By រាជធានីភ្នំពេញ ៖ ប្រទេសកម្ពុជា និងឥណ្ឌូនេស៊ី មានសក្តានុពលខ្ពស់ក្នុងការពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ តែបច្ចុប្បន្ននៅមានកម្រិតនៅឡើយ ដែលទាមទារឱ្យមានការពង្រឹងទំនាក់ទំនងបន្ថែមទៀត ដូចជាបញ្ហាឡូជីស្ទិក និងការដឹងជញ្ជូនទាំងជើងទឹក និងជើងគោគ អ្នកប្រើប្រាស់កម្ពុជាមិនទាន់ស្គាល់ផលិតផលឥណ្ឌូនេស៊ីច្រើននៅឡើយ ហើយចំពោះអ្នកវិនិយោគឥណ្ឌូនេស៊ី មិនទាន់យកចិត្តទុកដាក់លើសក្តានុពលទីផ្សារកម្ពុជា ។
ឯកឧត្តម បណ្ឌិត សាន់តូ ដារម៉ូស៊ូមារតូ (Santo Darmosumarto) ឯកអគ្គរដ្ឋទូតនៃសាធារណរដ្ឋឥណ្ឌូនេស៊ី ប្រចាំព្រះរាជាណាចក្រកម្ពុជា នៅក្នុងវេទិកាសារព័ត៌មានស្ដីពី «ទំនាក់ទំនងការទូតកម្ពុជា-ឥណ្ឌូនេស៊ី និងការអភិវឌ្ឍនៅកម្ពុជា» ដែលបានប្រព្រឹត្តទៅកាលពីថ្ងៃទី ៤ ខែមិថុនា ឆ្នាំ ២០២៥ មកនេះនៅឯស្ថានទូតឥណ្ឌូណេស៊ី ប្រចាំកម្ពុជា បានលើកឡើងថា បញ្ហាទំនាក់ទំនងសេដ្ឋកិច្ចប្រទេសទាំងពីរនៅមានកម្រិតនៅឡើយ ដែលយើងត្រូវបន្តបង្កើនឱ្យបានច្រើនជាងនេះទាំងវិស័យពាណិជ្ជកម្ម ទាំងវិស័យវិនិយោគ ។
ឯកឧត្តម ឯកអគ្គរដ្ឋទូត បន្ថែមថា យើងអាចបង្កើនតាមរយៈឡូជីស្ទិក មធ្យោបាយដឹងជញ្ជូនតាមជើងទឹក និងជើងគោគ ឱ្យបានច្រើន ។ មួយវិញទៀតទាក់ទងផលិតផលឥណ្ឌូនេស៊ី ដែលនាំចូលមកកម្ពុជាមានចំនួនច្រើនហើយ ប៉ុន្តែប្រជាជនកម្ពុជាអត់ទាន់ស្គាល់ផលិតផលឥណ្ឌូនេស៊ី ទាំងអស់នោះនៅឡើយទេ ។ ក្រៅពីនេះ ផ្តល់ការណែនាំយ៉ាងណាដល់អ្នកវិនិយោគប្រទេសឥណ្ឌូនេស៊ី ដើម្បីចាប់យកការវិនិយោគនៅប្រទេសកម្ពុជា ព្រោះកន្លងមកឥណ្ឌូនេស៊ី តែងតែគិតថា ប្រទេសឥណ្ឌូនេស៊ី ជាប្រទេសធំមួយ ការវិនិយោគក៏ត្រូវការធំដែរ ដោយមិនទាន់បានសំឡឹងមើលទៅប្រទេសដែលតូចតាចថា ជាសក្តានុពលដែលជាផ្នែកមួយគាំទ្រដល់ទំនាក់ទំនងសេដ្ឋកិច្ចនោះទេ ។ ចំណុចនេះយើងត្រូវការជំរុញដល់អ្នកវិនិយោគឥណ្ឌូនេស៊ី ស្វែងយល់ឱ្យបានច្រើនអំពីសក្តានុពលដែលមាននៅក្នុងប្រទេសកម្ពុជា ។ ដូច្នេះទំនាក់ទំនងប្រទេសទាំងពីរក្នុងវិស័យសេដ្ឋកិច្ច ពាណិជកម្មផ្សេងៗ និងការវិនិយោគ អាចទៅរួចដោយសារភាពយល់ដឹងរវាងគ្នា និងគ្នា ។
