By ការត្រួសត្រាយផ្លូវតាមរយៈការរៀបចំផែនទីបង្ហាញផ្លូវដើម្បីឈានដល់ការលើកកម្រិតនៃទំនាក់ទំនងប្រទេសកម្ពុជានិងបារាំង ជា «ដៃគូយុទ្ធសាស្ត្រ» គឺជារបត់ប្រវត្តិសាស្ត្រការទូតមួយថ្មីទៀតរបស់កម្ពុជា ។
ការអភិវឌ្ឍន៍ទំនាក់ទំនងចាប់តាំងពីឋានៈប្រទេសរស់ក្រោមអាណានិគមនិយមរបស់បារាំងមកជាប្រទេស ដែលអាចនឹងក្លាយជា ដៃគូយុទ្ធសាស្ត្រ ជាមួយគ្នា គឺជារឿងមិនធម្មតាមួយ។ នេះអាចជាជំហានការទូតមួយរបស់កម្ពុជាដើម្បីត្រួសត្រាយទៅរកវិថីការទូតនៅអឺរ៉ុបកាន់តែទូលំទូលាយថែមទៀត ។
ការប្រកាសរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាពីទីក្រុងនីស នៅក្រោយពេលជំនួបពិភាក្សានៅក្រៅសន្និសីទលើកទី៣ របស់អង្គការសហប្រជាជាតិ ស្តីពីមហាសមុទ្រ (UNOC3) វាគឺជាដំណឹងដ៏មោទនភាពមួយសម្រាប់កម្ពុជា ។
តាមរយៈផែនទីបង្ហាញផ្លូវដែលមន្ត្រីកម្ពុជានិងបារាំងនឹងរៀបចំនេះ យើងសង្ឃឹមថា វានឹងបញ្ចប់នៅក្នុងអំឡុងពេលដែល លោក អេម៉ានូអែល ម៉ាក្រុង ប្រធានាធិបតីបារាំងមកបំពេញទស្សនៈកិច្ចនៅកម្ពុជា ក៏ដូចជាមកចូលរួម កិច្ចប្រជុំកំពូលហ្វ្រង់កូហ្វូនី លើកទី២០ ក្នុងឆ្នាំ២០២៦ខាងមុខ ។
ប្រសិនបើកិច្ចព្រមព្រៀង «ដៃគូយុទ្ធសាស្ត្រ» នេះពិតជានឹងត្រូវចុះហត្ថលេខានៅពេលនោះមែន កិច្ចព្រមព្រៀងនេះនឹងក្លាយជាចំណុចរបត់ជាប្រវត្តិសាស្ត្រ និងការផ្លាស់ប្តូរដ៏សម្បើមរបស់កម្ពុជាដែលអាចប្រែក្លាយខ្លួនទៅជាដៃគូជាមួយបារាំងដែលធ្លាប់ជាអាណាព្យាបាលរបស់ខ្លួនដោយស្មើភាព ដោយផ្អែកលើផលប្រយោជន៍ និងការគោរពគ្នាទៅវិញទៅមក។
ទំនាក់ទំនងរវាងកម្ពុជានិងបារាំងមានលក្ខណៈប្លែកពីគេជាយូរមកហើយ។ ក្នុងនាមជាអតីតអាណានិគមរបស់កម្ពុជា បារាំងបានដើរតួនាទីជាប្រភពដើមនៃបែបបទ ប្រព័ន្ធរដ្ឋបាល ច្បាប់ និងការអប់រំរបស់ប្រទេស។ បន្ទាប់ពីឯករាជ្យ ទំនាក់ទំនងនេះបានវិវត្តតាមរយៈការបន្តកិច្ចសហប្រតិបត្តិការវប្បធម៌ ភាសា និងការអភិវឌ្ឍន៍។ សព្វថ្ងៃនេះ ប្រជាជនកម្ពុជាមួយចំនួនច្រើនគួរសម សិក្សា ឬរស់នៅក្នុងប្រទេសបារាំង ហើយភាសាបារាំងនៅតែត្រូវបានប្រើប្រាស់នៅក្នុងប្រព័ន្ធអប់រំនៅកម្ពុជា។
