By ទីក្រុងញូដេលី៖ នាយករដ្ឋមន្ត្រីឥណ្ឌា លោកម៉ូឌី សម្ដែងការសោកស្ដាយយ៉ាងខ្លាំងចំពោះហេតុការណ៍ធ្លាក់យន្តហោះដឹកអ្នកដំណើររបស់ឥណ្ឌា។ លោកចាត់ទុកថានេះជាព្រឹត្តិការណ៍ដ៏សោកសៅបំផុត។ គេដឹងថាមនុស្សជាង២រយនាក់ស្លាប់ដោយសារការធ្លាក់យន្តហោះរបស់ក្រុមហ៊ុនអាកាសចរណ៍អ៊ែឥណ្ឌា (Air India) ដែលត្រូវហោះចេញពីឥណ្ឌាសំដៅទៅទីក្រុងឡុង ប្រទេសអង់គ្លេស។ យន្តហោះដឹកមនុស្សសរុប២៤២នាក់គិតទាំងអ្នកដំណើរ និងបុគ្គលិករបស់ក្រុមហ៊ុន។
បន្ទាប់ពីចាកចេញពីព្រលានយន្តហោះបានតែបន្តិចប៉ុណ្ណោះទៅដល់ទីក្រុងអាមេដាបាត (Ahmedabad) យន្តហោះក៏ធ្លាក់ តែម្ដង។ មនុស្សម្នាក់អាចនៅរស់រានមានជីវិតពីហេតុការណ៍នេះ។ គាត់ប្រាប់ថាគ្រាន់តែចាកចេញដំណើរបានតែប៉ុន្មានវិនាទីប៉ុណ្ណោះ គាត់ស្ដាប់ឮសំឡេងផ្ទុះលាន់ឮកងរំពងពេញផ្ទៃអាកាស។ មិនយូរប៉ុន្មាន យន្តហោះក៏ធ្លាក់ទៅលើអគារមហាវិទ្យាល័យពេទ្យមិនឆ្ងាយប៉ុន្មានពីព្រលានយន្តហោះ។ ពោលគឺធ្លាក់ចំពេលមនុស្សកំពុងបរិភោគអាហារថ្ងៃត្រង់។
បើគ្មានអ្វីប្រែប្រួលទេ យន្តហោះនេះត្រូវចុះចតនៅព្រលានយន្តហោះហ្គេតវីក (Gatwick) នៃទីក្រុងឡុងភាគខាងជើង។ ប៉ុន្តែជាអកុសល យន្តហោះត្រូវជួបនឹងគ្រោះថ្នាក់។ នគរបាលប្រចាំទីក្រុងអាមេដាបាត (Ahmedabad) ប្រាប់ថារហូតមកដល់ពេលនេះ គេរកឃើញសាកសពជនរងគ្រោះ២០៤នាក់នៅកន្លែងធ្លាក់យន្តហោះ។ នគរបាលម្នាក់ទៀតប្រាប់ថាគេរកឃើញអ្នកនៅរស់ម្នាក់អង្គុយកៅអីលេខ១១អា (11A)។ អាចមានអ្នកនៅរស់មួយចំនួនទៀតកំពុងព្យាបាលមុខរបួសនៅមន្ទីរពេទ្យ។
លោកម្នាក់អាយុ៤០ឆ្នាំឈ្មោះរ៉េមេស វិស្វកុមារ (Ramesh Viswashkumar) ថ្លែងប្រាប់កាសែតហ៊ីនឌូស្ថាន (Hindustan Times) ថាយន្តហោះចេញដំណើរបាន៣០វិនាទី គាត់ស្ដាប់ឮសំឡេងផ្ទុះយ៉ាងកងរំពង។ បន្ទាប់មក យន្តហោះក៏ធ្លាក់តែម្ដង។ គាត់និយាយប្រាប់អ្នកកាសែតពីគ្រែគេងនៅមន្ទីរពេទ្យថាហេតុការណ៍នេះហាក់ដូចជាកើតឡើងយ៉ាងឆាប់រហ័សបំផុត។
ខុទ្ទកាល័យរដ្ឋមន្ត្រីក្រសួងអាកាសចរណ៍ឥណ្ឌាថ្លែងថាលោកម៉ូឌីប្រាប់មន្ត្រីក្រោមឱវាទត្រូវធ្វើយ៉ាងណាផ្ដល់ការគាំទ្រសព្វគ្រប់បែបយ៉ាងនៅក្នុងការជួយសង្គ្រោះ និងស្វែងរកសាកសព។ អាកាសយានដ្ឋានអាមេដាបាត (Ahmedabad) សម្រេចចិត្តផ្អាកជើងហោះហើរទាំងអស់ទាំងហោះចេញ និងហោះចូល។ បើទុកជាបើកដំណើរការឡើងវិញក៏មានចំនួនកំណត់ផងដែរ។
លោកហ្គោតាម អាដានី (Gautam Adani) ជាស្ថាបនិក និងជានាយកក្រុមហ៊ុនអាកាសចរណ៍ខាងលើនេះបានបង្ហោះសារនៅលើបណ្ដាញអ៊ិចថាក្រុមហ៊ុនកំពុងសហការគ្នាយ៉ាងជិតស្និទ្ធជាមួយអាជ្ញាធរ។ ក្រុមហ៊ុននឹងផ្ដល់ការគាំទ្រយ៉ាងពេញលេញជូនចំពោះក្រុមគ្រួសារជនរងគ្រោះ។ ក្រុមហ៊ុនសន្យាផ្ដល់ប្រាក់១០លានរូពី ឬស្មើនឹងជាង១១ម៉ឺនដុល្លារអាមេរិកសម្រាប់ក្រុមគ្រួសារជនរងគ្រោះម្នាក់ៗដែលបានស្លាប់នៅក្នុងហេតុការណ៍នេះ។ ចំពោះជនរងគ្រោះដែលត្រូវរបួស ក្រុមហ៊ុនធានារ៉ាប់រងថ្លៃព្យាបាលទាំងអស់។ អគារដែលរងការខូចខាតដោយសារយន្តហោះធ្លាក់ពីលើនោះក្រុមហ៊ុនធានាសាងសង់ថ្មីឡើងវិញ៕
