By ទីក្រុងកៀវ៖ អ៊ុយក្រែនត្រៀមខ្លួនរួចជាស្រេចដើម្បីជួបគ្នាជាថ្មីដោយផ្ទាល់ជាមួយគណៈប្រតិភូរុស្ស៊ីនៅប្រទេសតួកគីនៅថ្ងៃចន្ទសប្ដាហ៍ក្រោយ។ លើកនេះលោកហ្សេឡិនស្គីក៏លែងទាមទារចង់ជួបមុខលោកពូទីនតទៅទៀតដែរ។ ធ្វើម៉េចឱ្យតែការចរចាគ្នានេះមានដំណើរការទៅមុខ។ ក្ដីសង្ឃឹមរបស់អ៊ុយក្រែនដែលចង់ចូលអង្គការណាតូនោះក៏ប្រហែលជាគ្មានផ្លូវដែរ។
ទីប្រឹក្សាកំពូលរបស់លោកហ្សេឡិនស្គីប្រកាសអំពីការត្រៀមជួបគ្នានេះបន្ទាប់ពីអ៊ុយក្រែននៅសញ្ជប់សញ្ជឹងជាច្រើនថ្ងៃមិនច្បាស់ថាតើគួរទៅចូលរួមកិច្ចជំនួបនោះដែរឬទេ។ ប៉ុន្តែលើកនេះច្បាស់ហើយថាអ៊ុយក្រែននឹងទៅ។ វិមានក្រឹមឡាំងបញ្ជាក់រួចហើយថាគណៈប្រតិភូរុស្ស៊ីចាប់ផ្ដើមរៀបចំខ្លួន និងរៀបចំឯកសារជាបណ្ដើរៗហើយ។ ទោះជាយ៉ាងណាក្ដី អ៊ុយក្រែនទាមទារឱ្យរុស្ស៊ីបញ្ជូនទៅឱ្យខ្លួនជាមុនសិននូវលក្ខខណ្ឌដែលរុស្ស៊ីចង់បានដើម្បីជាថ្នូរនឹងការបញ្ចប់សង្គ្រាម។
លោកអានឌ្រី យេម៉ាក់ (Andrii Yermak) (ទីប្រឹក្សាលោកហ្សេឡិនស្គី) ថ្លែងថាអ៊ុយក្រែនត្រៀមជួបគ្នានៅតួកគី ប៉ុន្តែចង់បានការពិភាក្សាគ្នាដោយស្ថាបនា។ មានន័យថាអ៊ុយក្រែនចង់ឃើញសេចក្ដីព្រាងនៃលក្ខខណ្ឌទាមទាររបស់រុស្ស៊ីជាមុនសិន។ នៅសល់បួនថ្ងៃទៀតដែរមុននឹងជួបគ្នា។ ដូច្នេះ លោកយល់ថារុស្ស៊ីមានពេលគ្រប់គ្រាន់ដើម្បីរៀបចំសំណុំឯកសារនោះ។
រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា (Andrii Sybiha) ថ្លែងថារដ្ឋាភិបាលរបស់លោកកំពុងរង់ចាំមើលផ្លូវរុស្ស៊ីផ្ញើសំណុំឯកសារមុនពេលជួបគ្នានៅតួកគី។ លោកចង់បញ្ចប់សង្គ្រាមនៅក្នុងឆ្នាំ២០២៥នេះតែម្ដង។ ដូច្នេះ លោកពិតជាចង់បានណាស់នូវបទឈប់បាញ់ដ៏ពេញលេញ និងឥតលក្ខខណ្ឌរយៈពេល៣០ថ្ងៃ។ បើបាន៥០ថ្ងៃ ឬ១០០ថ្ងៃរឹតតែប្រសើរ។
លោកថាអ៊ុយក្រែនបើកចិត្តទូលាយជានិច្ចដើម្បីពិភាក្សាអំពីបញ្ហានេះជាមួយសមភាគីរុស្ស៊ី។ ប្រមុខការទូតរូបនេះក៏គាំទ្រលទ្ធភាពនៃកិច្ចជំនួបកំពូលរវាងលោកហ្សេឡិនស្គី និងលោកពូទីនផងដែរ។ បើអាចធ្វើទៅបាន លោកចង់ឱ្យមានកិច្ចជំនួបត្រីភាគីជាមួយលោកត្រាំថែមទៀត។ បើតាមអ្នកនាំពាក្យវិមានក្រឹមឡាំង រុស្ស៊ីកំណត់ពេលជួបគ្នានៅថ្ងៃទី២ ខែមិថុនា។
កាលពីថ្ងៃពុធ រដ្ឋមន្ត្រីការបរទេសរុស្ស៊ីក៏បានប្រកាសអញ្ជើញអ៊ុយក្រែនទៅជួបគ្នានៅថ្ងៃទី២ ខែមិថុនាផងដែរ។ លោកឡាវរ៉ូស (Lavrov) ប្រកាសនៅក្នុងខ្សែអាត់វីឌីអូថាចាំទៅជួបគ្នានៅតួកគីសិនចាំរុស្ស៊ីបង្ហាញលក្ខខណ្ឌរបស់ខ្លួននៅពេលនោះតែម្ដង។ រដ្ឋមន្ត្រីការពារជាតិអ៊ុយក្រែនមិនជំទាស់នឹងគម្រោងជួបគ្នាទេទោះបីជួបថ្ងៃទី២ ខែមិថុនា ឬជួបពេលក្រោយៗទៀតក៏ដោយ។
ប៉ុន្តែបើរុស្ស៊ីមិនបង្ហាញលក្ខខណ្ឌឱ្យដឹងមុនជាដដែល លោកយល់ថាបើទុកជាជួបគ្នាក៏មិនសូវមានប្រយោជន៍ប៉ុន្មានដែរ។ លោកថាលោកបានប្រគល់ទៅឱ្យរុស្ស៊ីរួចហើយនូវលក្ខខណ្ឌរបស់អ៊ុយក្រែន។ សូមជម្រាបថាកាលពេលជួបគ្នាវគ្គមុននៅតួកគីនោះ ភាគីទាំង២មិនសូវចរចាគ្នាបានជាសាច់ការអ្វីប៉ុន្មានទេក្រៅពីយល់ព្រមដូរឈ្លើយសឹកគ្នាម្ខាងៗមួយពាន់នាក់៕
