By រាជធានីភ្នំពេញ ៖ រថយន្តនីស្សាន់ ណាវ៉ារ៉ា១គ្រឿង បើកបរក្នុងល្បឿនលឿន បានជ្រុលទៅបុករថយន្តឡង់គ្រីស្ស័រ បណ្តាលឱ្យខ្ទាតទៅម្ខាងផ្លូវខូចខាតធ្ងន់ទាំងសងខាង ហើយភាគីខាងរថយន្តឡង់គ្រីស្ស័រ ដែលមានតំណាងប្រាប់់ គេ ថាជា នគរបាលព្រហ្មទណ្ឌ បានទាមទារឲ្យសមត្ថកិច្ចវាស់ជាតិអាល់កុលភាគីខាងរថយន្តនីស្សាន់នៅកន្លែកើតហេតុ ។
ដោយសារមានការទាមទារនេះ ទើបបង្កឲ្យមានការប្រកែកតវ៉ាជាមួយនគរបាលចរាចរណ៍ កាលពីវេលាម៉ោងប្រមាណ១១និង៥០នាទីយប់ថ្ងៃទី៩ ខែមិថុនា ឆ្នាំ២០២៥កន្លងទៅ នៅចំណុចកែងរវាងផ្លូវភ្នំពេញ-ហាណូយ និងផ្លូវឧកញ៉ា ម៉ុងឫទ្ធី ចំណុចស្តុប២៤ម៉ោង ក្នុងសង្កាត់គោកឃ្លាង ខណ្ឌសែនសុខ ។ប្រភពព័ត៌មានបានឲ្យដឹងថា រថយន្តឡង់គ្រីស្ស័រ ពណ៌ស ធ្វើដំណើរតាមផ្លូវភ្នំពេញ-ហាណូយពីខាងជើងទៅខាងត្បូងក្នុងល្បឿនលឿន ។
លុះទៅដល់ចំណុចខាងលើ ស្រាប់តែមានរថយន្ដនីស្សាន់ ណាវ៉ារ៉ា ពណ៌ខ្មៅ ពាក់ផ្លាកលេខ កម្ពុជាIM-KETYA បើកបរក្នុងល្បឿនលឿនតាមយផ្លូវសម្តេច ជា ស៊ីម ពីខាងលិចទៅខាងកើតឆ្ពោះទៅផ្លូវឧកញ៉ា ម៉ុង ឫទ្ធី បានជ្រុលទៅបុករថយន្តឡង់គ្រីស្ស័រពេញទំហឹង ។ គ្រោះថ្នាក់នេះ បណ្តាលឲ្យរថយន្តខ្ទាតទៅផ្លូវម្ខាងទៀត ខូចខាតធ្ងន់ទាំងសងខាង ដោយរថយន្តឡង់គ្រីស្ស័រខូចខាតផ្នែកខាងស្ដាំ ចំណែករថយន្ត នីស្សាន់ខូចខាតផ្នែកខាងមុខ ។
ប្រភពព័ត៌មានឲ្យដឹងទៀតថា ក្រោយពីមានគ្រោះថ្នាក់ អ្នកបើកបររថយន្តនីស្សាន់ មិនព្រមចុះពីលើរថយន្តទេ និងបានទាក់ទងទៅរកតំណាងឱ្យមកជួយដោះស្រាយ ។ បន្ទាប់មកភាគីខាងរថយន្តនីស្សាន់បានសម្របសម្រួលជាមួយខាងរថយន្តឡង់គ្រីស្ស័រ តែដោយការខូចខាតធ្ងន់ពេក ភាគីទាំងសងខាងដោះស្រាយមិនត្រូវគ្នាឡើយ ។
នៅពេលនោះ ភាគីខាងរថយន្តឡង់គ្រីស្ស័រចង់ឲ្យនគរបាលវាស់ជាតិអាល់កុលអ្នកបើកបរ រថយន្តនីស្សាន់នៅនឹងកន្លែងកើតហេតុតែម្តងក៏បង្កឲ្យមានការប្រកែកតវ៉ាជាមួយសមត្ថកិច្ច ហើយសមត្ថកិច្ចបានប្រាប់ថា ត្រូវយកអ្នកបើកបរទៅវាស់ជាតិអាល់កុលនៅអធិការដ្ឋានខណ្ឌសែនសុខ ។ បន្ទាប់មក នគរបាលចរាចរណ៍ខណ្ឌសែនសុខ បានធ្វើការវាស់វែងនិងយករថយន្តទាំង២គ្រឿងទៅរក្សាទុកជាបណ្ដោះអាសន្ន ដើម្បីដោះស្រាយនៅពេលក្រោយ ៕
