By រាជធានីភ្នំពេញ ៖ មហាជន ជាពិសេសបណ្តាអ្នកលេងបណ្តាញសង្គមបានសម្តែងការភ្ញាក់ផ្អើលយ៉ាងខ្លាំង បន្ទាប់ពីគេបានឃើញផលិតករលោក ហ៊ុយ យ៉ាឡេង ប្រកាសពីការលក់ក្រលៀនមួយចំហៀង ដើម្បីយកលុយទៅថតភាពយន្ត ខណៈលោកចាត់ទុកការផលិតភាពយន្តនេះ គឺជាអាយុជីវិតរបស់លោក ។
តាមរយៈបណ្តាញសង្គមលោក ហ៊ុយ យ៉ាឡេង បានបង្ហោះសំណេរថា ជីវិតខ្ញុំបើមិនបានផលិតភាពយន្តស្មើ និងស្លា.ប់ ខ្ញុំសូមប្រកាសលក់ក្រលៀនខ្លួនខ្ញុំមួយចំហៀងជូនបងប្អូន ដើម្បីបានថវិការថតភាពយន្ត ខ្ញុំត្រូវការថវិកា៦ម៉ឺនដុល្លារ ដើម្បីថតភាពយន្តរឿងព្រះរស់ ដែលនិយាយពីគុណរបស់មាតាបិតាយើងខ្ញុំអស់អ្វីលក់ហើយ សង្ឃឹមបងប្អូនជួយម្នាក់បន្តិចៗ ដើម្បីអោយខ្ញុំបាទបានថវិកាថត ហើយខ្ញុំ និងបរិច្ចាគក្រលៀនមួយចំហៀងទៅបងប្អូនដែលខ្វះខាត ហើយត្រូវការ សង្ឃឹមបងប្អូនដែលបានទស្សនាភាពយន្តរបស់ខ្ញុំទាំងអស់ជួយខ្ញុំហើយខ្ញុំ និងសងគុណទៅបងប្អូនដែលជួយខ្ញុំវិញដោយទស្សនាភាពយន្តរបស់ខ្ញុំដោយមិនគិតថ្លៃពេញមួយជីវិត ហើយខ្ញុំ និងខំប្រឹងផលិតភាពយន្តខ្មែរដើម្បីផ្សព្វផ្សាយទៅក្រៅប្រទេស ពេលនេះខ្ញុំកំពុងធ្វើការជាមួយមិត្តចិន ដើម្បីយកភាពយន្តរឿង ដើម្បីកូនចាក់ផ្សាយនៅទូរទស្សន៍ចិន CCTC 6 សង្ឃឹមថានិងបានជោគជ័យ ។
ជាការកត់សម្គាល់ ផលិតករភាពយន្ត លោក ហ៊ុយ យ៉ាឡេង មួយរយៈចុងក្រោយនេះ លោកបានប្រកាសពីការក្ស័យធនទៅលើរឿងផលិតភាពយន្តដាក់បញ្ចាំងនៅតាមរោងភាពយន្តនានា ដោយលោកងាកទៅធ្វើជំនួញដីឡូត៍ក្នុងខេត្តសៀមរាប និងបានប្រកាសលក់ផ្ទះ លក់ឡាន ដើម្បីយកលុយសងបំណុលធនាគារ ។
កាលពីអំឡុងឆ្នាំ២០២៣ ផលិតកររូបនេះក៏បានប្រកាសពីការលក់ផ្ទះផងដែរ ដើម្បីយកលុយសងធនាគារ ដោយសារតែលោកមានការខាតបង់ពីការផលិតភាពយន្តមួយរយៈចុងក្រោយនេះ ។ កត្តាដែលបង្ខំចិត្តឱ្យផលិតកររូបនេះប្រកាសលក់ផ្ទះដែលខំប្រឹងបង់រំលួសរាប់ខែរាប់ឆ្នាំនេះចោល ក៏ព្រោះតែលោកជាប់គាំងក្នុងបំណុលខ្ចីលុយគេផលិតរឿង ហើយនេះក៏ដោយសារតែខ្សែភាពយន្ដចុងក្រោយដែលលោកផលិត គឺរឿង «គ្រោះជីវិតកូវីដ១៩» ហាក់មិនទទួលបានការគាំទ្រ និងមិនមានអ្នកទៅទស្សនាច្រើនដែលជាហេតុធ្វើឱ្យលោករត់មិនរួច ជាមួយតម្លៃដែលខំផលិត ។
យ៉ាងណា មួយរយៈចុងក្រោយនេះគេក៏បានឃើញលោក ហ៊ុយ យ៉ាឡេង បានងាកមកចាប់ដៃផលិតភាពយន្តជាមួយផលិតកម្ម LD ហើយភាពយន្តដែលលោកបានសហការនេះក៏បានចាក់បញ្ចាំងតាមរោងភាពយន្តហើយដែរ ។ បន្ទាប់ពីដាក់សម្ពោធចាក់បញ្ចាំងស្នាដៃភាពយន្តថ្មីរបស់លោកដែលបានសហការជាមួយផលិតកម្ម LD លោក ហ៊ុយ យ៉ាឡេង បានលើកឡើងថា កន្លងមកលោកបានថតរឿងខាតមិនស្ទើរ ប៉ុន្តែឥឡូវលោកសហការជាមួយ LDដើម្បីឈានទៅរកភាពជោគជ័យថ្មី ហើយលោកនឹងធ្វើជាមួយគាត់(LD) ។
លោកបញ្ជាក់ថា លោកលែងទៅណាទៀតហើយ ងាកមកធ្វើវាឲ្យជាប់លាប់ មុនលោកទៅសៀមរាបលក់ដីឡូត៍ បើទោះបីជាភាពយន្ដនេះមិនជោគជ័យ ឬជោគជ័យកម្រិតណា លោកនឹងវិលមកចាប់អាជីពនិពន្ធ និងដឹកនាំសម្ដែងឡើងវិញឲ្យបានជាប់លាប់ហើយ ។
លោក ហ៊ុយ យ៉ាឡេង ចាហ្វាងផលិតកម្ម កថាជ័យភាពយន្ត មានស្នាដៃភាពយន្តល្បីៗដូចជា រឿងដើម្បីកូន, វិកលចរិត និងធ្នប់ជាដើម ៕
