By បរទេស ៖ តាមការបញ្ជាក់ពីលោក Fabrizio Romano អ្នកកាសែតកីឡាបាល់ទាត់ដ៏ល្បីជនជាតិអ៊ីតាលី តាមរយៈការបង្ហោះសារនៅលើបណ្តាញសង្គមកាលពីថ្ងៃទី៣ ខែមិថុនា ឆ្នាំ២០២៥ បានឱ្យដឹងថា កីឡាករ Bruno Fernandes បានបដិសេធសំណើប្រាក់ឈ្នួលដ៏ច្រើន ២៣១លានអឺរ៉ូ ឬ ២៦២លានដុល្លារអាមេរិកពីក្លិបយក្សនៅអារ៉ាប៊ីសាអូឌីត ដោយរូបគេចង់បន្តរួមរស់ជាមួយ Manchester United ក្នុងការប្រកួតលីគកម្រិតខ្ពស់បំផុត។
ខ្សែបម្រើសញ្ជាតិព័រទុយហ្គាល់ Bruno Fernandes បានបញ្ជាក់ថា រូបគេបានបដិសេធការផ្ទេរប្រាក់ទៅកាន់ប្រទេសអារ៉ាប៊ីសាអូឌីត ដោយសារតែចង់បន្តអាជីពក្នុងការប្រកួតកម្រិតខ្ពស់បំផុត។ ប្រធានក្រុមបិសាចក្រហម Man Utd វ័យ៣០ឆ្នាំរូបនេះ បានក្លាយជាប្រធានបទក្តៅនៃការរំពឹងទុកដែលភ្ជាប់ជាមួយការផ្ទេរក្នុងតម្លៃ១០០លានផោន ឬស្មើនឹង ១៣៥លានដុល្លារទៅចូលរួមជាមួយក្លិប Al-Hilal នៅលីគកំពូលអារ៉ាប៊ីសាអូឌីត Saudi Pro League។
លោក Fabrizio Romano បានរាយការណ៍ថា ក្លិប Al-Hilal បានផ្តល់ជូនប្រាក់ឈ្នួលដល់ខ្សែបម្រើឆ្នើមក្រុមជម្រើសជាតិព័រទុយហ្គាល់រូបនេះចំនួន ២៦២ដុល្លារសម្រាប់កុងត្រារយៈពេល៣ឆ្នាំ ដែលមានន័យថា មិត្តរួមក្រុមជម្រើសជាតិខ្សែប្រយុទ្ធ Cristiano Ronaldo រូបនេះ នឹងទទួលបានប្រមាណ ២៣៨,០០០ដុល្លារក្នុង១ថ្ងៃ ១,៧លានដុល្លារក្នុង១សប្តាហ៍ ៧,២លានដុល្លារក្នុង១ខែ និង ៨៧លានដុល្លារក្នុង១ឆ្នាំ។
ទោះមានការផ្តល់ជូនយ៉ាងក្រាស់ក្រែលបែបនេះក្តៅ ប៉ុន្តែ Bruno បានប្រាប់ថា បន្ទាប់ពីពិភាក្សាអំពីបញ្ហានេះជាមួយគ្រួសាររបស់ខ្លួនរួចហើយ រូបគេក៏បានជូនដំណឹងភ្លាមៗទៅកាន់ក្លិប Al-Hilal ថានឹងមិនចូលរួមជាមួយពួកគេនោះទេ។ ថ្លែងនៅមុនពេលការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ UEFA Nations League ដែើព័រទុយហ្គាល់ត្រូវតទល់នឹងអាល្លឺម៉ង់ នៅកីឡដ្ឋាន Allianz Arena ទីក្រុងមុយនិច នៅយប់ថ្ងៃទី៤ ខែមិថុនានេះ Bruno បានថ្លែងថា គ្រូបង្វឹក Man Utd លោក Ruben Amorim បានស្នើសុំខ្ញុំមិនឱ្យចាកចេញ ព្រោះក្លិបមិនចង់លក់ខ្ញុំនោះទេ។ ពួកគេបានប្រាប់ថាបើខ្ញុំចង់ទៅ ខ្ញុំអាចទៅបាន ប៉ុន្តែពួកគេមិនត្រូវការលុយនោះទេ។ ក្រោយមកខ្ញុំបានប្រាប់ចម្លើយទៅកាន់លោក Ruben Amorim ដែលមួយរយៈពេលចុងក្រោយ គាត់កំពុងជំរុញឱ្យខ្ញុំមិនចាកចេញ»។
កីឡាករសំខាន់របស់ Man Utd រូបនេះបានបន្ថែមថា «ខ្ញុំចង់លេងក្នុងកម្រិតខ្ពស់បំផុតដែលអាចធ្វើទៅបាន។ ខ្ញុំចង់លេងការប្រកួតធំៗ។ ខ្ញុំដឹងថាខ្ញុំនៅតែអាចធ្វើបាន ហើយខ្ញុំចង់សប្បាយចិត្តក្នុងការធ្វើអ្វីដែលខ្ញុំស្រលាញ់បំផុត។ រឿងល្អជាង ឬអាក្រក់ជាង នេះគឺជារបៀបដែលខ្ញុំឃើញបាល់ទាត់ ហើយខ្ញុំស្រលាញ់បាល់ទាត់ ហើយនេះជាការសម្រេចចិត្តដែលខ្ញុំបានធ្វើ»។
សូមជម្រាបថា Bruno Fernandes បានផ្លាស់ពីក្លិប Sporting Lisbon មកចូលរួមជាមួយ Man Utd កាលពីឆ្នាំ ២០២០ នៅក្នុងតម្លៃសរុប៨០លានអឺរ៉ូ។ គិតមកទល់ពេលនេះ រូបគេស៊ុតបញ្ចូលទីបាន ៩៨គ្រាប់ពីបង្ហាញខ្លួន ២៩០ប្រកួតគ្រប់កម្មវិធី ដោយជួយ Man Utd ឈ្នះពានរង្វាន់ FA Cup និង EFL Cup។ បច្ចុប្បន្នខ្សែបម្រើជាប់កុងត្រារហូតដល់ចុងខែមិថុនា ឆ្នាំ២០២៧រូបនេះ គឺជាកីឡាករទទួលបានប្រាក់ឈ្នួលច្រើនទី២ប្រចាំក្លិប Man Utd ពោលប្រមាណ១៩លានដុល្លារក្នុង១ឆ្នាំ តាមពីក្រោយខ្សែបម្រើការពារសញ្ជាតិប្រេស៊ីល Casemiro ដែលទទួលបានប្រមាណ ២២លានដុល្លារក្នុង១ឆ្នាំ៕ ដកស្រង់ ៖ BBC, The Guardian និង goal.com
