By រាជធានីភ្នំពេញ ៖ យុវជនចំនួន ៦នាក់ រួមនិងម៉ូតូ ៦គ្រឿង ត្រូវបានកម្លាំងនគរបាលខណ្ឌព្រែកព្នៅ សហការជាមួយនឹងនគរបាលប៉ុស្តិ៍ ធ្វើការឃាត់ខ្លួន នាំមកអធិការដ្ឋានខណ្ឌ ដើម្បីអោយដោះដូរស៊ីម៉ាំងដើមធម្មតាវិញ និងធ្វើការអប់រំ បន្ទាប់ពីពួកគេជិះម៉ូតូជំពាក់ស៊ីម៉ាំង លាន់ឮសំឡេងខ្លាំង ដែលខុសលក្ខណៈបច្ចេកទេស ។
តាមនគរបាលខណ្ឌព្រែកព្នៅ បានឲ្យដឹងថា ដោយអនុវត្តតាមបទបញ្ជាផ្ទាល់ពីលោកឧត្តមសេនីយ៍ឯកជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅថ្ងៃទី៣១ ខែឧសភា ឆ្នាំ២០២៥ កម្លាំងផ្នែកយុត្តិធម៌ ផ្នែកអន្តរាគមន៍ បានសហកាជាមួយកម្លាំងប៉ុស្តិ៍នគរបាលរដ្ឋបាលពញាពន់ និងកម្លាំងប៉ុស្តិ៍នគរបាលរដ្ឋបាលពន្សាំង នៃអធិការដ្ឋាននគរបាលខណ្ឌព្រែកព្នៅ ធ្វើការឃាត់ម៉ូតូ ដែលប្រើប្រាស់បំពង់ស៊ីម៉ាំងបំពងសំឡេងកែច្នៃខុសលក្ខណៈបច្ចេកទេស បានចំនួន ០៦គ្រឿង នៅចំណុចលើផ្លូវ១៥១ ភូមិស្រែដូនតូច សង្កាត់ពញាពន់ ខណ្ឌព្រែកព្នៅ រាជធានីភ្នំពេញ ។
តាមនគរបាល បានឲ្យដឹងទៀតថា បន្ទាប់ពីឃាត់ខ្លួនយុវជនរូបនោះ បាននាំមកអធិការដ្ឋាន ដើម្បីសាកសួរ និងណែនាំឲ្យដោះដូរបំពង់ស៊ីម៉ាំងដើមធម្មតាវិញ រួចក៏បានអញ្ជើញអាណាព្យាបាល ឲ្យមកធានាយកទៅធ្វើការអប់រំបន្ត ។
គួរបញ្ជាក់ថា ប៉ុន្មានថ្ងៃនេះ ដោយមានបទបញ្ជាយ៉ាងម៉ឺនម៉ាត់ពីឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ កម្លាំងនគរបាលតាមបណ្ដាលខណ្ឌទាំង១៤ នៅក្នុងរាជធានីភ្នំពេញ បានបើកយុទ្ធនាការល្បាត នៅក្នុងមូលដ្ឋាន ហើយបង្ក្រាបក្រុមយុវជន ដែលជិះម៉ូតូធំតូច បំពាក់បំពង់ស៊ីម៉ាំងកែច្នៃខុសលក្ខណៈបច្ចេកទេស បង្កសំឡេងឮខ្លាំងៗ រំខានដល់ការរស់នៅ និងធ្វើដំណើររបស់ប្រជាពលរដ្ឋ ៕