ភាពជាដៃគូយុទ្ធសាស្ត្រដែលអាចនឹងសម្រេចបាននេះ នឹងធ្វើឱ្យកិច្ចសហប្រតិបត្តិការកាន់តែស៊ីជម្រៅជាផ្លូវការលើវិស័យសំខាន់ៗ ដូចជា ពាណិជ្ជកម្ម ការអប់រំ បច្ចេកវិទ្យា សន្តិសុខ និងការទូតក្នុងតំបន់។ ប្រទេសបារាំងដែលជាមហាអំណាចនាំមុខគេនៅក្នុងសហភាពអឺរ៉ុប និងជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ អាចក្លាយជាអ្នកតស៊ូមតិដ៏មានឥទ្ធិពលសម្រាប់ជួយលើកកម្ពស់ប្រទេសកម្ពុជានៅលើឆាកអន្តរជាតិ។
ដោយឡែកសម្រាប់កម្ពុជាវិញទោះបីជាប្រទេសតូច និងធ្លាប់ជាប្រទេសក្រោមអាណាព្យាបាលបារាំងមែន ប៉ុន្តែកម្ពុជាក៏អាចផ្តល់ឱ្យបារាំងនូវជំហររឹងមាំជាងមុននៅក្នុងតំបន់អាស៊ីអាគ្នេយ៍ ដែលជាតំបន់ដ៏សំខាន់កាន់តែខ្លាំងឡើងនៅក្នុងការរក្សាតុល្យភាពភូមិសាស្ត្រនយោបាយរវាងប្រទេសចិន សហរដ្ឋអាមេរិក និងសហភាពអឺរ៉ុប។
ក្រៅពីនោះភាពជាដៃគូបែបនេះអាចជួយកម្ពុជាក្នុងការធ្វើពិពិធកម្មទំនាក់ទំនងការទូត និងសេដ្ឋកិច្ចរបស់ខ្លួនកាន់តែទូលំទូលាយ ។ កម្ពុជាបានចុះកិច្ចព្រមព្រៀងលើកកម្ពស់ទំនាក់ទំនងនេះជាមួយនឹងប្រទេសចិន ជប៉ុន កូរ៉េខាងត្បូង និង ប្រទេសជិតខាង ហើយប្រទេសខ្លះនៅក្នុងចំណោមនេះក៏បានលើកកម្ពស់ទៅរកមួយកម្រិតថែមទៀតដែលគេហៅថា កិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយ ប៉ុន្តែជាមួយនឹងបារាំងវាគឺជាការចាប់ផ្តើមពង្រីកទំនាក់ទំនងទៅកាន់អឺរ៉ុប។
នៅពេលនេះអឺរ៉ុបដែលមានបារាំងជាបងធំ គឺជាទីផ្សារនាំចេញធំទី២របស់កម្ពុជា ហើយនៅក្នុងនោះបារាំងផ្ទាល់ទោះបីជាពាណិជ្ជកម្ម និង វិនិយោគមិនសូវធំមែន ប៉ុន្តែផលប្រយោជន៍រវាងប្រទេសទាំងពីរគឺមានក៏មិនជាតូចដែរ។
នៅក្នុងរយៈពេល៥ខែដើមឆ្នាំ២០២៥នេះ កម្ពុជានាំចូលពីបារាំងប្រមាណជា ៤៥,៥ លានដុល្លារ ហើយនាំចេញទៅវិញគឺប្រមាណជា ជាង១៨៦លានដុល្លារ ។ ក្រៅពីនោះបារាំងក៏មានអ្នកវិនិយោគនៅកម្ពុជាជាច្រើនដែរ ដូចជាក្រុមហ៊ុនថាមពលថាមពល ក្រុមហ៊ុនគ្រប់គ្រងព្រលានយន្តហោះ ធនាគារ និង គម្រោងមួយចំនួនទៀត ។
សរុបទៅរៀបចំ ផែនទីបង្ហាញផ្លូវឆ្ពោះទៅរកភាពជាដៃគូយុទ្ធសាស្ត្រនាពេលខាងមុខនឹងមិនគ្រាន់តែលើកកម្ពស់ទំនាក់ទំនងកម្ពុជា-បារាំងនោះទេ វានឹងបង្ហាញអំពីមហិច្ឆិតាកាន់តែទូលំទូលាយរបស់កម្ពុជាក្នុងការអះអាងខ្លួនឯងថាជាអ្នកដើរតួនាទីសកម្ម តុល្យភាព និងជាសកល នៅក្នុងពិភពពហុប៉ូល និងចរន្តសកលភាវូបនីយកម្ម ៕
