By ទីក្រុងវ៉ាស៊ីនតោន៖ លោកនូសោម (New Som) ជាអភិបាលរដ្ឋកាលីហ្វ័រញ៉ាដែលកំពុងកើតមានចលនាបាតុកម្មយ៉ាងពុះកញ្ជ្រោលប្រឆាំងនឹងផែនការរបស់លោកត្រាំដែលចង់បណ្ដេញជនអន្តោប្រវេសន៍ខុសច្បាប់។ លោកបាននិយាយផ្គើនដាក់លោកត្រាំថាបើចិត្តសឿងចាប់ខ្លួនគាត់ទៅ។ អភិបាលរដ្ឋកាលីហ្វ័រញ៉ារូបនេះជាមនុស្សរបស់គណបក្សប្រជាធិបតេយ្យ។ អីចឹងហើយបានជាជំហររបស់គាត់មិនស្របនឹងលោកត្រាំទេ។
ការដែលលោកនូសោមហ៊ានប្រើសម្ដីផ្គើនដាក់លោកត្រាំយ៉ាងដូច្នេះបន្ទាប់ពីត្រាំព្រមានចាប់ខ្លួនលោកបើលោកជាមន្ត្រីផ្នែកអន្តោប្រវេសន៍ដូចជាលោកថម ហូមេន (Tom Homan)។ ត្រាំថាបើអាចធ្វើបែបនេះបានមិនដឹងជាអស្ចារ្យយ៉ាងណាទេ។ បានជាអភិបាលរដ្ឋកាលីហ្វ័រញ៉ាហ៊ានប្រើសម្ដីថ្លោសដាក់លោកត្រាំព្រោះលោកដឹងថាទោះបីអំណាចប្រធានាធិបតីអាមេរិកធំដល់កម្រិតនេះក៏ដោយក៏មិនអាចដកគាត់ពីតំណែងបានឡើយ។ នេះបើយោងទៅតាមច្បាប់របស់ប្រទេសអាមេរិក។
កាលពីមុននេះ លោកហូមេនធ្លាប់និយាយថាអ្នកផ្ដល់ទីជម្រកឱ្យជនអន្តោប្រវេសន៍ខុសច្បាប់ត្រូវប្រឈមមុខនឹងផ្លូវច្បាប់។ សូម្បីតែអភិបាលរដ្ឋកាលីហ្វ័រញ៉ា លោកនូសោមក៏មិនរួចខ្លួនដែរ។ ចលនាបាតុកម្មផ្ទុះឡើងកាលពីថ្ងៃសៅរ៍បន្ទាប់ពីមន្ត្រីអន្តោប្រវេសន៍ចុះឆែកឆេរ និងចាប់ខ្លួនមនុស្សនៅទីក្រុងឡូសអេនជើឡេស។ ចលនាបាតុកម្មផ្ទុះឡើងកាន់តែខ្លាំងបន្ទាប់ពីលោកត្រាំបញ្ជូនឆ្មាំសន្តិសុខជាតិទៅចាត់ការពួកបាតុករទោះបីលោកនូសោម និងមន្ត្រីរបស់លោកប្រឆាំងជំទាស់យ៉ាងណាក្ដី។
លោកនូសោមថ្លែងប្រាប់ក្រុមហ៊ុនប្រព័ន្ធផ្សព្វផ្សាយឈ្មោះមេដាស់ ថាច់ (MeidasTouch) ថានេះជាព្រឹត្តិការណ៍ដ៏សោកសៅ ។ នេះហើយជាមូលហេតុដែលលោកប្រាប់លោកត្រាំថាបញ្ឈប់សកម្មភាពនេះទៅ, ហើយមកចាប់ខ្លួនលោកវិញល្អជាង។ បើលោកចង់បកស្បែកមនុស្ស សូមបកស្បែកខ្ញុំមកចុះ។ ប៉ុន្តែឈប់រំខានពួកក្មេងៗដែលគ្នាមិនដឹងអី។ ឈប់រំខានក្មេងៗអាយុត្រឹមតែ៤ឆ្នាំប៉ុណ្ណោះ, ក្មេងៗរៀននៅសាលាបឋមសិក្សា, យើងមានកូនតូចៗ, យើងមានយុវជនដែលត្រូវបញ្ចប់ការសិក្សា។
លោកនូសោមថ្លែងថាលោកបានដឹងអំពីសកម្មភាពរបស់មន្ត្រីអន្តោប្រវេសន៍ដែលដាក់ប៉ុស្តិ៍ឆែកឆេរជាច្រើនកន្លែងនៅទីក្រុងឡូសអេនជើឡេសដើម្បីសួររកប័ណ្ណសម្គាល់ខ្លួន។ លោកហូមេនព្រមានថានឹងបន្តចាត់វិធានការឆែកឆេរដូចភ្លៀងរលឹមដើម្បីស្វែងរកជនអន្តោប្រវេសន៍បញ្ជូនទៅប្រទេសរបស់ពួកគេវិញ។ អ្នកណាហ៊ានរារាំងសកម្មភាពនេះត្រូវចាប់ខ្លួនឡើងតុលាការ។ សូម្បីតែមន្ត្រីរដ្ឋាភិបាលដែលឡើងកាន់អំណាចដោយការបោះឆ្នោតក៏ត្រូវតែចាប់ខ្លួនដែរ។
អភិបាលរដ្ឋកាលីហ្វ័រញ៉ា និងអភិបាលក្រុងឡូសអេនជើឡេសមិនគាំទ្រចំណាត់ការនេះទេ។ លោកស្រីការ៉ែន បាស់ (Karen Bass) ជាអភិបាលក្រុងចាត់ទុកថាវិធានការនេះមិនចាំបាច់ទាល់តែសោះ។ ទោះបីរដ្ឋាភិបាលព្យាយាមដាក់សម្ពាធខ្លាំងយ៉ាងណា លោកស្រីមិនចុះចាញ់ជាដាច់ខាត។ លោកនូសោមថ្លែងបន្ថែមថាលោកហូមេនបើពូកែណាស់ចូលទៅចាប់ខ្លួនគាត់ទៅ។
លោកនូសោមបង្ហោះសារនៅលើបណ្ដាញអ៊ិចថាកូនចៅរបស់លោកត្រាំកំពុងគំរាមចាប់ខ្លួនខ្ញុំដោយសារការបញ្ចេញមតិ។ ឥឡូវនេះ បើលោកឯងគ្រាន់បើណាស់ចូលមកចាប់ខ្លួនខ្ញុំមក។ ប៉ុន្តែបើចង់បំបិទមាត់ខ្ញុំមិនឱ្យនិយាយការពាររដ្ឋកាលីហ្វ័រញ៉ាទៅមិនរួចទេ។ រដ្ឋកាលីហ្វ័រញ៉ាបានដាក់ពាក្យប្ដឹងទៅតុលាការរួចហើយដើម្បីជំទាស់នឹងចំណាត់ការរបស់លោកត្រាំដែលត្រៀមបញ្ជូនឆ្មាំសន្តិសុខជាតិ២ពាន់នាក់ទៅរដ្ឋនេះដោយគ្មានការយល់ព្រមពីអភិបាលរដ្ឋ (លោកនូសោម) សូម្បីតែ១ម៉ាត់៕
