By អាមេរិក-ចិន ៖ តាមសារព័ត៌មានរដ្ឋចិនថា សហរដ្ឋអាមេរិកនិងចិនបានព្រមព្រៀងគ្នាលើគោលការណ៍នៃក្របខណ្ឌអនុវត្ត កិច្ចព្រមព្រៀងដែលចុះហត្ថលេខាកាលពីខែមុន ដើម្បីដោះស្រាយទំនាស់ពាណិជ្ចកម្ម ។
ការប្រកាសនោះធ្វើឡើងនាថ្ងៃទី១០មិថុនាបន្ទាប់ពីការចរចា២ថ្ងៃនៅក្រុងឡុងដ៏។ កាលពីសប្ដាហ៍មុនប្រធានាធិបតីអាមេរិកលោកដូណាល់ត្រាំនិងសមភាគីចិនលោកសីុជីនពីង បានជួបពិភាក្សាគ្នាតាមទូរស័ព្ទ សំដៅសម្រាលភាពតានតឹងរយៈពេលប៉ុន្មានសប្ដាហ៍ចុងក្រោយនេះ។ លោកលីឆេងហ្គាងអនុរដ្ឋមន្ត្រីពាណិជ្ចកម្មចិន និងជាតំណាងរបស់ក្រុងប៉េកាំងទទួលបន្ទុកពាណិជ្ជកម្មអន្តរជាតិថ្លែងថា ភាគីទាំង២បានឈានដល់កិច្ចព្រមព្រៀងដំបូងមួយ ស្ដីពីក្របខណ្ឌអនុវត្តកិច្ចព្រមព្រៀងដែលសម្រេចបានរវាងមេដឹកនាំទាំង២និងកិច្ចព្រមព្រៀងក្នុងការចរចាកាលពីខែឧសភានៅក្រុងហ្សុឺណែវ។
ចាប់តាំងពីការពិភាក្សាគ្នានៅក្រុងហ្សុឺណែវមក ក្រុងវ៉ាសិុនតោននិងក្រុងប៉េកាំង សន្យាពីការដោះដូរគ្នាលើសឺមីកុងឌុចទ័រឈានមុខបំផុត បញ្ញាសិប្បនិម្មិត្ត ការផ្ដល់ទិដ្ឋាការដល់និស្សិតចិនដែលរៀននៅតាមបណ្ដាសាកលវិទ្យាល័យអាមេរិក រហូតដល់ដីកម្រដែលត្រូវការចាំបាច់សម្រាប់បណ្ដាក្រុមហ៊ុនផលិតរថយន្ត។
ចិនជាប្រទេសមានដីកម្រច្រើនជាងគេនៃពិភពលោកគូសបញ្ជាក់ថា ខ្លួនអាចបន្ធូរបន្ថយការរិតត្បិតសម្រេចកាលពីខែមេសា លើការនាំចេញវត្ថុធាតុនោះជាថ្នូរវិញ ចិនស្នើដល់អាមេរិកលុបចោលការរិតត្បិតលើការនាំចូលប្រទេសខ្លួនបណ្ដាបច្ចេកវិទ្យាចាំបាច់ សម្រាប់ផលិតកម្មសឺមីកុងឌុចទ័រឈានមុខ។ លោកដូណាល់ត្រាំចង់ឲ្យចិនបើកចំហទីផ្សារខ្លួនសម្រាប់បណ្ដាផលិតផលអាមេរិក ដោយលោកព្រមានថាបើចិនមិនបើកទេនោះយើងប្រហែលជានឹងមិនធ្វើអ្វីទាំងអស់៕
