By រដ្ឋាភិបាលអាយុទើបតែ៩ខែ ២សប្តាហ៍របស់ថៃ ពិតជាកង្វល់រឿងផលប៉ះពាល់នៃសេដ្ឋកិច្ចមួយជ្រុងថែមទៀត ប្រសិនបើការប៉ះទង្គិចនៅព្រំដែន នៅតំបន់មុំបី កាន់តែរីករាលដាលហើយឈានដល់បញ្ហាបិទព្រំដែនជាមួយនឹងប្រទេសកម្ពុជា ខណៈដែលពេលដែលស្ថានភាពសេដ្ឋកិច្ច របស់រាជាណាចក្រនេះ កំពុងតែស្រុតចុះ។
តាមសេចក្តីរាយការណ៍របស់សារព័ត៌មាន The Nation លោកស្រី ផៃថងថាន ស៊ីណាវ៉ាត្រា នាយករដ្ឋមន្ត្រី វ័យ៣៨ឆ្នាំ ហើយទើបតែកាន់តំណែង បាន៩ខែ២សប្តាហ៍ និងលោក ភូថាម វិឆាយ៉ាឆៃ ( Phumtham Wechayachai) ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិជំរុញឲ្យយោធាកុំឲ្យបិទព្រំដែនដោយលើកឡើងពីសំណើរបស់កម្ពុជា និងការព្រួយបារម្ភផ្នែកសេដ្ឋកិច្ច ជុំវិញការរំខានពាណិជ្ជកម្មឆ្លងព្រំដែន ។
រដ្ឋាភិបាលថៃ បានជំរុញឱ្យយោធាអនុវត្តការអត់ធ្មត់ជាការឆ្លើយតបទៅនឹងការកើនឡើងនៃភាពតានតឹងនៅតាមព្រំដែន បន្ទាប់ពីប៉ះទង្គិចគ្នា ព្រឹកថ្ងៃទី២៨ ខែឧសភា ឆ្នាំ២០២៥ ។ តាមសេចក្តីរាយការណ៍នោះ យោធាថៃពិតជាចង់បិទព្រំដែន ប៉ុន្តែរដ្ឋាភិបាលបានជំទាស់នឹងវិធានការនេះ ដោយលើកឡើងពីការព្រួយបារម្ភអំពីផលប៉ះពាល់សេដ្ឋកិច្ចដែលអាចកើតមាន ជាពិសេសលើពាណិជ្ជកម្មឆ្លងដែន និងការភ័យខ្លាចចំពោះការធ្វើឱ្យមានផលប៉ះពាល់កាន់តែធ្ងន់ធ្ងរដល់សេដ្ឋកិច្ចផ្ទៃក្នុងរបស់ប្រទេសថៃ ។
រដ្ឋាភិបាលថៃ បានសង្កត់ធ្ងន់លើសារៈសំខាន់នៃដំណោះស្រាយការទូត ជាពិសេសជាមួយនឹងកិច្ចប្រជុំគណៈកម្មាធិការព្រំដែនចម្រុះកម្ពុជា-ថៃ ដែលគ្រោងធ្វើនៅពាក់កណ្តាលខែមិថុនា ។ នៅក្នុងដំណាក់កាលនេះ ថៃពិតជាប្រយ័ត្នប្រយែងណាស់ ចំពោះវិបត្តិនានាដែលនាំឲ្យប៉ះពាល់ដល់សេដ្ឋកិច្ចពីព្រោះតែនៅពេលនេះ ក្បាលម៉ាស៊ីននៃកំណើនសេដ្ឋកិច្ចថៃ ដូចជា ការវិនិយោគ អំណាចនៃការទិញរបស់ពលរដ្ឋ ការនាំចេញ និងទេសចរណ៍ គឺសុទ្ធតែមាននិន្នការធ្លាក់ចុះ ។
កាលពីពេលថ្មីៗនេះ ក្រុមប្រឹក្សាអភិវឌ្ឍន៍សង្គម និងសេដ្ឋកិច្ចថៃបានអះអាងថា កំណើនសេដ្ឋកិច្ចថៃដែលពីមុនគេព្យាករណ៍ថា អាចសម្រេចបានត្រឹមតែ២,៨ភាគរយនោះនឹងបន្តធ្លាក់ចុះមកនៅត្រឹម១,៨ ភាគរយ ប៉ុណ្ណោះដោយសារតែវិបត្តិនៅក្នុងស្រុក និងបញ្ហានៅខាងក្រៅ ជាពិសេស គឺគំនាបពន្ធរបស់សហរដ្ឋអាមេរិក ។
អ្នកវិភាគបានលើកឡើងថា នៅក្នុងករណីបញ្ហាព្រំដែនកម្ពុជាឡើងកម្តៅ ហើយឈានដល់បិទព្រំដែន ទៀតនោះកម្រិតនៃផលប៉ះពាល់សេដ្ឋកិច្ចថៃ គឺកាន់តែធ្លាក់ចុះថែមទៀតពីព្រោះទំហំពាណិជ្ជកម្មរវាងកម្ពុជា និងថៃក៏មានទំហំគួរសម ។ កាលពីឆ្នាំ២០២៤ កន្លងទៅ ទំហំពាណិជ្ជកម្មទ្វេភាគីរវាងកម្ពុជានឹងថៃ គឺមានតម្លៃប្រមាណជាជាង៤ពាន់លានដុល្លារ នៅក្នុងនោះថៃនាំចេញមកកម្ពុជា គឺជាង៣ពាន់លានដុល្លារទៅហើយ ខណៈដែលកម្ពុជានាំចេញទៅថៃ ត្រឹមតែប្រមាណជិត៨០០លានដុល្លារប៉ុណ្ណោះ ។
