By ទីក្រុងវ៉ាស៊ីនតោន៖ សាកលវិទ្យាល័យហាវើតកាន់តែមិនស្រួលមែនទែនហើយនៅពេលលោកត្រាំហាក់ដូចជាបង្ហាញអារម្មណ៍ចង់ចាញ់ចង់ឈ្នះជាមួយនឹងគ្រឹះស្ថានឧត្ដមសិក្សាមួយនេះយ៉ាងខ្លាំង។ ថ្ងៃនេះ រដ្ឋាភិបាលរបស់លោកសម្រេចចិត្តកាត់ផ្ដាច់រាល់កម្មវិធីតូច-ធំទាំងអស់ជាស្ថាពរជាមួយហាវើត ជាពិសេសកិច្ចសន្យាពាក់ព័ន្ធនឹងហិរញ្ញប្បទាន។ ខាងលើនេះជាការអះអាងរបស់មន្ត្រីជាន់ខ្ពស់ម្នាក់។
រដ្ឋាភិបាលអាមេរិកធ្វើដល់ថ្នាក់នេះជាលក្ខណៈកាត់ផ្ដាច់សរសៃឈាមរបស់ហាវើត និងចង់ឱ្យហាវើតលុតជង្គង់សូមចុះចាញ់តែម្ដង។ បន្ទាប់ពីហាវើតចេញមុខប្រឆាំងនឹងនយោបាយរបស់ត្រាំ លោកបានកាត់ផ្ដាច់ប្រាក់ជំនួយជាង២ពាន់លានដុល្លារ។ ក្រោយមកផ្ដាច់ជាង៤៥០លានដុល្លារថែមទៀត។ មិនតែប៉ុណ្ណោះ រដ្ឋាភិបាលបញ្ជាឱ្យហាវើតឈប់ទទួលនិស្សិតបរទេសឱ្យចូលរៀននៅក្នុងសាលារបស់ខ្លួនតទៅទៀត។ គ្រាន់តែថាចៅក្រមបានធ្វើអន្តរាគមន៍ និងព្យួរទុកបទបញ្ជានេះ។
យោងតាមមន្ត្រីដែលស្នើសុំមិនបញ្ចេញឈ្មោះរូបនោះ រដ្ឋាភិបាលនឹងផ្ញើលិខិតរំលឹកមួយច្បាប់ទៅស្ថាប័នចំណុះរបស់ខ្លួនទាំងអស់ដើម្បីពិនិត្យសើរើឡើងវិញថាតើមាននៅសេសសល់កិច្ចសន្យាប៉ុន្មានអីប៉ុន្មានជាមួយហាវើត។ ពួកគេត្រូវពិនិត្យថាតើត្រូវផ្ដាច់កុងត្រាចោល ឬត្រូវផ្ទេរទៅកន្លែងណាផ្សេងដើម្បីកុំឱ្យហាវើត និងស្ថាប័នរបស់រដ្ឋជំពាក់វាក់វិនគ្នាតទៅទៀត។
ការផ្ដាច់កុងត្រាលើកនេះត្រូវគេប៉ាន់ស្មានថាមានទំហំទឹកប្រាក់ប្រហែលមួយរយលានដុល្លារ និងជាការកាត់ផ្ដាច់ទំនាក់ទំនងផ្នែកហិរញ្ញវត្ថុទាំងស្រុងរវាងរដ្ឋាភិបាលរបស់លោកត្រាំ និងសាកលវិទ្យាល័យហាវើតក្នុងនាមជាគ្រឹះស្ថានឧត្ដមសិក្សាមានវ័យចំណាស់ជាងគេនៅអាមេរិក (៣៨៨ឆ្នាំ) និងក៏ជាមជ្ឈមណ្ឌលសិក្សាស្រាវជ្រាវដ៏ធំប្រៀបបាននឹងឃ្លាំងចំណេះដឹងដ៏មហាសាលរបស់ពិភពលោក។
