By ទីក្រុងខាគីវ៖ រុស្ស៊ីវាយប្រហារដោយយន្តហោះដ្រូនទៅលើទីក្រុងខាគីវរបស់អ៊ុយក្រែនទាំងកណ្ដាលអធ្រាត្ររយៈពេល៩នាទីបណ្ដាលឱ្យមនុស្សស្លាប់បីនាក់ និងរបួស៦៤នាក់។ ក្នុងនោះមានកុមារ៩នាក់។ នេះបើតាមការប្រកាសរបស់អាជ្ញាធរអ៊ុយក្រែន។ ប្រតិបត្តិការនេះកើតឡើងបន្ទាប់ពីរុស្ស៊ីទើបតែវាយប្រហារមូលដ្ឋានទ័ពអាកាសអ៊ុយក្រែនប៉ុន្មានថ្ងៃមុនដែលជាផ្នែក១នៃការសងសឹកករណីដែលអ៊ុយក្រែនបាញ់ឆេះយន្តហោះទម្លាក់គ្រាប់បែករុស្ស៊ីជាង៤០គ្រឿងកាលពីជាង១សប្ដាហ៍មុន។
ក្រឡេកទៅមើលតំបន់មីកូឡាយ និងខឺសុន (Mykolaiv & Kherson) ឯណោះវិញ រុស្ស៊ីវាយប្រហាររោងចក្រអគ្គិសនី និងទីតាំងផលិតថាមពលដទៃទៀត ជាហេតុធ្វើឱ្យដាច់ភ្លើងគ្រប់ទីកន្លែង។ ខាគីវជាទីក្រុងធំលំដាប់ទី២របស់អ៊ុយក្រែនស្ថិតនៅភាគឦសាន។ ទីនេះរងគ្រោះជាងកន្លែងណាៗទាំងអស់។ ចាប់តាំងពីសង្គ្រាមអ៊ុយក្រែនផ្ទុះឡើងភ្លាម ទីនេះរងការវាយប្រហារជាបន្តបន្ទាប់ដោយដ្រូនផង មីស៊ីលផង និងគ្រាប់បែកបញ្ជាពីចម្ងាយផង។
អភិបាលក្រុងខាគីវ លោកអ៊ីហ័រ ថេរ៉េកូស (Ihor Terekhov) បង្ហោះសារនៅលើតេឡេក្រាមថារុស្ស៊ីវាយប្រហារដោយដ្រូន១៧គ្រឿងទៅលើទីក្រុងនេះធ្វើឱ្យឆេះផ្ទះ១៥ល្វែងនៃអគារកម្ពស់៥ជាន់។ ទីកន្លែងដទៃទៀតក៏រងការខូចខាតផងដែរ។ លោកសរសេរបន្តទៀតថារុស្ស៊ីវាយតម្រង់ទៅរកអគារច្រើនជាន់ ផ្ទះឯកជនរបស់ប្រជាជន សួនកុមារ រោងចក្រ និងមធ្យោបាយដឹកជញ្ជូនសាធារណៈ។
គេឃើញភ្នាក់ងារសង្គ្រោះបន្ទាន់បានឡើងទៅលើអគារដែលកំពុងឆេះយ៉ាងសន្ធោសន្ធៅដើម្បីរំដោះមនុស្សដែលនៅក្នុងនោះ ខណៈដែលក្រុមការងារដទៃទៀតខិតខំពន្លត់ភ្លើង។ គេបានបញ្ជូនអ្នករបួសទៅមន្ទីរពេទ្យជាបន្ទាន់។ ជារួម, អ៊ុយក្រែនអះអាងថារុស្ស៊ីបញ្ជូនដ្រូន៨៥គ្រឿងទៅវាយប្រហារកាលពីយប់មិញ។ ប៉ុន្តែអ៊ុយក្រែនអាចបាញ់ទម្លាក់ដ្រូនបាន៤០គ្រឿង។
នៅតំបន់ខឺសុន ក្រុមការងារព្យាយាមតភ្ជាប់បណ្ដាញអគ្គិសនីជាប្រញាប់បន្ទាប់ពីរុស្ស៊ីវាយប្រហារចំទីតាំងផលិតភ្លើងធំ។ អភិបាលតំបន់នេះមិនទាន់ដឹងថាច្បាស់ថាតើពេលណាទើបអាចតភ្ជាប់ភ្លើងបានឡើងវិញទេ។ ចំណែកអភិបាលតំបន់មីកូឡាយ (Mykolaiv) ថ្លែងថាតំបន់របស់លោកក៏ដាច់ភ្លើងផងដែរ។ ប៉ុន្តែលោកសង្ឃឹមថានឹងតភ្ជាប់ឡើងវិញឆាប់ៗនេះ។ ខឺសុនស្ថិតនៅជាប់នឹងសមរភូមិមុខតែម្ដង ហើយតែងតែរងការវាយប្រហារដោយដ្រូន មីស៊ីល និងកាំភ្លើងធំជាប់ជាប្រចាំ៕
