By អាមេរិក៖ មេដឹកនាំនៃស្តាំនិយម Proud Boys ចំនួន ៥នាក់ បានដាក់ពាក្យប្តឹងទាមទាប្រាក់សំណងចំនួន ១០០លានដុល្លារពីរដ្ឋាភិបាលអាមេរិក ជុំវិញករណីកាត់ទោសពួកគេដោយភាពលម្អៀង នេះបើយោងតាមការចុះផ្សាយរបស់បណ្តាញសារព័ត៌មាន BBC នៅក្នុងថ្ងៃសៅរ៍ ទី៧ ខែមិថុនា។ គួររម្លឹកជូនថា ការកាត់ទោសដ៏ចម្រូងចម្រាសនេះបានកើតឡើងក្រោមមានព្រឹត្តិការណ៍កុបកម្មនៅវិមានកាពីតូល សហរដ្ឋអាមេរិក កាលពីថ្ងៃទី៦ ខែមករា ឆ្នាំ២០២១ កន្លងទៅ។
នៅក្នុងពាក្យបណ្តឹងរបស់ក្រុមសកម្មជនទាំង ៥នេះ បានបញ្ជាក់ថា ក្រុមប៉ូលិស FBI របស់រដ្ឋាភិបាលអាមេរិក និងព្រះរាជអាជ្ញាធរ បានកាត់ទោសចំពោះករណីធ្វើកុបកម្មរបស់ពួកគេដោយមិនយុត្តិធម៌ ពោលគឺមានភាពលម្អៀងជាលក្ខណៈបុគ្គល ដ្បិតក្រុមអាជ្ញាធរនៅពេលនោះមានទំនោរប្រឆាំងនឹងពួកគេ ដែលជាអ្នកគាំទ្រនយោបាយរបស់លោក ដូណាល់ ត្រាំ។ នៅក្នុងពាក្យបណ្តឹងបានបន្តថា ការកាត់ទោសដោយលម្អៀងជាលក្ខណៈបុគ្គលនេះ គឺជាសកម្មភាពប្រាសចាកទាំងស្រុងទៅនឹងច្បាប់រដ្ឋធម្មនុញ្ញរបស់សហរដ្ឋអាមេរិក ហើយពួកគេត្រូវតែប្តឹងទាមទារកយុត្តិធម៌សម្រាប់ពួកគេ ដែលជាពលរដ្ឋស្លូតត្រង់រហូតដល់ទីបញ្ចប់៕
អត្ថបទ៖ ភក្តី
ប្រភព៖ BBC
