By ព័ត៌មានក្លែងក្លាយជាប្រធានបទដែលប្រមុខរាជរដ្ឋាបាល ដែលតំណាងដោយស្ថាប័ននីតិប្រតិបត្តិ និងប្រមុខស្ថាប័ននិតិបញ្ញត្តិ តែងតែយកចិត្តទុកដាក់ និងលើកឡើងជាប្រចាំ សូម្បីតែពាក់ព័ន្ធនឹងរឿងបញ្ហាតានតឹងនៅព្រំដែនដែលបានកើតមានឡើងកាលពីថ្ងៃទី ២៨ ខែឧសភា ឆ្នាំ២០២៥ ។
រឿងព្រំដែន គឺជារឿងធំហើយអាចប៉ះពាល់ដល់ផលប្រយោជន៍ជាតិនិងប្រជាជន ។ ដូច្នេះ វាចាំបាច់ត្រូវតែធានាអោយបានថា ព័ត៌មានពិតត្រូវបានផ្សព្វផ្សាយអោយបានលឿនជាងព័ត៌មានក្លែងក្លាយដើម្បីបន្សាបពិសរបស់វា ។
សម្តេចធិបតីនាយករដ្ឋមន្ត្រី ហ៊ុន ម៉ាណែត តែងតែងសង្កត់ធ្ងន់បញ្ហានេះ ហើយសូម្បីតែនៅក្នុងពេល ជួបជុំជាមួយនឹងអ្នកសារព័ត៌មាន កាលពីថ្ងៃទី ០៣ ខែឧសភា ថ្មីៗនេះ ក៏បានលើកឡើងលើបញ្ហានេះ និងបានជំរុញនិងលើកទឹកចិត្តឲ្យអ្នកសារព័ត៌មានលើកកម្ពស់វិជ្ជាជីវៈ និងប្រយុទ្ធប្រឆាំងនឹងព័ត៌មានក្លែងក្លាយដែរ ។
ដោយឡែក សម្តេចតេជោ ហ៊ុន សែន ប្រធានព្រឹទ្ធសភា ក៏បានលើកជាប្រចាំដែរ ហើយថ្មីៗនេះពាក់ព័ន្ធ ការប៉ះទង្គិចដោយប្រដាប់អាវុធរវាងកងទ័ពកម្ពុជា និងថៃ នៅព្រំដែន នាតំបន់មុំបីខេត្តព្រះវិហារ សម្តេចតេជោក៏បានសង្កត់ធ្ងន់ លើការប្រយុទ្ធប្រឆាំងនឹងព័ត៌មានក្លែងក្លាយនេះផង
ដែរ ។
សម្តេចតេជោ ហ៊ុន សែន ស្នើឱ្យជនរួមជាតិស្ងប់ចិត្ត ហើយជឿជាក់លើការដឹកនាំរបស់រាជរដ្ឋាភិបាល និងកងកម្លាំងប្រដាប់អាវុធកម្ពុជា ក្នុងការដោះស្រាយតាមរយៈការចរចាជាងការដោះស្រាយដោយកម្លាំងប្រដាប់អាវុធ ។
សម្តេចបានអំពាវនាវដល់ប្រជាពលរដ្ឋអោយ ត្រូវប្រុងប្រយ័ត្នចំពោះព័ត៌មានក្លែងក្លាយ ដែលអាចរុញឱ្យផ្ទុះ សង្គ្រាមរវាងប្រទេសទាំងពីរ ។ ក្រៅពីថ្នាក់ដឹកនាំកំពូល ខាងក្រសួងព័ត៌មាន ក៏បានយកចិត្តទុកដាក់ខ្លាំងណាស់ដែរ លើការប្រយុទ្ធនឹងព័ត៌មានក្លែងក្លាយនេះ ដោយថែមទាំងប្រកាសនូវយុទ្ធនាការមួយផងដែរនៅក្នុងខែឧសភានេះ។
ប៉ុន្តែតើត្រូវបន្សាបព័ត៌មានក្លែងងក្លាយដោយរបៀបណា?
