននៃការជ្រើសរើស, កិច្ចព្រមព្រៀងការងារ, រយៈពេលនៃកិច្ចព្រមព្រៀងការងារ, ការបញ្ចប់កិច្ចព្រមព្រៀងការងារ,ការវាយតម្លៃសមិទ្ធកម្មការងាររបស់មន្ត្រីទាំងនោះ, កំហុសនិងទណ្ឌកម្មខាងវិន័យ, ការឈប់សម្រាកនិងការគ្រប់គ្រងវត្តមាន, សិទ្ធិ កាតព្វកិច្ច និង សីលធម៌វិជ្ជាជីវៈ, ការអភិវឌ្ឈន៍សមត្ថភាព, វិវាទកិច្ចព្រមព្រៀងការងារ និងយន្តការដោះស្រាយ, ការចូលនិវត្តន៍ និងរបបសន្តិសុខសង្គមរបស់មន្ត្រីទាំងនោះ …។ល។
ដោយឡែក ពាក់ព័ន្ធនឹងបៀវត្ស និងអត្ថប្រយោជន៍របស់មន្ត្រីកិច្ចព្រមព្រៀងការងារដែលជាចំណុចចង់ដឹងពីសាធារណៈជនអនុក្រឹត្យនេះមិនបានបញ្ជាក់ច្បាស់លាស់នៅឡើយទេ ។ អនុក្រឹត្យនេះ បញ្ជាក់ត្រឹមតែថា ត្រូវកំណត់ដោយអនុក្រឹត្យតាមការស្នើសុំរបស់ក្រសួងមុខងារសាធារណៈ និងក្រសួងសេដ្ឋកិច្ច និងហិរញ្ញវត្ថុ ដោយមានការពិគ្រោះយោបល់ជាមួយនឹងក្រសួងសាមី ។
លើបញ្ហានេះ អនុក្រឹត្យ គឺនិយាយអំពីសិទ្ធិទទួលបានអត្ថប្រយោជន៍ហិរញ្ញវត្ថុផ្សេងៗទៀតដូចជា មន្ត្រីក្របខ័ណ្ឌ ដែលរួមមានប្រាក់ឧបត្ថម្ភផ្សេងៗក្នុងអង្គភាពក៏ដូចជា ប្រាក់ឧបត្ថម្ភផ្សេងទៀត តាមការសម្រេចរបស់រាជរដ្ឋាភិបាល ។ ក្រៅពីនោះ ពួកគេក៏អាចនឹងទទួលបានអត្ថប្រយោជន៍ផ្សេងទៀតដូចជា ការអភិវឌ្ឍសមត្ថភាពជំនាញវិជ្ជាជីវៈ ប័ណ្ណសរសើរ គ្រឿងឥស្សរិយយស និងការលើកទឹកចិត្តដោយអនុលោមតាមលិខិតបទដ្ឋានគតិយុត្តជាធរមាន ។
ពាក់ព័ន្ធនឹងអត្ថប្រយោជន៍នេះប្រហែលជាក្រសួងមុខងារសាធារណៈ និងក្រសួងសេដ្ឋកិច្ចនិងហិរញ្ញវត្ថុនឹងចេញនៅពេលខាងមុខ ហើយប្រាក់បៀវត្សរ៍នេះវាអាចនឹងខុសគ្នាទៅតាមកម្រិតជំនាញ និងសមត្ថភាពក៏ដូចជា តម្រូវការផ្សេងៗរបស់សាមីអង្គភាពក៏ដូចជា ភាពចាំបាច់ ។
ជាការពិតអ្នកខ្លះដែលគេមានចំណេះជំនាញពិតប្រាកដ ហើយជាធនធានមនុស្សកម្រគេមិនអាចមកជាមួយនឹងប្រាក់បៀវត្សរ៍កម្រិតធម្មតាឡើយ ។ ដូច្នេះវាអាចមានការចរចាជាមួយនឹងស្ថាប័នសាមីទើបបានជាអក្រឹត្យនោះទុកចន្លោះប្រហោងបែបនេះ ។
ពាក់ព័ន្ធនឹងចំណុចនេះ សម្តេចធិបតី ធ្លាប់បាននិយាយរួចមកហើយថា រាជរដ្ឋាភិបាល គឺមានបំណងចង់អូសទាញអ្នកមានសមត្ថភាពពិតប្រាកដ ពីឯកជនមកជួយបម្រើការងារចាំបាច់មួយចំនួននៅក្នុងស្ថាប័ន ដែលស្ថិតក្រោមការគ្រប់គ្រងរបស់រដ្ឋ ។ រដ្ឋពិតជាត្រូវការធនធានមនុស្សដែលមានចំណេះជំនាញ និងឯកទេសច្បាស់លាស់ឲ្យមករួមគ្នាជួយអភិវឌ្ឍន៍សង្គមបន្ថែមទៀត ។
សម្តេចធិបតីក៏ធ្លាប់បានលើកឡើង នៅតាមវេទិកាសាធារណៈជាបន្តបន្ទាប់ ដោយចំហរថា អ្នកដែលមានជំនាញ និងសមត្ថភាព ដែលអាចបម្រើការងាររាជការបាន ទោះជាមានមានអាយុលើសកំណត់ឲ្យតែមានជំនាញតាមតម្រូវការ គឺក៏អាចនឹងទទួលការងារទាំងនោះបានដែរ ។
សរុបទៅ អ្នកដែលចាប់អារម្មណ៍នឹងចូលបម្រើការងាររដ្ឋ សូមត្រៀមខ្លួន ។ ឱកាសនឹងមាននៅពេលខាងមុខនេះ ។ នៅពេលដែលអនុក្រឹត្យនេះចេញបែបនេះមិនយូរទេ ក្រសួងមុខងារសាធារណៈក៏ដូចជា ក្រសួងសេដ្ឋកិច្ច និងហិរញ្ញវត្ថុ ព្រមទាំងបណ្តាសាមីស្ថាប័ននានា នឹងចេញជាបន្តបន្ទាប់នៅពេលខាងមុខនេះហើយ ៕