លោកត្រាំហាក់ដូចជាមានកំហឹងជាមួយហាវើតយ៉ាងខ្លាំង។ បើទុកជាពួកនិស្សិតហែបាតុកម្មប្រឆាំងនឹងយុទ្ធនាការយោធារបស់អ៊ីស្រាអែលនៅតំបន់ហ្កាហ្សាក៏សាកលវិទ្យាល័យដទៃទៀតមានចលនាបាតុកម្មបែបនេះដូចតែគ្នាទេ។ ប៉ុន្តែត្រាំហាក់ដូចជាចង់រករឿងហាវើតខ្លាំងជាងគេ។ ជួនកាលមជ្ឈដ្ឋានខាងក្រៅមិនអាចដឹងឱ្យអស់សេចក្ដីថាតើមានរឿងរ៉ាវអាថ៌កំបាំងអ្វីខ្លះនៅពីក្រោយវាំងននខ្មៅ។
ប៉ុន្តែសាកលវិទ្យាធិការសាកលវិទ្យាល័យហាវើតបានប្ដេជ្ញាចិត្តរួចហើយថាស្ថាប័ន១នេះនឹងតស៊ូរហូតដល់ដំណាក់កាលចុងក្រោយក៏មិនអាចលុតជង្គង់ចុះចាញ់ ឬអង្វរត្រាំជាដាច់ខាត។ រដ្ឋាភិបាលលោកត្រាំបានចោទប្រកាន់ថាហាវើតបណ្ដោយឱ្យមានចលនាប្រឆាំងជនជាតិជ្វីប/អ៊ីស្រាអែលនៅក្នុងបរិវេណរបស់ខ្លួន និងក៏មានចរិតសេរីនិយមជ្រុលបែបលម្អៀងផងដែរ។
កាលពីពេលកន្លងមក រដ្ឋាភិបាលអាមេរិកបានចេញបញ្ជាទៅហាវើតដើម្បីកែសម្រួលកម្មវិធីសិក្សាដែលមានចរិតបះបោរផ្នែកនយោបាយ និងចេញបញ្ជាឱ្យហាវើតបណ្ដេញនិស្សិតដែលមានទស្សនៈប្រឆាំងអាមេរិក។ ប៉ុន្តែហាវើតបង្ហាញជំហរប្រឆាំងនឹងនយោបាយរបស់លោកត្រាំ និងមិនព្រមអនុវត្តតាមបទបញ្ជាទាំងនោះទេ។ ហាវើតបានលើកទឡ្ហីករណ៍ថាវិធានការរបស់ត្រាំផ្ទុយពីស្មារតីនៃរដ្ឋធម្មនុញ្ញ។ ហាវើតថាបើអនុវត្តតាមបទបញ្ជារបស់រដ្ឋាភិបាលនឹងធ្វើឱ្យខូចប្រព័ន្ធអប់រំរបស់ខ្លួន។
សាកលវិទ្យាធិការសាកលវិទ្យាល័យហាវើត លោកអាឡាំង ហា្កបឺ (Alan Garber) ថ្លែងថាការចេញបញ្ជាឱ្យឈប់ទទួលនិស្សិតបរទេសនោះជាសញ្ញាមិនល្អទាល់តែសោះ។ ពួកបញ្ញវ័ន្ត និងអ្នកស្រាវជ្រាវដែលចង់បន្តការសិក្សានៅអាមេរិក និងចង់សម្រេចក្ដីសុបិនរបស់ពួកគេនឹងរស់នៅក្នុងសេចក្ដីភ័យខ្លាច ឬព្រួយបារម្ភជាប់ជាប្រចាំ។ ពួកគេបារម្ភថាបើត្រាំឃ្នើសចិត្តត្រង់ចំណុចណាមួយ គាត់អាចនឹងបណ្ដេញពួកគេចេញទាំងអស់៕
