By ទីក្រុងមុយនិច ៖ ទីបំផុត ក្លិបបាល់ទាត់ Paris Saint-Germain បានបង្កើតប្រវត្តិសាស្ត្រទ្វីបអឺរ៉ុប ក្រោយគ្រងជើងឯកពានលំដាប់ទី១ប្រចាំទ្វីប UEFA Champions League ជាលើកដំបូងរបស់ខ្លួន ក្រោយបំបាក់មុខក្រុមយក្សអ៊ីតាលី Inter Milan កាលពីថ្ងៃទី៣១ ខែឧសភា ឆ្នាំ២០២៥។
ជំនួបវគ្គផ្តាច់ព្រ័ត្រ ដែលធ្វើឡើងនៅឯកីឡដ្ឋាន Allianz Arena ទីក្រុងមុយនិច ប្រទេសអាល្លឺម៉ង់ ក្រោមក្រសែភ្នែកអ្នកទស្សនាផ្ទាល់សរុប ៦៤ ៣២៧នាក់ និងរាប់រយលាននាក់ផ្សេងទៀតជុំវិញពិភពលោក បានបញ្ចប់ទៅយ៉ាងភ្ញាក់ផ្អើលជាទីបំផុតដោយក្រុមសេដ្ឋីបារាំង PSG បានបំបាក់ក្រុមយក្សអ៊ីតាលី Inter Milan ដោយលទ្ធផល ៥ទល់នឹង០។
ជ័យជម្នះដ៏ត្រចះត្រចង់បំផុតរបស់ក្រុមគ្រូបង្វឹកសញ្ជាតិអេស្ប៉ាញ លោក Luis Enrique សម្រេចបានដោយខ្សែការពារសញ្ជាតិម៉ារ៉ុក Achraf Hakimi ខ្សែបម្រើប្រយុទ្ធសញ្ជាតិបារាំង Désiré Doué ២គ្រាប់ម្នាក់ឯង ខ្សែបម្រើស្លាបសញ្ជាតិហ្សកហ្ស៊ី Khvicha Kvaratskhelia និងខ្សែបម្រើ Senny Mayulu ដើម្បីនាំ PSG គ្រងតំណែងជើងឯក UEFA Champions League រដូវកាល ២០២៤-២៥ និងលើកដំបូងក្នុងប្រវត្តិសាស្ត្រ ចាប់តាំងពីក្លិបមួយនេះ ត្រូវបានបង្កើតឡើងនៅឆ្នាំ ១៩៧០ ពោលរយៈពេល៥៤ឆ្នាំ។
មហាជនភ្ញាក់ផ្អើលយ៉ាងខ្លាំងជាមួយលទ្ធផល នឹងទម្រង់លេងរបស់ក្រុមទាំងពីរ ដោយ PSG បង្ហាញទម្រង់លេងកាចខ្លាំង ដាក់សម្ពាធ នឹងវាយសម្រុកខ្លាំងៗទៅលើគូប្រកួត ដ្បិតក្រុម Inter Milan ក្រោមការដឹកនាំរបស់គ្រូបង្វឹកសញ្ជាតិអ៊ីតាលី លោក Simone Inzaghi ដែលបានទម្លាក់ក្រុម Barcelona នៅវគ្គពាក់កណ្តាលផ្តាច់ព្រ័ត្រនោះ បែរជាបង្ហាញទម្រង់លេងមិនល្អនៅវគ្គផ្តាច់ព្រ័ត្រ។
សូមជម្រាបថា PSG ក្លាយជាម្ចាស់ជើងឯកពានរង្វាន់ UEFA Champions League ជាលើកទី៧០ ចាប់តាំងពីពានរង្វាន់លំដាប់ទី១អឺរ៉ុបមួយនេះ ត្រូវបានបង្កើតឡើងដំបូងនៅឆ្នាំ ១៩៥៥ និងជាក្រុមមកពីបារាំងទី២ បន្ទាប់ពីក្រុម Marseille ដែលឈ្នះកាលពីឆ្នាំ ១៩៩៣។ ចំណែក Inter Milan មានប្រវត្តិឈ្នះជើងឯកចំនួន ៣សម័យកាលផងដែរ នៅក្នុងឆ្នាំ ១៩៦៤, ១៩៦៥ និងឆ្នាំ ២០១០ ខណៈរហូតមកទល់ពេលនេះ រយៈពេល៧០ឆ្នាំហើយ Real Madrid នៅតែបន្តឈរជាក្លិបឈ្នះជើងឯកច្រើនជាងគេ ពោល១៥សម័យកាល៕
