By របាយការណ៍របស់អគ្គស្នងការដ្ឋាននគរបាលជាតិដដែលបានឲ្យដឹងថា បើគិតក្នុងរយៈពេល៥ខែ ឆ្នាំនៃ២០២៥ គ្រោះថ្នាក់ចរាចរណ៍បានកើតឡើងដល់ទៅ១.០២៥លើក ដោយបានសម្លា.ប់ជីវិតមនុស្សចំនួន ៥៩០នាក់ និងរងរបួសធ្ងន់ស្រាល សរុបដល់ទៅ១.២៤១នាក់ ។
ស្ថានភាពនៃគ្រោះថ្នាក់ចរាចរណ៍នៅក្នុងអំឡុងពេលនេះ គឺវាកើតឡើងសឹងតែជិតពាក់កណ្តាលនៃករណីគ្រោះថ្នាក់ចរាចរណ៍ដែលបានកើតមានឡើងពេញមួយឆ្នាំ២០២៤ ។ ដូច្នេះ ប្រសិនបើយើងទាំងអស់គ្នាបន្តយកចិត្តទុកដាក់ បើកបរដោយស្មារតីទទួលខុសត្រូវ ប្រុងប្រយ័ត្នគ្រប់ពេលដែលកាន់ចង្កូតយានយន្ត យើងអាចបន្តធ្វើឲ្យប្រសើរឡើងបន្ថែមទៀត នៅក្នុងការកាត់បន្ថយករណីស្លា.ប់ និងរបួសដោយសារតែគ្រោះថ្នាក់ចរាចរណ៍នេះ ។
តាមការកត់ត្រារបស់ក្រសួងសាធារណៈការ និងដឹកជញ្ជូនបានឲ្យដឹងថា កាលពីឆ្នាំទៅគ្រោះថ្នាក់កើតឡើងចំនួន២.៨៤៤លើក អ្នកស្លា.ប់ចំនួន១.៥០៩នាក់ ក្រៅពីនោះរបួសធ្ងន់ចំនួន២.២៧៣នាក់ និង របួសស្រាល១.៤៤៧នាក់ ។
ផ្អែកតាមស្ថិតិដែលកត់ត្រា នៅក្នុងរយៈពេល៥ខែយើងអាចដឹងថា នៅក្នុងមួយថ្ងៃមានគ្រោះថ្នាក់ ចរាចរណ៍កើតមានឡើងប្រមាណជា៦,៨ លើក ហើយវាអាចសម្លា.ប់មនុស្សប្រមាណជា៣,៩ នាក់ជាមធ្យម ។ ស្ថិតិនេះថយចុះបន្តិច ពីព្រោះថា កាលពីឆ្នាំ២០២៤ នៅក្នុងមួយថ្ងៃកម្ពុជាមានគ្រោះថ្នាក់ចរាចរណ៍ជាមធ្យមប្រមាណជា៧,៧ លើក ហើយចំនួនអ្នកដែលគ្រោះថ្នាក់ដល់ជីវិត គឺក៏ច្រើនជាងដែរ ពោល គឺដល់ទៅ៤,១ នាក់នៅក្នុងមួយថ្ងៃជាមធ្យម ។
មកដល់ពេលនេះ តាមអ្វីដែលសមត្ថកិច្ចបានលើកឡើង មូលហេតុនៃគ្រោះថ្នាក់ចរាចរណ៌ គឺអត់មានអ្វីថ្មីទេ គឺដដែលៗដោយរួមមានល្បឿន មិនគោរពសិទ្ធិ មិនប្រកាន់ស្តាំ បត់គ្រោះថ្នាក់ ប្រជែងគ្រោះថ្នាក់កត្តាយានស្រវឹងអាកាសធាតុមិនគោរពភ្លើងសញ្ញា ងងុយគេង និងកត្តាផ្លូវ ។
ដូច្នេះ ពេលបើកបរ សូមចៀសវាងកត្តាខាងលើនេះ ។ ពេលនោះយើងទាំងអស់គ្នាបានរួមគ្នាកាត់បន្ថយគ្រោះថ្នាក់ចរាចរណ៍ និងការស្លា.ប់ និងរបួសតាមដងផ្លូវជាមិនខាន ៕
