By រាជធានីភ្នំពេញ ៖ អគ្គរាជទូតប្រចាំ នៅប្រទេសថៃ បានបញ្ជាក់ថា ស្ថានទូត កំពុងបើកដំណើរការផ្តល់សេវានានា ជូនបងប្អូនប្រជាពលរដ្ឋខ្មែរ និងបរទេស ជាធម្មតា ។
ឯកឧត្តម ហ៊ុន សារឿន ឯកអគ្គរាជទូតកម្ពុជា ប្រចាំប្រទេសថៃ បានឲ្យដឹងនៅថ្ងៃទី៦ ខែមិថុនា ឆ្នាំ២០២៥ថា
ដោយមានបងប្អូនជាច្រើន បានសម្តែងក្តីបារម្ភចំពោះមន្ត្រី បុគ្គលិក និងស្ថានទូតកម្ពុជា ប្រចាំប្រទេសថៃ បន្ទាប់ពីទទួលបានដំណឹងអំពីការប្រមូលផ្តុំធ្វើបាតុកម្មរបស់បណ្តាញនិស្សិត និងប្រជាជន ដើម្បីកែទម្រង់ប្រទេសថៃ នៅមុខស្ថានទូតកម្ពុជា ប្រចាំប្រទេសថៃ ក្នុងទីក្រុងបាងកក នៅព្រឹកថ្ងៃទី០៦ ខែមិថុនា ឆ្នាំ២០២៥ ។
ឯកឧត្តមបានបញ្ជាក់ថា ៖ “ខ្ញុំបាទ តាងនាមមន្ត្រីបុគ្គលិកស្ថានទូតទាំងអស់ សូមជម្រាបជូនបងប្អូនមេត្តាជ្រាបថា ៖ កាលពីវេលាម៉ោង១០:០០នាទីព្រឹក ថ្ងៃទី០៦ ខែមិថុនា ឆ្នាំ២០២៥ ក្រុមបាតុករ ដែលហៅខ្លួនឯងថា «បណ្តាញនិស្សិត និងប្រជាជន ដើម្បីកែទម្រង់ប្រទេសថៃ» បានប្រមូលផ្តុំគ្នាចំនួនប្រមាណ ២០០នាក់ នៅទីតាំងដងផ្លូវម្ខាងទៀត ទល់មុខស្ថានទូតកម្ពុជា ដើម្បីធ្វើបាតុកម្ម ថ្លែងញត្តិ ទាមទារឲ្យកម្ពុជា គោរពអធិបតេយ្យជាតិថៃ ។
ឯកអគ្គរាជទូត បានឲ្យដឹងថា ការប្រមូលផ្តុំ បានប្រព្រឹត្តទៅដោយធម្មតា មានសណ្តាប់ធ្នាប់ និងរំសាយទៅវិញ នៅវេលាម៉ោង ១១:១៥នាទីព្រឹក ថ្ងៃដដែល ។
ចំពោះបាតុកម្ម ឯកឧត្តមទូតបានឲ្យដឹងទៀតថា សមត្ថកិច្ចនគរបាលថៃ បានដាក់កម្លាំងការពារសុវត្ថិភាព ជូនស្ថានទូត និងមន្ត្រីបុគ្គលិករបស់ស្ថានទូត យ៉ាងហ្មត់ចត់ល្អប្រសើរ។ មន្ត្រីបុគ្គលិក នៃស្ថានទូតទាំងអស់ មានសុវត្ថិភាព បាននិងកំពុងបន្តបំពេញការងាររបស់ខ្លួនជាប្រក្រតី ។
ឯកឧត្តមទូតបានបញ្ជាក់ទៀតថា ៖ ” ស្ថានទូត កំពុងបើកដំណើរការផ្តល់សេវានានា ជូនបងប្អូនប្រជាពលរដ្ឋខ្មែរ និងបរទេស ជាធម្មតា ។ សូមបងប្អូនទាំងអស់ មេត្តាជ្រាបជាព័ត៌មាន និងសូមទទួលនូវការគោរពរាប់អានដ៏ស្មោះស្ម័គ្រពីយើងខ្ញុំ ជាមន្ត្រីបុគ្គលិកនៃស្ថានទូតកម្ពុជាប្រចាំប្រទេសថៃទាំងអស់” ៕
