By ទីក្រុងតេអេរ៉ង់៖ បញ្ហាអ៊ីរ៉ង់ និងអ៊ីស្រាអែលមិនទាន់បិទបញ្ចប់ដោយងាយៗនោះទេ។ បន្ទាប់ពីអ៊ីស្រាអែលវាយប្រហារដ៏ខ្លាំងក្លាលើទីតាំងយោធា និងនុយក្លេអ៊ែរអ៊ីរ៉ង់ពីម្សិលមិញ។ ក្រៅពីបញ្ជូនយន្តហោះដ្រូនជាង១រយគ្រឿងទៅវាយប្រហារឃើញថាមិនសូវមានប្រសិទ្ធភាព កាលពីយប់មិញ និងព្រឹកមិញទៀបភ្លឺ អ៊ីរ៉ង់ប្រើប្រាស់មីស៊ីលវាយប្រហារវិញម្ដង។ អ៊ីរ៉ង់អះអាងថាខ្លួនបាញ់មីស៊ីលរហូតដល់រាប់រយចូលទឹកដីអ៊ីស្រាអែល។ ស្លាប់ របួស ឬខូចខាតកម្រិតណានៅមិនទាន់ដឹងនៅឡើយទេ។
ប្រភពខ្លះថាប្រព័ន្ធការពារដែនអាកាសរបស់អាមេរិកជួយបាញ់ទម្លាក់មីស៊ីលរបស់អ៊ីរ៉ង់មួយចំនួន។ កុំអី, អ៊ីស្រាអែលប្រាកដជារងគ្រោះយ៉ាងដំណំ។ អ៊ីរ៉ង់សម្រេចចិត្តវាយប្រហារលើកនេះបន្ទាប់ពីថ្នាក់ដឹកនាំរបស់ខ្លួនសច្ចាថាត្រូវតែសងសឹកករណីដែលអ៊ីស្រាអែលវាយទីតាំងនុយក្លេអ៊ែរ និងសម្លាប់មនុស្សសំខាន់ៗដូចជាមេបញ្ជាកំពូលឆ្មាំបដិវត្ត និងអ្នកវិទ្យាសាស្ត្រអ៊ីរ៉ង់។
ប្រមុខដឹកនាំអ៊ីស្រាអែល លោកណឺតាន់យ៉ាហ៊ូ បញ្ជាក់ថាប្រតិបត្តិការសឹកដើម្បីចាត់ការកម្មវិធីនុយក្លេអ៊ែរអ៊ីរ៉ង់មិនទាន់បញ្ចប់ត្រឹមនេះទេ។ លោកថាយុទ្ធនាការនេះនឹងបន្តធ្វើដូចភ្លៀងរលឹមច្រើនថ្ងៃទៅមុខទៀតរហូតដល់ដំណាក់កាលមួយដែលអ៊ីស្រាអែលដឹងច្បាស់ថាអ៊ីរ៉ង់លែងមានអ្វីជាគ្រោះគំរាមកំហែងចំពោះសន្តិសុខជាតិរបស់អ៊ីស្រាអែលតទៅទៀត។ សាក្សីនិយាយថាពួកគេស្ដាប់ឮសំឡេងផ្ទុះគ្រាប់បែក និងគ្រាប់មីស៊ីលនៅលើទីតាំងជាច្រើនកន្លែងនៃប្រទេសអ៊ីរ៉ង់។
អ៊ីស្រាអែលអះអាងថាយប់មិញ អ៊ីរ៉ង់បាញ់មីស៊ីលមួយអស់ដៃចូលទីក្រុងតូចធំរបស់ខ្លួន (អ៊ីស្រាអែល) មិនតិចជាងមួយរយគ្រាប់នោះទេ។ នេះជាផ្នែកមួយនៃការសងសឹករបស់អ៊ីរ៉ង់ទៅលើអ៊ីស្រាអែលដែលវាយប្រហារទីតាំងនុយក្លេអ៊ែរ និងយោធាអ៊ីរ៉ង់ពីម្សិលមិញ។ ប៉ុន្តែភាគីទាំង២មិនទាន់បង្ហាញសញ្ញាដកថយនៅឡើយទេ។ បន្ទាប់ពីអ៊ីរ៉ង់បញ្ជូនដ្រូនមួយរយគ្រឿងចូលដែនអាកាសអ៊ីស្រាអែលកាលពីថ្ងៃសុក្រ អ៊ីស្រាអែលវាយប្រហារថែមទៀតកាលពីល្ងាចថ្ងៃសុក្រ។
ហេតុនេះ នៅយប់ថ្ងៃសុក្រ និងព្រឹកថ្ងៃសៅរ៍នេះ អ៊ីរ៉ង់បាញ់មីស៊ីលស្រោចដូចគ្រាប់ភ្លៀងចូលទីក្រុងតែឡាវីវ (Tel Aviv), យេរូសាឡឹម និងទីក្រុងតូចធំដទៃទៀត។ ទោះបីមានសំណាញ់មេឃា អាយអឹនដូម (Iron Dome) និងខែលការពារដែនអាកាសរបស់អាមេរិកជួយទប់យ៉ាងណាក៏ដោយ ក៏អ៊ីស្រាអែលមិនអាចតាមចាប់មីស៊ីលរបស់អ៊ីរ៉ង់បាន១០០%នោះទេ។ ហេតុនេះ អគារជាច្រើនកន្លែងត្រូវឆេះនៅក្នុងភ្លើងយ៉ាងសន្ធោសន្ធៅ។
កាលពីល្ងាចថ្ងៃសុក្រ ទាំងអ៊ីរ៉ង់ និងអ៊ីស្រាអែលសុទ្ធតែអះអាងដូចៗគ្នាថាមីស៊ីលរបស់អ៊ីរ៉ង់បានបាញ់ចូលទឹកដីអ៊ីស្រាអែលពិតមែន។ ចំណែកប្រជាជនអ៊ីរ៉ង់រស់នៅទីក្រុងតេអេរ៉ង់ភាគខាងជើងអះអាងថាពួកគេស្ដាប់ឮសំឡេងផ្ទុះគ្រាប់មីស៊ីល និងគ្រាប់បែកទម្លាក់ពីលើយន្តហោះ។ ទីភ្នាក់ងារព័ត៌មានអ៊ីរ៉ង់ផ្សាយថាអ៊ីស្រាអែលបានវាយប្រហារបន្ថែមទៀតពិតមែន។ រហូតមកដល់ពេលនេះ គេមិនដឹងថាតើការវាយប្រហារគ្នាទៅវិញទៅមកលើកនេះធ្វើឱ្យស្លាប់ របួស ឬខូចខាតទ្រព្យសម្បត្តិកម្រិតណាទេ៕
