By រាជធានីភ្នំពេញ ៖ ក្លិបបាល់ទាត់ភ្នំពេញក្រោន បានគ្រងជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៨ ឆ្នាំ ២០២៤/២៥ (ថ្នាក់ជាតិ) ក្រោយយកឈ្នះលើក្រុមការពារតំណែងជើងឯកព្រះខ័នរាជស្វាយរៀង នៅក្នុងវគ្គផ្ដាច់ព្រ័ត្រ ដោយលទ្ធផល ២ទល់នឹង១ នៅពហុកីឡដ្ឋានជាតិមរកតេជោ កាលពីថ្ងៃទី២៥ ខែឧសភា ឆ្នាំ២០២៥ កន្លងទៅ។
ស្ថិតនៅក្នុងការប្រកួតដ៏ស្វិតស្វាញនេះ ក្រុមភ្នំពេញក្រោនបានបើកការនាំមុខមុនសម្រេចបានដោយកីឡាករ ឡុង ភារ៉ាត់ នៅនាទី២៤ នៅវគ្គទី១ មុនពេលដែលកីឡាករ ញាណ សុស៊ីដាន រកបានគ្រាប់តាមស្មើឱ្យព្រះខ័នរាជស្វាយរៀង នៅនាទី៦២ នៃវគ្គទី២។ ទោះយ៉ាងណាក៏ដោយ ការប្រកួតឈានដល់នាទី៧៨ កីឡាករ Andres Neito ក៏រកបានគ្រាប់នាំមុខឱ្យភ្នំពេញក្រោនសាជាថ្មី ហើយក៏ជាគ្រាប់បាល់ជ័យជម្នះផងដែរ។
តាមរយៈជ័យជម្នះនេះ ក្រុមភ្នំពេញក្រោន ក្រោមការដឹកនាំរបស់គ្រូបង្វឹក លោក Oleg Starynskyi បានបន្ថែមផ្កាយទី៣ ក្នុងនាមជាក្រុមឈ្នះជើងឯកពានសម្តេច ហ៊ុន សែន ចំនួន៣សម័យកាល ដ្បិតក្រុមធ្លាប់ឈានដល់វគ្គផ្តាច់ព្រ័ត្រ៥លើកមួយនេះ ខកខានឈ្នះជើងឯកពានរង្វាន់ថ្នាក់ជាតិមួយនេះ អស់រយៈពេល១៦ឆ្នាំមកហើយ ចាប់តាំងពីការឈ្នះចុងក្រោយ និងជាលើកទី២ កាលពីឆ្នាំ ២០០៩ ខណៈដែលការឈ្នះលើកដំបូងនៅឆ្នាំ ២០០៨។
គិតមកទល់ពេលនេះ ក្រុមព្រះខ័នរាជស្វាយរៀង ដែលបានឡើងដល់វគ្គផ្តាច់ព្រ័ត្រពានរង្វាន់សម្តេច ហ៊ុន សែន ចំនួន១០លើកហើយនោះ នៅតែបន្តឈរជាក្រុមឈ្នះជើងឯកពានរង្វាន់នេះច្រើនជាងគេពោល៥លើក (២០១១, ២០១២, ២០១៥, ២០១៧ និង ២០២៣-២៤)៕ រូបភាព ៖ Phnom Penh Crown FC
