By បរទេស ៖ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) កាលពីថ្ងៃទី២៦ ខែឧសភា ឆ្នាំ២០២៥ បានចេញមកបដិសេធដោយផ្ទាល់ថា លោកនិងភរិយារបស់លោក ជំទាវទី១បារាំង Brigitte Macron មិនមានជម្លោះជាមួយគ្នាឡើយ ក្រោយវីដេអូភរិយារបស់លោកប្រើដៃរុញមុខលោក មុនពេលចុះពីយន្តហោះ កំពុងតែផ្ទុះខ្លាំងលើបណ្តាញទំនាក់ទំនងសង្គម និងប្រព័ន្ធផ្សព្វផ្សាយជុំវិញពិភពលោក កាលពីថ្ងៃទី២៦ ខែឧសភា ឆ្នាំ២០២៥។ នេះបើយោងតាមប្រភពពីកាសែត The Guardian បានចេញផ្សាយ។
ការចេញមកបដិសេធរបស់ប្រធានាធិបតីបារាំងកើតឡើង បន្ទាប់ពីវីដេអូកំពុងផ្ទុះដែលត្រូវបានផ្សព្វផ្សាយបន្តដោយប្រព័ន្ធផ្សព្វផ្សាយរដ្ឋរុស្ស៊ី និងគណនីបណ្តាញសង្គមរបស់ក្រុមស្តាំនិយមបារាំងបានបង្ហាញឱ្យឃើញពីជំទាវទី១បារាំង Brigitte Macron រុញមុខស្វាមី ខណៈដែលអ្នកទាំងពីរកំពុងរៀបចំចុះពីយន្តហោះនៅក្នុងប្រទេសវៀតណាម។
វីដេអូថតដោយកាមេរ៉ាទីភ្នាក់ងារសារព័ត៌មាន AP បង្ហាញឱ្យឃើញប្រធានាធិបតីបារាំងបានលេចមុខនៅមាត់ទ្វារយន្តហោះ មុនពេលចាប់ផ្តើមដំណើរទស្សនកិច្ចទៅកាន់ទីក្រុងហាណូយ តែមិនទាន់ដើរចេញពីទ្វារយន្តហោះផង ស្រាប់តែលេចចេញដៃភរិយារបស់លោករុញមុខលោកយ៉ាងខ្លាំងធ្វើឱ្យខ្លួនប្រាណលោកខ្ទាតទៅក្រោយ មុនពេលងាកខ្លួនបែរមុខតម្រង់មកកាំជណ្តើរ ហើយលើកដៃគ្រវីដាក់កាមេរ៉ា ហើយទើបបណ្តើរភរិយាចុះតាមជណ្តើរយន្តហោះ។ វីដេអូនេះកំពុងតែផ្ទុះខ្លាំងលើប្រព័ន្ធផ្សព្វផ្សាយ ស្របពេលអ្នកនាំពាក្យក្រសួងការបរទេសរុស្ស៊ី លោកស្រី ម៉ារីយ៉ា ហ្សាការ៉ូវ៉ា (Maria Zakharova) ក៏បានចែករំលែកវីដេអូនោះនៅលើបណ្តាញសង្គម Telegram ផងដែរ។
ពាក់ព័ន្ធជុំវិញបញ្ហានេះ លោក ម៉ាក្រុង ក្រោយមកបានប្រាប់អ្នកសារព័ត៌មានថា នោះគ្រាន់តែជាកាយវិការលេងសើចរវាងប្តីប្រពន្ធលោកតែប៉ុណ្ណោះ ហើយលោក និងភរិយាតែងតែធ្វើបែបនេះញឹកញាប់ណាស់។ ទន្ទឹមជាមួយគ្នានោះ មន្ត្រីវិមានអេលីហ្សេបារាំង (Élysée) ក៏បានប្រាប់ប្រព័ន្ធផ្សព្វផ្សាយបារាំងថា ហេតុការណ៍កើតឡើងកាលពីថ្មីៗនេះ បានបង្ហាញពីភាពស្និទ្ធស្នាលមួយរវាងលោកប្រធានាធិបតី និងជំទាវទី១។ ប៉ុន្តែវាគ្រប់គ្រាន់ណាស់ ដើម្បីចិញ្ចឹមអ្នកទ្រឹស្តីសមគំនិត ដើម្បីយកមកធ្វើការវាយប្រហារ។
សូមជម្រាបថា ដំណើរទស្សនកិច្ចលោក ម៉ាក្រុង ទៅកាន់ប្រទេសវៀតណាម កាលពីថ្ងៃចន្ទ ភាគីបារាំង និងវៀតណាមបានចុះហត្ថលេខាលើកិច្ចព្រមព្រៀងជាច្រើនមានតម្លៃ៩ពាន់លានអឺរ៉ូ ស្មើនឹង ១០ពាន់លានដុល្លារអាមេរិក គ្រប់ដណ្តប់លើវិស័យអាកាសចរណ៍ ការពារជាតិ និងថាមពល ខណៈដែលលោក ម៉ាក្រុង បានចាប់ផ្តើមដំណើរទស្សនកិច្ចជាផ្លូវការលើកដំបូងទៅកាន់ប្រទេសអតីតអាណានិគមរបស់បារាំងមួយនេះ ក្នុងរយៈពេលជិតមួយទសវត្សរ៍។ កិច្ចព្រមព្រៀងជាមួយវៀតណាមកើតឡើងចំពេលមានចលាចលពាណិជ្ជកម្មខ្លាំង ដែលជំរុញដោយពន្ធរបស់ប្រធានាធិបតីអាមេរិក លោក ដូណាល់ ត្រាំ (Donald Trump)៕ ប្រភព ៖ The Guardian