ចម្លើយចំំពោះសំណួរនេះ វានឹងតម្រូវអោយទាំងមន្ត្រី និងប្រជាជនចូលរួមយ៉ាងសកម្មដើម្បីផ្សព្វផ្សាយព័ត៌មានពិតអោយលឿន និងបានច្រើនដើម្បីបន្សាបព័ត៌មានក្លែងក្លាយ។ នៅពេលដែលព័ត៌មានពិតត្រូវបានបញ្ចេញយ៉ាងទាន់ពេលវេលានោះ ព័ត៌មានបែបចចាមអារ៉ាម ឬក៏ព័ត៌មានក្លែងក្លាយនឹងមិនមានឱកាស ដើម្បីជ្រៀបចូលដល់ខួរក្បាលរបស់ប្រជាជនឡើយ។
ក្នុងន័យនេះ វាចាំបាច់ដែលមន្ត្រីទទួលបន្ទុកផ្នែកព័ត៌មាន និងទំនាក់សាធារណ:បញ្ចេញព័ត៌មានពិតអោយបានរហ័ស។ នៅក្នុងស្ថានភាពវិបត្តិ ឬក៏សំខាន់ វានឹងរឹតតែមានភាពចាំបាច់នៅក្នុងការផ្តល់ព័ត៌មានពិតជូនដល់ប្រជាជនអោយបានរហ័ស។ មន្ត្រីរដ្ឋាភិបាលត្រូវយល់ដឹងអំពីយុទ្ធសាស្ត្រនៃការធ្វើទំនាក់ទំនងសាធារណ:នៅគ្រាហ៍មានវិបត្តិ ហើយបង្កើតជាក្រុមមួយទទួលខុសត្រូវក្នុងការធ្វើទំនាក់ទំនងសាធារណ:អោយមានប្រសិទ្ធភាពនៅក្នុងស្ថានភាពសំខាន់ដែលទាមទារអោយប្រជាជនទទួលព័ត៌មានពិតអោយបានទាន់ពេលវេលា។
ចំណែកប្រជាជនក៏គួរចូលរួមចែករំលែកព័ត៌មានពិតនេះ ហើយក៏ត្រូវមានការយល់ដឹងថា អ្វីជាព័ត៌មានពិត និងអ្វីជាព័ត៌មានមិនពិត។ ដើម្បីដឹងថា ព័ត៌មានណាមួយពិត ឬមិនពិត គេត្រូវមើលទៅលើប្រភពនៃការផ្តល់ព័ត៌មាននោះ ។ ឧទាហរណ៍ដូចជា ព័ត៌មាននោះបានផ្សព្វផ្សាយដោយសារព័ត៌មានមានវិជ្ជាជីវ: និងចុះបញ្ជីផ្លូវការត្រឹមត្រូវជាដើម វានឹងជាព័ត៌មានពិត ពីព្រោះសារព័ត៌មានវិជ្ជាជីវ:តម្រូវអោយផ្សព្វផ្សាយតែព័ត៌មានពិតប៉ុណ្ណោះ។
ចំណែកអ្វីដែលចេញដោយប្រភពផ្លូវការ ដូចជា មេដឹកនាំ ស្ថាប័នរដ្ឋ ឬអ្នកនាពាក្យស្ថាប័នរដ្ឋ ជាដើម្បីក៏ជាព័ត៌មានពិតផងដែរ ។ ផ្ទុយមកវិញ ព័ត៌មានដែលបញ្ចេញដោយប្រភពមិនច្បាស់លាស់ វានឹងអាចជាព័ត៌មានក្លែងក្លាយដែលគេបង្កើតឡើង ដើម្បីបំពុលសង្គម ឬក៏ដើម្បីលាភសក្ការ:ប៉ុណ្ណោះ ។
ជាទូទៅ ព័ត៌មានក្លែងក្លាយវាត្រូវបន្សាបដោយព័ត៌មានពិត ប៉ុន្តែនៅក្នុងករណីដែលព័ត៌មានពិត សម្រាប់បន្សាបនោះ វាយឺតពេកនោះ វានឹងមិនអាចបន្សាបព័ត៌មានក្លែងក្លាយបានមានប្រសិទ្ធភាពនោះឡើយ ។
សរុបទៅ ស្ថាប័នពាក់ព័ន្ធនានាព្រមទាំងប្រជាជនត្រូវចូលរួមយុទ្ធនាការនៅក្នុងការប្រយុទ្ធប្រឆាំងនឹង ព័ត៌មានក្លែងក្លាយ ពីព្រោះព័ត៌មានក្លែងក្លាយអាចមានចេតនាអាក្រក់ដែលាអាចបំផ្លាញដល់ប្រយោជន៍របស់ប្រជាជននិងប្រទេសកម្ពុជា៕
