By ទីក្រុងព្យុងយ៉ាង៖ កូរ៉េខាងជើងចាប់ឃុំខ្លួនមន្ត្រីបីនាក់ដែលធ្វើឱ្យរដ្ឋាភិបាលបាក់មុខបាក់មាត់នៅថ្ងៃបើកសម្ពោធនាវាពិឃាតដ៏ទំនើបទម្ងន់៥ពាន់តោន។ នេះបើយោងតាមការផ្សាយរបស់ទូរទស្សន៍កូរ៉េខាងជើង ខេស៊ីអឹនអេ (KCNA)។ មនុស្សទាំងបីជាអ្នកទទួលខុសត្រូវនៅក្នុងការខូចខាតនាវា។ នៅក្នុងចំណោមនោះមានទី១-ប្រធានក្រុមវិស្វករផ្នែកសាងសង់នាវា ទី២-ប្រធានផ្នែកសាងសង់តួនាវា និងទី៣-អនុប្រធានគ្រប់គ្រងកិច្ចការទូទៅនៅក្នុងដំណើរការសាងសង់នាវា។
នៅថ្ងៃបើកសម្ពោធនោះ ប្រមុខដឹកនាំកូរ៉េខាងជើង លោកគីមជុងអ៊ុន បានអញ្ជើញទៅបើកកម្មវិធីដោយផ្ទាល់។ លោកថ្លែងថាឧបទ្ទវហេតុនេះធ្វើឱ្យប៉ះពាល់កិត្យានុភាពជាតិសម្បើមណាស់។ លោកសច្ចាថាត្រូវតែដាក់ទោសអ្នកដែលទទួលខុសត្រូវនៅក្នុងរឿងនេះឱ្យបានចាស់ដៃបន្តិចទើបបាន។ លោកគីមចាត់ទុកថានេះជាទង្វើដ៏ខ្ជីខ្ជាដែលមិនអាចអត់ឱនជាដាច់ខាត។
លោកបានបញ្ជាឱ្យមន្ត្រីក្រោមឱវាទត្រូវតែប្រញាប់ជួសជុលនាវាឱ្យបានរួចរាល់មុនមហាសន្និបាតបក្សពលករកូរ៉េនៅខែមិថុនា។ ប្រភពខ្លះបង្ហើបឱ្យដឹងថានៅថ្ងៃបើកសម្ពោធនាវានេះ កូរ៉េខាងជើងបានអញ្ជើញភ្ញៀវកិត្តិយសទៅចូលរួមច្រើនណាស់ព្រោះជាការព្យាយាមបង្ហាញពីស្នាដៃរបស់ប្រទេសជាតិរបស់លោក។ ប៉ុន្តែនាវានោះមានស្នាមធ្លុះធ្លាយនៅផ្នែកខាងក្រោមដល់ថ្នាក់លិចទឹកចូលពេញហ្នឹង។ លោកគីមយល់ថានេះជាការបំបាក់មុខមាត់របស់លោកយ៉ាងខ្លាំង។ នេះបើយោងតាមការប្រមើលមើលរបស់អ្នកវិភាគ។
រូបភាពពីផ្កាយរណបបង្ហាញថានាវាចម្បាំងនេះគ្របដណ្ដប់ដោយក្រណាត់ ឬកៅស៊ូពណ៌ខៀវ។ ប៉ុន្តែទូរទស្សន៍កូរ៉េខាងជើងអះអាងថាគ្មានស្នាមធ្លុះធ្លាយ ឬប្រហោងនៅបាតនាវាទេ។ គ្រាន់តែមានស្នាមឆ្កូត និងកំពិតបន្តិចបន្តួច។ ដូច្នេះប្រើពេលតែប៉ុន្មានថ្ងៃអាចជួសជុលស្អាតដូចដើមវិញ។ ផ្អែកទៅលើទំហំរបស់វា យោធាកូរ៉េខាងត្បូងវាយតម្លៃថានាវានេះស្ថិតនៅក្នុងលំដាប់នាវាពិឃាតទម្ងន់៥ពាន់តោនដូចនាវាឆូយុន (Choe Hyon) ដែលកូរ៉េខាងជើងទើបតែបើកសម្ពោធកាលពីខែមេសា។
យោធាកូរ៉េខាងត្បូងយល់ថានាវាឆូយុនអាចផលិតចេញជារូបរាងដោយសារមានជំនួយពីរុស្ស៊ី។ អាចជាថ្នូរនឹងការបញ្ជូនកងទ័ពកូរ៉េខាងជើងទៅច្បាំងនៅតំបន់ខឺស រុស្ស៊ីក៏តបស្នងត្រឡប់មកវិញនូវជំនួយផ្នែកបច្ចេកវិទ្យាដើម្បីសាងសង់នាវា។ កូរ៉េខាងជើងអះអាងថានាវានេះបំពាក់អាវុធដ៏មានអានុភាពខ្លាំងក្លាបំផុត ហើយត្រៀមដាក់ឱ្យប្រើប្រាស់នៅដើមឆ្នាំ២០២៦។
នាវាដែលមានបញ្ហាខូចខាតនៅថ្ងៃបើកសម្ពោធនោះក៏អាចនឹងផលិតឡើងក្រោមការជួយជ្រោមជ្រែងផ្នែកបច្ចេកវិទ្យាពីរុស្ស៊ីផងដែរ។ នេះបើយោងតាមការប្រមើលមើលរបស់អ្នកវិភាគ។ នៅពេលដែលអាមេរិកកំពុងកសាងកម្លាំងយោធានៅក្នុងតំបន់ យោធាកូរ៉េខាងជើងនឹងចាត់វិធានការទប់ទល់នឹងការគំរាមកំហែងផ្នែកយោធាគ្រប់ទម្រង់ទាំងអស់។ ខាងលើនេះជាការផ្សាយរបស់ទូរទស្សន៍កូរ៉េខាងជើង៕
