By ព្រំដែនកម្ពុជា និងថៃ មិនបានបិទទេ នៅពេលនេះ គ្រាន់តែកែសម្រួលម៉ោងបិទនិងម៉ោងត្រូវបើក ប៉ុន្តែប្រសិនបើព្រំដែននេះបិទតែម្តងមួយថ្ងៃថៃអាចនឹងហែកលុយចោលប្រមាណជា៥០០លានបាត ឬស្មើនឹង១៥លានដុល្លារ ។
ការកែសម្រួលនេះ បានកើតមានឡើង ក្រោយពេលដែលថៃបានសម្រេចចិត្តបិទព្រំដែនជាឯកតោភាគី ហើយបានកែសម្រួលម៉ោងពេលបិទបើក ដោយខ្លួនឯង ដោយមិនបានជូនដំណឹងមកកាន់ភាគីកម្ពុជា នៅក្នុងរង្វង់ថ្ងៃទី៧ ខែមិថុនា ឆ្នាំ២០២៥ ។ ការសម្រេចចិត្តនេះ ត្រូវបានគេជឿជាក់ថា គឺជាការសម្រេចចិត្តរបស់យោធាថៃក្រោយពេលដែលរដ្ឋាភិបាលថៃបានរលាស់ខ្លួនចេញពីការទទួលខុសត្រូវផ្ទាល់លើបញ្ហាព្រំដែនដោយប្រគល់សិទ្ធិជូនកងទ័ពធ្វើការសម្រេចចិត្តតាមស្ថានការណ៍ជាក់ស្តែង ។
តាមសារព័ត៌មាន ជាភាសាអង់គ្លេស the Nation បានឲ្យដឹងថា ការបិទព្រំដែនកម្ពុជា និងថៃ អាចប៉ះពាល់ដល់ពាណិជ្ជកម្មថៃ ដែលមានតម្លៃរហូតដល់ទៅ១៧០ពាន់លានបាត ឬប្រមាណជាជាង៥,២ពាន់លានដុល្លារឯណោះ ។ នេះបើតាមសហព័ន្ធឧស្សាហកម្មថៃបានព្រមាន កាលពីថ្ងៃអង្គារ៍ ។ ប្រធានសហព័ន្ធឧស្សាហកម្មថៃ លោក គ្រៀងក្រៃ ធៀនុគុល (Kriengkrai Thiennukul)បានអះអាងថា វិធានការដែលពាក់ព័ន្ធនឹងការបើក និងបិទច្រកព្រំដែន តាមកាលវិភាគរបស់យោធានឹងធ្វើឱ្យមានការរំខានដល់ការដឹកជញ្ជូនទំនិញឆ្លងកាត់ព្រំដែនរវាងប្រទេសទាំងពីរ ។
លោកបានកត់សម្គាល់ថា សមាជិកសហព័ន្ធឧស្សាហកម្មថៃមួយចំនួនបានចាប់ផ្តើមទទួលបានផលប៉ះពាល់រួចហើយ បើទោះបីជាបច្ចុប្បន្ន វាមិនអាចវាយតម្លៃពីទំហំនៃការខូចខាតបានច្បាស់ក៏ដោយ ។ លោកបានពន្យល់ថា ពាណិជ្ជកម្មតាមព្រំដែនរបស់ប្រទេសថៃជាមួយកម្ពុជាមានតម្លៃប្រមាណ៥,២ពាន់លានដុល្លារក្នុងមួយឆ្នាំ ដោយតាមច្រកស្រុកអរញ្ញប្រាថេត ខេត្តស្រះកែវ មួយ គឺមានតម្លៃស្មើនឹងប្រមាណ៣,៣៧ ពាន់លានដុល្លារ ឬប្រហែល៦៤ភាគរយនៃតម្លៃសរុប ។
លោកបានបន្តថា នៅពេលនេះវាពិបាកក្នុងការវាយតម្លៃផលប៉ះពាល់ទាំងស្រុង ប៉ុន្តែប្រសិនបើយើងគណនាដោយផ្អែកលើតម្លៃនាំចេញសរុបប្រចាំថ្ងៃវានឹងមានប្រហែល១៥ លានដុល្លារក្នុងមួយថ្ងៃ ។ លោកបានបង្ហាញនូវសេចក្តីសង្ឃឹមថា ស្ថានការណ៍នឹងមិនអូសបន្លាយយូរពេកទេ ព្រោះការពន្យារពេលកាន់តែយូរនោះផលប៉ះពាល់ក៏នឹងកើតមានកាន់តែខ្លាំង ។
លោកបានអះអាងថា ពិតណាស់ វិវាទនឹងធ្វើឱ្យទាំងថៃ និងកម្ពុជារងទុក្ខ ។ ថៃមានអតិរេកពាណិជ្ជកម្មពីការនាំចេញទំនិញប្រើប្រាស់ ប្រេងឥន្ធនៈ គ្រឿងចក្រ និងម៉ាស៊ីនដែលនឹងរងផលប៉ះពាល់ ។ ប៉ុន្តែគ្មាននរណាម្នាក់ចង់ឱ្យរឿងនេះកើតឡើងទេ ។ នៅពេលដែលវាកើតឡើងប្រទេសថៃ ត្រូវបិទព្រំដែនជាបណ្តោះអាសន្ន ដើម្បីសម្រួលដល់ការចរចានៅលើតុ ។
លោកជឿជាក់ថា កិច្ចពិភាក្សានឹងផ្តល់លទ្ធផលល្អជាមួយនឹងការយោគយល់គ្នាទៅវិញទៅមកដែលអនុញ្ញាតឱ្យច្រកព្រំដែនវិលមករកភាពប្រក្រតីឡើងវិញ ។ ដូច្នេះភាគីទាំងពីរ អាចបន្តពាណិជ្ជកម្មឡើងវិញដោយគ្មានការរំខានបន្ថែមទៀត ។
លោក បញ្ជាក់ថា មិនមានវិធានការគាំទ្រនៅពេលនេះទេដោយសារសហព័ន្ធឧស្សាហកម្មថៃ កំពុងរង់ចាំលទ្ធផលនៃការចរចាដែលកំពុងបន្ត ។ លោកបានកត់សម្គាល់ថា រហូតមកដល់ពេលនេះ ការចរចាមានដំណើរការជាវិជ្ជមាន ហើយជាសំណាងល្អ ដែលមិនមានការវា.យប្រហារ ឬសង្គ្រាមផ្ទុះឡើង ។
ដោយឡែក ស្ថិតិដែលអគ្គនាយកដ្ឋានគយ និងរដ្ឋាករកម្ពុជា បានបង្ហាញថា ៥ខែដើម ឆ្នាំ២០២៥នេះ កម្ពុជានាំចេញទៅថៃមានតម្លៃត្រឹមតែជិត៤០០លានដុល្លារជាមួយនឹងកំណើន៣,៤ភាគរយប៉ុណ្ណោះ ហើយនាំចូលពីថៃមកវិញ គឺមានតម្លៃដល់ទៅ១,៤៨ ពាន់លានដុល្លារ ជាមួយនឹងកំណើន១១ភាគរយ ៕
