By ថៃ ៖ សារព័ត៌មានខៅសធ បានចេញផ្សាយព័ត៌មានទាន់ហេតុការណ៍នៅរសៀល ថ្ងៃទី០៥ ខែមិថុនា ឆ្នាំ២០២៥ថា អាជ្ញាធរនៃបណ្តាខេត្តជាច្រើនត្រូវបានព្រមានឱ្យត្រៀមបង្ការ ដោយប្រុងប្រយ័ត្នចំពោះភ្លៀងធ្លាក់ខ្លាំងជោគជាំដែលនាំមកនូវហានិភ័យនៃការរអិលបាក់ដី និងទឹកជំនន់ភ្លាមៗ ជាពិសេសកងកម្លាំង និងអាជ្ញាធរនៅតាមមូលដ្ឋានក្នុងតំបន់ហានិភ័យត្រូវតែត្រៀមឆ្លើយតប និងតាមដានស្ថានការណ៍ឱ្យបានដិតដល់ជាទីបំផុត ។
នាថ្ងៃទី០៥ ខែមិថុនា ឆ្នាំ២០២៥ មន្ត្រីជំនាញមកពីនាយកដ្ឋានភូគព្ភសាស្ត្រ និងនាយកដ្ឋានធនធានរ៉ែនៃក្រសួងធនធានធម្មជាតិ និងបរិស្ថានថៃ បានព្យាករណ៍ថា នឹងមានភ្លៀងធ្លាក់ខ្លាំងជាបន្តបន្ទាប់នៅតំបន់ដែលមានហានិភ័យនៃការបាក់ដី នៅក្នុងប្រទេសថៃ ជាពិសេស បណ្តាខេត្តនាតំបន់ភាគខាងត្បូង ដែលរួមមានដូចជា ខេត្តរ៉ាក់ណង, ខេត្តផាងង៉ា, ខេត្តក្រាប៊ី និងខេត្តភូកេត ដែលខេត្តទាំងនេះនឹងមានភ្លៀងធ្លាក់ខ្លាំងក្លាជាងគេ ហើយក៏តំបន់ដែលនឹងរងគ្រោះធ្ងន់ធ្ងរមុនគេផងដែរ ដោយសារតែហេតុការណ៍រអិលបាក់ដី និងទឹកជំនន់រហ័ស។
អាស្រ័យហេតុនេះ បណ្តាញអ្នកស្ម័គ្រចិត្ត និងក្រុមសង្គ្រោះដែលប្រចាំការនៅតំបន់ហានិភ័យខាងលើត្រូវតែតាមដានស្ថានការណ៍គ្រោះធម្មជាតិ គ្រោះរអិលបាក់ដី និងទឹកជំនន់ភ្លាមៗ ក៏ដូចជា ត្រៀមលក្ខណៈសម្រាប់សង្គ្រោះ ។
អាជ្ញាធរពាក់ព័ន្ធក្នុងតំបន់ត្រូវបានស្នើឲ្យតាមដានស្ថានការណ៍ឲ្យបានដិតដល់ និងធ្វើបច្ចុប្បន្នភាព ជាបន្តបន្ទាប់ទៅកាន់ពលរដ្ឋ ក្នុងមូលដ្ឋាន រៀងៗខ្លួន ។ បើមានគ្រោះធម្មជាតិកើតឡើង មន្ត្រីជំនាញត្រូវចុះពិនិត្យតំបន់ឧបទ្ទវហេតុភ្លាមៗ ដើម្បីបង្កើតទំនុកចិត្ត និងផ្តល់ការណែនាំបឋមដល់ប្រជាពលរដ្ឋនៅតំបន់គ្រោះថ្នាក់ ។
ក្រៅពីសេចក្តីជូនដំណឹងរបស់នាយកដ្ឋានធនធានរ៉ែ នៃក្រសួងធនធានធម្មជាតិ និងបរិស្ថានថៃ នៅថ្ងៃនេះ នាយកដ្ឋានឧតុនិយមថៃ ក៏បានឲ្យដឹងដូចគ្នាដែរថា ការព្យាករណ៍អាកាសធាតុរយៈពេល២៤ម៉ោងខាងមុខ ប្រទេសថៃនឹងនៅតែភ្លៀងធ្លាក់ខ្លាំង បូករួមនឹងបាតុភូតមានផ្គររន្ទះ ខ្យល់កន្ត្រាក់ នៅតាមខេត្តមួយចំនួន ក្នុងតំបន់ភាគឦសានខាងលើ និងបណ្តាខេត្តតាមឆ្នេរសមុទ្រនៅភាគខាងត្បូងប្រទេស ។
យោងលើស្ថានភាពនេះ ប្រជាពលរដ្ឋដែលរស់នៅតំបន់ដែលត្រូវបានព្យាករណ៍ត្រូវបានស្នើឱ្យប្រុងប្រយ័ត្ន ហើយក្រៅពីប្រយ័ត្ននៅលើដីគោកក៏ត្រូវតែប្រយ័ត្នដូចគ្នា នៅលើផ្ទៃសមុទ្រព្រោះថា ប៉ុន្មានថ្ងៃនេះ រលកសមុទ្របាននឹងកំពុងហក់ឡើងខ្ពស់ៗកម្ពស់លើសពីជាង២ម៉ែត្រ ហើយសម្បូរទៅដោយខ្យល់បោកបក់ខ្លាំង ខ្យល់កន្ត្រាក់ និងព្យុះផ្គររន្ទះនៅកណ្តាលសមុទ្រ ដែលអាចបង្កគ្រោះថ្នាក់ក៏ដូចជា អាចពន្លិចទូកនេសាទ និងនាវាខ្នាតតូចបានដោយងាយ បើសិនជាហ៊ានបើកឆ្លងកាត់ចូលទៅតំបន់ទាំងនោះ ៕
