By រាជធានីភ្នំពេញ ៖ មានសម្លេងផ្ទុះធ្លាយហ្គាស់ចេញពីហាងឥណ្ឌា១កន្លែង បង្កជាផ្សែងហ៊ុយខ្លាំង ផ្អើលដល់ មន្ត្រីជំនាញអគ្គិភ័យចេញរថយន្តអន្តរាគម៍ កាលពីវេលាម៉ោង៤ទៀបភ្លឺថ្ងៃទី២៤ ខែមិថុនា ឆ្នាំ២០២៥ នៅភោជនីយដ្ឋានយីហោ PUNJABI KITCHEN តាមផ្លូវលេខ១៧២ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។
ប្រភពព័ត៌មានបានឲ្យដឹងថា មុនពេលកើតហេតុ គេបានឃើញផ្សែងហ៊ុយខ្លាំង ចេញពីភោជនីយដ្ឋានខាងលើ ខណៈទ្វារកំពុងបិទ មនុស្សកំពុងគេងនៅផ្នែកខាងក្នុង ។ បន្ទាប់មកគេបានលឺសម្លេងមនុស្សស្រែក ដោយការភ្ញាក់ផ្អើល រួចឃើញជនបរទេសច្រើននាក់ រត់ចេញពីក្នុងហាង ។
ពលរដ្ឋឃើញហេតុការណ៍បានបន្តថា ដោយឃើញផ្សែងខ្លាំង អ្នកភូមិក៏បានទូរស័ព្ទទៅកាន់មន្ត្រីមូលដ្ឋាន ដើម្បីសុំការអន្តរាគមន៍ពីរថយន្តពន្លត់អគ្គិភ័យ ។
ក្រោយទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ចេញរថយន្តពន្លត់អគ្គិភ័យចំនួន០៣គ្រឿង ទៅកាន់ទីតាំងកើតហេតុធ្វើការពន្លត់ទាន់ពេលវេលា ។
អគ្គិភ័យនេះត្រូវបានគ្រប់គ្រងទាំងស្រុងនៅព្រឹកថ្ងៃខែឆ្នាំដដែល ដោយប្រើប្រាស់រថយន្តបាញ់ទឹកអស់ទាំង៣គ្រឿង មិនបានបង្កអោយនរណាម្នាក់រងរបួសនោះទេ ។ មូលហេតុនៃការឆេះបណ្តាលមកពីឆ្លងចរន្តអគ្គិសនី ៕
