By ទីក្រុងប៉េកាំង៖ បន្ទាប់ពីបិទខ្ទប់ទំនិញប្រភេទគ្រឿងសមុទ្ររបស់ជប៉ុនមិនឱ្យនាំចូលប្រទេសចិនដោយសារការព្រួយបារម្ភអំពីការឆ្លងសារធាតុវិទ្យុសកម្ម ថ្មីៗនេះ ប្រទេសចិនចាប់ផ្ដើមពិចារណារឿងនេះ និងត្រៀមអនុញ្ញាតឱ្យនាំចូលដូចធម្មតាឡើងវិញ។ កាលពីមុននេះ ជប៉ុនបានបង្ហូរទឹកកាកសំណល់ដែលស្តុកទុកជាងដប់ឆ្នាំមកហើយក្រោយព្រឹត្តិការណ៍រញ្ជួយដី និងរលកយក្សស៊ូណាមីវាយប្រហាររោងចក្រនុយក្លេអ៊ែរនៅហ្វ៊ូគូស៊ីម៉ាឆ្នាំ២០១១។ ហេតុនេះ ប្រទេសចិនក៏ដាក់ចេញបម្រាម។
ប៉ុន្តែនៅថ្ងៃនេះ រដ្ឋាភិបាលជប៉ុនអះអាងថាចិនយល់ព្រមអនុញ្ញាតឱ្យនាំចូលគ្រឿងសមុទ្រទៅលក់នៅប្រទេសចិនវិញហើយ។ ដូច្នេះ បម្រាមរយៈពេលជិត២ឆ្នាំត្រូវបានដកចេញជាបណ្ដើរៗ។ មន្ត្រីរដ្ឋាភិបាលជប៉ុននៅក្រសួងកសិកម្ម រុក្ខា ប្រមាញ់ និងនេសាទ និងទីភ្នាក់ងារគយចិនទើបតែសម្រេចបានកិច្ចព្រមព្រៀងថ្មីនេះបន្ទាប់ពីជួបគ្នានៅទីក្រុងប៉េកាំងកាលពីថ្ងៃពុធ។
ឥឡូវនេះ អាជ្ញាធរចិនកំពុងរៀបចំនីតិវិធីផ្សេងៗដើម្បីអនុញ្ញាតឱ្យនាំចូល។ នៅពេលរៀបចំរួចរាល់ គ្រឿងសមុទ្ររបស់ជប៉ុនអាចនាំចូលបានហើយ។ ទីភ្នាក់ងារគយចិនថ្លែងថាដំណើរការចរចារីកចម្រើនគួរឱ្យកត់សម្គាល់ក្រោយកិច្ចជំនួបដាច់ដោយឡែក១ទៀតពាក់ព័ន្ធនឹងការនាំទំនិញប្រភេទបន្លែទឹកទៅលក់នៅប្រទេសចិន។ ប្រតិកម្មចំពោះបញ្ហានេះ អ្នកនាំពាក្យជប៉ុនចាត់ទុកថានេះជាព្រឹត្តិការណ៍វិវត្តដ៏សំខាន់។ លោកថាជប៉ុននឹងក៏អំពាវនាវឱ្យចិននាំចូលទាំងសាច់គោជប៉ុនថែមទៀត។
អ្នកនាំពាក្យរូបនេះអំពាវនាវឱ្យប្រទេសចិនអនុញ្ញាតឱ្យនាំចូលឡើងវិញនូវកសិផល និងគ្រឿងសមុទ្រពីខេត្តចំនួនដប់របស់ជប៉ុនដែលជាប់បម្រាម។ ក្នុងនោះក៏មានខេត្តហ្វ៊ូគូស៊ីម៉ា និងទីក្រុងតូក្យូផងដែរ។ សូមបញ្ជាក់ថាមូលហេតុដែលអ្នកនាំពាក្យអំពាវនាវដូច្នេះព្រោះនៅក្នុងកិច្ចព្រមព្រៀងនោះមិនបាននិយាយពីតំបន់ទាំងនេះទេ។ មានន័យថានៅជាប់បម្រាមដដែល។
ទោះបីបើ់កឱ្យនាំចូលឡើងវិញក៏មិនមែននាំចូលដោយសេរីនោះដែរ។ ប្រទេសចិនមានវិធានការហ្មត់ចត់ដើម្បីធានាសុវត្ថិភាពចំណីអាហារ។ ចិនតម្រូវឱ្យជប៉ុនបង្កើតទីតាំងគ្រប់គ្រងគ្រឿងសមុទ្រក្រោមកិច្ចសហការជាមួយអាជ្ញាធរចិន។ មុននឹងនាំចូលប្រទេសចិន ទំនិញទាំងនេះត្រូវឆ្លងកាត់ការត្រួតពិនិត្យ និងចេញលិខិតបញ្ជាក់ពីអាជ្ញាធរចិនថាគ្មានសារធាតុវិទ្យុសកម្ម។
នៅល្ងាចថ្ងៃសុក្រ អ្នកនាំពាក្យក្រសួងការបរទេស លោកលីនចៀន (Lin Jian) ថ្លែងថាចិនបានពិនិត្យរួចហើយទៅលើសំណាកគ្រឿងសមុទ្រជប៉ុន និងមិនបានរកឃើញភាពខុសប្រក្រតីទេ។ លោកថ្លែងបន្តទៀតថារដ្ឋាភិបាលជប៉ុនបានផ្ដល់ការធានាដ៏ប្រាកដប្រជាថាខ្លួននឹងចាត់វិធានការហ្មត់ចត់ប្រកបដោយការជឿទុកចិត្តខ្ពស់ចំពោះរឿងនេះដើម្បីធានាគុណភាព និងសុវត្ថិភាពនៃគ្រឿងសមុទ្ររបស់ខ្លួនផង និងដើម្បីបំពេញគ្រប់លក្ខខណ្ឌនៃការអនុញ្ញាតឱ្យនាំចូលប្រទេសចិនផង៕