ដោយឡែក តាមស្ថិតិរបស់អគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា នៅ៤ខែដើមឆ្នាំនេះ ពាណិជ្ជកម្មរវាងកម្ពុជា និងថៃឈានដល់ ១,៤៩ ពាន់លានដុល្លារ ដោយនៅក្នុងនោះការនាំចេញរបស់កម្ពុជាទៅកាន់ប្រទេសថៃ មានចំនួនសរុបត្រឹមតែជិត៣២៨លានដុល្លារប៉ុណ្ណោះ ។ ផ្អែកតាមតួលេខទាំងនេះ ការប៉ុនប៉ងណាមួយ ដើម្បីបិទព្រំដែននឹងធ្វើអោយប៉ះពាល់ដល់ការនាំចេញទំនិញរបស់ថៃធ្ងន់ជាងកម្ពុជា ។
តាមសេចក្តីរាយការណ៍របស់សារព័ត៌មានថៃ គ្រាន់តែច្រកប៉ោយប៉ែតមួយទេ មានរថយន្តដឹកជញ្ជូនទំនិញមួយថ្ងៃដល់ទៅ៣០០ជើង ហើយលំហូរអ្នកដំណើរ គឺប្រហែលជា២ពាន់នាក់ ។ ក្រៅពីច្រកប៉ោយប៉ែតចេញនោះ កម្ពុជានៅមានច្រកកម្រិតអន្តរជាតិជាមួយនឹងថៃប្រមាណជា៧កន្លែង និងច្រកទ្វារតំបន់ក៏ដូចជា ទ្វេភាគីមួយចំនួនបន្ថែមទៀត ។ ច្រកទាំងនោះ គឺសុទ្ធសឹងតែជាច្រកដោះដូរពាណិជ្ជកម្ម និងការតភ្ជាប់ ។
ពាក់ព័ន្ធនឹងបញ្ហានៃការប៉ះទង្គិចនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងយ៉ាងច្បាស់ៗ ហើយត្រូវបានចាក់ផ្សាយបន្តផ្ទាល់ចេញពីសមាជសភា និងព្រឹទ្ធសភាជាលើកដំបូងនាព្រឹក ថ្ងៃទី ០២ ខែមិថុនា ឆ្នាំ២០២៥ថា ដើម្បីរំលត់បញ្ហាដែលចាក់ស្រេះ និងបញ្ចប់ជម្លោះដ៏រ៉ាំរ៉ៃរវាងប្រទេសទាំងពីរ កម្ពុជាស្នើភាគីថៃគាំទ្រជំហរកម្ពុជា នៅក្នុងការនាំយកករណីព្រំដែននៅតំបន់ប្រទាញប្រទង់៤ កន្លែង គឺ តំបន់មុំ៣ ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ទៅកាន់តុលាការយុត្តិធម៌អន្តរជាតិ (ICJ) តែម្តង ។
សម្តេចធិបតីបានលើកឡើងថា នៅក្នុងករណី ដែលភាគីថៃមិនគាំទ្រក៏កម្ពុជានឹងបន្តដំណើរការ ដោះស្រាយតាមយន្តការនេះដដែល ប៉ុន្តែក៏មិនបដិសេធការបន្តដំណោះស្រាយលើយន្តការដែលមាន ស្រាប់ដែរ ប៉ុន្តែកម្ពុជាក៏បានត្រៀមខ្លួនរួចជាស្រេច ដោយរួមទាំងយោធា ដើម្បីការពារអធិបតេយ្យ និងទឹកដី ។
ដោយឡែក នៅក្នុងសមាជដដែល សម្តេចតេជោ ហ៊ុន សែន ប្រធានព្រឹទ្ធសភា ដែលបានដឹកនាំអង្គ សមាជនោះផ្ទាល់បានសម្តែងការគាំទ្រហើយលើកឡើងថា យន្តការដោះស្រាយរឿងព្រំដែននៅតំបន់ ប្រទាញប្រទង់នោះ គឺមិនរីកចម្រើនសោះ ក្រោយពេលដែលបានខិតខំដោះស្រាយតាមអនុស្សារណៈយោគយល់ដែលបានចុះតាំងពីឆ្នាំ២០០០មក ។ សម្តេចតេជោ បានបញ្ជាក់ថា ២៥ឆ្នាំ នៃការខិតខំ គឺគ្មានអ្វីក្រៅពីដើររកបង្គោលនៅតាមព្រំដែនចាស់ៗ ដូច្នេះកម្ពុជា និងថៃ គួរតែដឹកដៃគ្នាទៅកាន់តុលាការយុត្តិធម៌អន្តរជាតិ ជួយកាត់សេចក្តីបន្ថែមលើយន្តការដែលមានស្រាប់ ។ សម្តេចតេជោ ក៏បានបង្ហាញនូវក្តីសង្ឃឹមថា ការប៉ះទង្គិចនឹងមិនរីកធំ ហើយកិច្ចសហប្រតិបត្តិការ នានារវាងកម្ពុជា និងថៃនឹងនៅតែដដែល ៕