ឯកឧត្តម ឯកអគ្គរដ្ឋទូត សាន់តូ ដារម៉ូស៊ូមារតូ បានរំលឹកថា នៅក្នុងជំនួបពិភាក្សារវាងសម្តេចអគ្គមហាសេនាបតីតេជោ ហ៊ុន សែន និងឯកឧត្តមប្រធានាធិបតីឥណ្ឌូនេស៊ី នាពេលកន្លងមក សម្តេចតេជោ បានលើកឡើងទាក់ទងនឹងមធ្យោបាយពីរបន្ថែមទៀតក្នុងទំនាក់ទំនងជាយុទ្ធសាស្ត្រគ្រប់ជ្រុងជ្រោយផ្តោតទៅលើកត្តាពីរសំខាន់ គឺទី ១ ការពង្រឹងទំនាក់ទំនងផ្នែកខាងសន្តិសុខស្បៀង និងទី ២ ផ្នែកថាមពល ដែលកន្លងមកមានតែសន្តិសុខស្បៀង តែអត់ទាន់មានសន្តិសុខថាមពលនៅឡើយទេ អ៊ីចឹងទេនេះជាផ្នែកមួយសំខាន់ក្នុងបង្កើនទំនាក់ទំនងសន្តិសុខថាមពល ហើយនិងសន្តិសុខស្បៀងដែលយើងមានស្រាប់ ។
ឯកឧត្តម ឯកអគ្គរដ្ឋទូត បានបញ្ជាក់បន្ថែមថា ការពង្រឹងកិច្ចសហប្រតិបត្តិការផ្នែកពាណិជ្ជកម្មរវាងប្រទេសទាំងពីរ គឺសំខាន់ណាស់ក្នុងការណែនាំនូវផលិតផលឥណ្ឌូនេស៊ី ឱ្យបានស្គាល់ច្រើនក្នុងប្រទេសកម្ពុជា ដែលក្នុងនោះមានសកម្មភាពដូចជាពិពរ័ណ៍សួស្តីឥណ្ឌូនេស៊ី ជាដើមដោយណែនាំផលិតផលឥណ្ឌូនេស៊ីដែលមាននៅក្នុងប្រទេសកម្ពុជាស្រាប់ទៅកាន់បងប្អូនកម្ពុជាដើម្បីបានស្គាល់បន្ថែម ។ បង្កើនទស្សនកិច្ចការងារក្រុមអ្នកវិនិយោគ ក៏ដូចជាក្រុមពាណិជ្ជករកម្ពុជាចូលរួមក្នុងការតាំងពិព័រណ៍ពាណិជ្ជកម្មឥណ្ឌូនេស៊ី ដែលតែងតែធ្វើរាល់ឆ្នាំដើម្បីបង្ហាញផលិតផលកម្ពុជាទៅកាន់ភាគីឥណ្ឌូនេស៊ី ក៏ដូចជាការបង្ហាញផលិតផលឥណ្ឌូនេស៊ី ទៅកាន់បងប្អូនកម្ពុជាដែរ ។
ឯកឧត្តម ឯកអគ្គរដ្ឋទូត ថា យើងរកមធ្យោបាយធ្វើយ៉ាងណាដើម្បីឱ្យផលិតផលរបស់កម្ពុជានាំចេញកាន់តែច្រើនទៅកាន់ឥណ្ឌូនេស៊ី ហើយអាចជួយជំរុញយ៉ាងណាដើម្បីស្គាល់ផលិតផលរបស់កម្ពុជាប៉ុន្មានប្រភេទដែលអាចនាំចេញទៅកាន់ប្រទេសឥណ្ឌូនេស៊ី បន្ថែមទៀត ។ យើងចង់បង្កើនវិស័យពាណិជ្ជកម្មឱ្យបានច្រើន ទាំងការនាំចេញពីឥណ្ឌូនេស៊ីមកកម្ពុជា ក៏ដូចជាពីកម្ពុជាមកឥណ្ឌូនេស៊ីផងដែរ ។ យើងចង់នាំអ្នកវិនិយោគពីឥណ្ឌូនេស៊ីឱ្យបានច្រើនមកទស្សនាប្រទេសកម្ពុជា ដើម្បីឱ្យបានយល់ពីសក្តានុពលក៏ដូចជាវិស័យផ្សេងៗដែលកម្ពុជាមាន ៕
