By មុនពេលរិះគន់ សូមអាណិតដល់អ្នកធ្វើ ។ មានអណ្តាត កុំចេះតែគន្លាស់ ជុំវិញរឿងសម្ភោធអាកាសយានដ្ឋានអន្តរជាតិតេជោ តម្លៃ១.៥០០លានដុល្លារក៏ដូចជា ជោគវាសនារបស់អាកាសយានដ្ឋានអន្តរជាតិភ្នំពេញ ដែលប្រើប្រាស់តាំងពីសម័យរាស្ត្រនិយម ។
មកដល់ពេលនេះ អ្នកខ្លះរិះគន់ដល់ការពន្យារពេលបើកអាកាសយានដ្ឋានអន្តរជាតិតេជោដែលគ្រោងដំណើរការនៅខែកក្កដា ប៉ុន្តែនៅចុងខែឧសភានេះ ស្រាប់តែរដ្ឋលេខាធិការដ្ឋានអាកាសចរណ៍ស៊ីវិលក៏បានជូនដំណឹងថា អាកាសយានដ្ឋានថ្មីនេះនឹងបើកប្រតិបត្តិការនៅថ្ងៃទី៩ ខែកញ្ញា រួចសម្ពោធនៅថ្ងៃទី២០ ខែតុលា ឆ្នាំ២០២៥ ។ ទាក់ទងនឹងការចេញបរិច្ឆេទនេះមតិខ្លះរិះគន់ថា យករឿងដឹកជញ្ជូនជាតិមកលេងសើចម្តងពេលនេះម្តងពេលនោះ មិនប្រាកដមិនប្រជា ។
សូមបញ្ចប់មតិរឿងនេះទៅពីព្រោះកិច្ចការពាក់ព័ន្ធនឹងបញ្ហាហេដ្ឋារចនាសម្ព័ន្ធដឹកជញ្ជូនផ្លូវអាកាសនេះ រដ្ឋាភិបាលមិនអាចលេងសើចបានទេ ពីព្រោះវា គឺជាជីបចរមួយនៃវិស័យសេដ្ឋកិច្ចជាតិ ។ សូមយល់បញ្ហា និងភាពចាំបាច់ពីព្រោះការរុះរើប្រតិបត្តិការអាកាសយានដ្ឋានមួយទៅមួយមិនអាចចេះតែអង្គុយថានោះទេ ។ វាទាមទារការសាកល្បង និងរៀបចំបញ្ហានានាតាំងពីកត្តាសុវត្ថិភាព ភស្តុភាកម្ម សន្តិសុខ ក៏ដូចជា បញ្ហាជាច្រើនរាប់ជំពូល ។ ដូច្នេះកុំរំអុករដ្ឋាភិបាលឲ្យធ្វើតាមខ្លួនឯងចង់ ។
ប្រសិនបើវាមានបញ្ហានោះ វានឹងបង្ករនូវផលប៉ះពាល់ដល់វិស័យសេដ្ឋកិច្ចជាតិដ៏សម្បើម ។ អាកាសយានដ្ឋានជាសរសៃឈាមនៃទេសចរណ៍ការដឹកជញ្ជូន និងពាណិជ្ជកម្មដ៏ចម្បងរបស់ប្រទេសនានា ហើយបើដំណើរការទៅវាអាចមានបញ្ហាណាមួយនោះវានឹងប៉ះពាល់ធ្ងន់ធ្ងរដល់កិត្តិយស និងប្រទេសជាតិ ។
សូមទុកពេលវេលាសម្រាប់អ្នកជំនាញគេធ្វើការតាមបច្ចេកទេសទៅ ។ សម្រាប់កាលបរិច្ឆេទខាងលើ នៅក្នុងករណីដែលដល់ពេលត្រូវធ្វើប្រតិបត្តិការវាមានហេតុមានផលដែលមិនអាចនឹងប្រតិបត្តិការបានរដ្ឋាភិបាលសម្រេចចិត្តពន្យារពេលទៀតក៏មិនជាអ្វី ពីព្រោះអាកាសយានដ្ឋានអន្តរជាតិភ្នំពេញដែលដំណើរ ការតាំងពីឆ្នាំ១៩៥៩ ហើយត្រូវបានវិនិយោគជាបន្តបន្ទាប់ ដើម្បីទ្រទ្រង់កំណើននៃការរីកចម្រើននៃវិស័យដឹកជញ្ជូននៅក្នុងប្រទេស នៅតែអាចដំណើរការបានដដែល ។
សូមទុកពេលឲ្យអ្នកជំនាញរៀបចំឲ្យបានរួចរាល់សព្វគ្រប់កុំមានមាត់ចេះតែនិយាយ ហើយមានដៃចេះតែសរសេរ រួចចែករំលែកនៅលើបណ្តាញសង្គម ។ កិច្ចការរុះរើបនេះ គឺត្រូវតែដំណើរការដោយហ្មត់ចត់ពីព្រោះថា វិស័យដឹកជញ្ជូននៅស្រុកយើងទោះបីមិនដល់ប្រទេសជិតខាងមែន ប៉ុន្តែក៏មិនអន់ដែរ ដោយកាលពីឆ្នាំ២០២៤ កម្ពុជាអាចបម្រើសេវាដឹកជញ្ជូនផ្លូវអាកាសដល់ទៅជាង៥៨ពាន់ជើងដោយដឹកជញ្ជូនអ្នកដំណើរសរុបជាង៦,២ លាននាក់ និងទំនិញសរុបជាង៧៧ពាន់តោន ។
ម្យ៉ាងវិញទៀត ពាក់ព័ន្ធនឹងរឿងប្រទូសសារ៉ាយគ្នាអំពីជោគវាសនា នៃទីតាំងអាកាសយានដ្ឋានអន្តជាតិភ្នំពេញ ក្រោយប្រតិបត្តិការត្រូវរើទៅកាន់អាកាសយាន្តដ្ឋានថ្មីក៏ត្រូវបានសម្តេចធិបតី ហ៊ុន ម៉ាណែត នាយករដ្ឋមន្ត្រីប្រកាសរួចហើយនៅពេលថ្មីៗកន្លងទៅ ។
នៅក្នុងវេទិកា ដែលបាននិយាយជាសាធារណៈថ្មីៗនេះសម្តេចធិបតី បានលើកឡើងថា ជោគវាសនា របស់អាកាសយានដ្ឋានអន្តរជាតិភ្នំពេញនឹងរក្សាទុក គឺមិនបានបោះបង់ឫប្រគល់សិទ្ធិវិនិយោគធ្វើអ្វីនៅទីតាំងនោះទេ ។ អាកាសយានដ្ឋាននោះ គឺនឹងត្រូវរក្សាទុកដើម្បីជាប្រយោជន៍ផ្សេងៗរបស់សាធារណៈ ។
សរុបទៅ ដើម្បីឲ្យអាកាសយានដ្ឋានអន្តរជាតិតេជោ លំដាប់ថ្នាក់ 4F តម្លៃ១,៥ពាន់លានដុល្លារដំណើរការស្រួល និងជោគជ័យនោះវាចាំបាច់ត្រូវធ្វើអោយប្រាកដថា ពេលវាដំណើរការវានឹងមិនរអាក់រអួលឡើយ ។ ដូច្នេះការពន្យារពេលបន្តិចបន្តួចមិនមែនជារឿងធំនោះទេ ៕
