By យោងតាមការចុះផ្សាយរបស់ ក្រសួងព័ត៌មាន នាថ្ងៃទី៣១ ខែឧសភា ឆ្នាំ ២០២៥ នេះបានចុះផ្សាយថា ក្រុមការងារចុះបោះបង្គោលព្រំដីតាមបណ្តោយព្រែកជីកហ្វូណនតេជោសម្រាប់កំណាត់ទី២ ក្នុងភូមិសាស្រ្តខេត្តតាកែវ គ្រោងចុះអនុវត្តចាប់ពីថ្ងៃទី៣ ខែមិថុនាខាងមុខនេះ។នេះបើយោងតាមស្មារតីនៃកិច្ចប្រជុំស្តីពីការចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ នៅទីស្តីការក្រសួងសាធារណការ និងដឹកជញ្ជូននៅទី៣០ ខែឧសភា ឆ្នាំ២០២៥នេះ។
ក្នុងកិច្ចប្រជុំដែលដឹកនាំដោយឯកឧត្តម ម៉ក់ ស៊ីដេត អនុរដ្ឋលេខាធិការ បានពិនិត្យលទ្ធផលនៃការចុះពិនិត្យទីតាំង ប្រមូលទិន្នន័យ ផ្ទៀងផ្ទាត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ ក្នុងភូមិសាស្រ្តខេត្តតាកែវ ។កិច្ចប្រជុំនេះដែរក្នុងគោលបំណងដើម្បីពិនិត្យលើផែនការសកម្មភាពចុះបោះបង្គោលព្រំដីតាមបណ្តោយព្រែកជីកហ្វូណនតេជោសម្រាប់កំណាត់ទី២ ក្នុងភូមិសាស្រ្តខេត្តតាកែវ ដោយចាប់ផ្តើមពីព្រំប្រទល់ខេត្តកណ្ដាលនិងខេត្តតាកែវ រហូតដល់ព្រំប្រទល់ខេត្តតាកែវនិងខេត្តកំពត ដែលគ្រោងបោះបង្គោលសរុប ចំនួន ៥៤៤បង្គោល។ ក្រុមការងារនឹងបែងចែកជាក្រុមតូចចំនួន ៤ ក្រុម ដោយគ្រោងចុះអនុវត្តការងារបោះបង្គោល ចាប់ពីថ្ងៃទី០៣ ខែមិថុនា ឆ្នាំ២០២៥ នេះតទៅ៕
ប្រភព៖ ក្រសួងព័ត៌មាន
