By ទីក្រុងកៀវ៖ រុស្ស៊ីនៅពេលនេះប្រើយុទ្ធសាស្ត្រវាយផង និងចរចាផង។ ខណៈដែលខ្លួន និងអ៊ុយក្រែនត្រៀមជួបគ្នាជាថ្មីនៅតួកគីនាថ្ងៃចន្ទសប្ដាហ៍ក្រោយ រុស្ស៊ីឆ្លៀតវាយប្រហារអ៊ុយក្រែនដោយដ្រូន និងមីស៊ីលទៅលើទីក្រុងតូច-ធំនានាកាលពីពេលរំលងអធ្រាត្រឆ្លងចូលព្រឹកថ្ងៃសៅរ៍ បណ្ដាលឱ្យស្លាប់មនុស្សយ៉ាងតិច២នាក់។ ហេតុការណ៍នេះកើតឡើងនៅពេលគេមិនទាន់ច្បាស់ថាតើអ៊ុយក្រែននឹងយល់ព្រមជួបគ្នាដែរឬទេ។ អ៊ុយក្រែនយល់ព្រមជួបគ្នាលុះត្រាតែរុស្ស៊ីបញ្ជូនលក្ខខណ្ឌទៅឱ្យខ្លួនពិនិត្យមើលជាមុនសិន។
នៅក្នុងចំណោមដ្រូន១០៩គ្រឿង និងមីស៊ីល៥គ្រាប់នោះ អ៊ុយក្រែនបាញ់ធ្លាក់៤២គ្រឿង និង៣គ្រាប់។ នេះបើតាមការអះអាងរបស់កងទ័ពអាកាសអ៊ុយក្រែន។ ដោយឡែក ដ្រូន៣០គ្រឿងទៀតវង្វេងវង្វាន់នៅលើអាកាស មិនអាចវាយប្រហារគោលដៅចុងក្រោយបានឡើយ។ នៅក្នុងចំណោមជនរងគ្រោះដែលស្លាប់ទាំងនោះ ម្នាក់ជាកុមារីអាយុ៩ឆ្នាំរស់នៅភូមិដូលីនកា (Dolynka) នៃតំបន់ហ្សាប៉ូរីហ្សៀ (Zaporizhzhia)។ ក្រៅពីនេះ កុមារីជំទង់ម្នាក់ទៀតវ័យ១៦ឆ្នាំត្រូវរបួស។
អភិបាលតំបន់ហ្សាប៉ូរីហ្សៀបង្ហោះសារនៅលើតេឡេក្រាមថាផ្ទះមួយខ្នងត្រូវបានបំផ្លាញ ខណៈដែលផ្ទះជាច្រើនខ្នងទៀតមិនដល់ថ្នាក់ខូចខាតទាំងស្រុងទេ ប៉ុន្តែក៏រងការខូចខាតខ្លះៗដោយសារកម្លាំងផ្ទុះនៃអំបែងគ្រាប់។ រថយន្តជាច្រើនគ្រឿងក៏រងការខូចខាតផងដែរ។ ជនរងគ្រោះម្នាក់ទៀតជាបុរសរស់នៅតំបន់ខឺសុន (kherson) ស្លាប់ដោយសារអំបែងគ្រាប់ធ្លាក់លើ។
បើគេស្ដាប់ពីខាងភាគីរុស្ស៊ីវិញម្ដង ក្រសួងការពារជាតិរុស្ស៊ីថ្លែងថាកងទ័ពរបស់ខ្លួនទើបតែវាយយកបានភូមិឈ្មោះណូវ៉ូពីល (Novopil) នៅតំបន់ដូញ៉ែត (Donetsk) និងភូមិឈ្មោះវ៉ូដូឡាហ៊ី (Vodolahy) នៅតំបន់ស៊ូមី (Sumy)។ អាជ្ញាធរនៅស៊ូមីចេញបញ្ជាឱ្យជម្លៀសប្រជាជនជាបន្ទាន់ចេញពីទីតាំងចំនួន១១កន្លែងព្រោះកងទ័ពរុស្ស៊ីវាយសម្រុកកាន់តែកៀកខ្លាំងមែនទែន។
លោកហ្សេឡិនស្គីថ្លែងថារុស្ស៊ីថ្មីៗនេះបានចល័តកងទ័ព៥ម៉ឺននាក់ទៅតំបន់នោះដើម្បីបើកការវាយប្រហារទ្រង់ទ្រាយធំ។ អគ្គបញ្ជាការកងទ័ពអ៊ុយក្រែនថ្លែងថាកងទ័ពរុស្ស៊ីដាក់ផែនការចង់វាយយកតំបន់ផូករ៉ូស (Pokrovsk), ថូរេត (Toret) និងលីម៉ាន (Lyman) ដែលមានមូលដ្ឋាននៅដូញ៉ែត។ ក្រៅពីនេះ លោកថ្លែងថារុស្ស៊ីក៏បានចល័តកងទ័ពចូលតំបន់ស៊ូមីផងដែរ៕
